ޑެނީ އަލްވޭސް، ހަތަރު އަހަރާއި ބަޔަށް ޖަލަށް ލުމަށް ހުކުމް ކޮށްފި

ބާސެލޯނާ އާއި ބްރެޒިލްގެ ކުރީގެ ޑިފެންޑަރު ޑެނީ އަލްވޭސްގެ މައްޗަށް ޖިންސީ ގޯނާ ކުރި ކަމުގެ ތުހުމަތުގައި އުފުލި ދައުވާތަށް ސާބިތުވެ، ހަތަރު އަހަރާއި ބައިގެ މުއްދަތަކަށް އޭނާ ޖަލަށް ލުމަށް ކޯޓުން ޙުކުމް ކޮށްފި އެވެ.

އަލްވޭސްގެ މައްޗަށް ދައުވާ ކޮށްފައި ވަނީ، 2022 އަހަރުގެ ޑިސެމްބަރު މަހު ބާސެލޯނާގެ ނައިޓު ކުލަބެއްގައި އަންހެނަކަށް ޖިންސީ ގޯނާ ކުރި ކަމުގެ ތުހުމަތުގަ އެވެ. އެ މައްސަލައާ ގުޅިގެން، މިދިޔަ ޖަނަވަރީ މަހުގެ 20 ވަނަ ދުވަހު އަލްވޭސް ހައްޔަރުކޮށްފައިވާއިރު، ކޯޓުން ވަނީ ޝަރީއަތް ނިމެންދެން ވެސް އޭނާ ބަންދުކޮށްފައި ބެހެއްޓުމަށް އަމުރު ކޮށްފަ އެވެ.

ސްޕެއިންގެ ކެޓަލޯނިއާގެ އެންމެ މަތީ ކޯޓުގައި އަލްވޭސް ބުނެފައި ވަނީ، އޭނާ އަންހެން މީހާ އަށް ޖިންސީ ގޯނާ ކޮށްފައި ނުވާނެ ކަމަށާއި، ހިނގި ކަމެއް ހިނގީ ދެ މީހުންގެ ވެސް ރުހުމުގައި ކަމަށެވެ. އަލްވޭސް ޖަލަށް ލުމުގެ އިތުރުން، ކޯޓުން ވަނީ އަނިޔާ ލިބުނު ކަމަށް ބުނާ އަންހެން މީހާ އަށް ބަދަލުގެ ގޮތުގައި 150،000 (އެއް ލައްކަ ފަންސާސް ހާސް) ޔޫރޯ ނުވަތަ 163،000 (އެއް ލައްކަ ފަސް ދޮޅަށް ތިން ހާސް) ޑޮލަރު ދެއްކުމަށް ވެސް އަލްވޭސްގެ މައްޗަށް އަމުރުކޮށްފަ އެވެ.

އަލްވޭސްގެ މައްޗަށް ކުރި ޙުކުމުގައި ބުނެފައި ވަނީ އަނިޔާ ލިބުނު މީހާ ރުހުން ނުދިންކަން ސާބިތުވެފައިވާ ކަމަށާއި، ރޭޕް ސާބިތުވި ކަމަށް ބެލޭނެ ހެކި ވެސް ދައުވާ ލިބޭ ފަރާތުގެ ހެކިބަހުގެ އިތުރުން، އެހެނިހެން ހެކިތައް ވެސް އެބަހުރި ކަމަށެވެ. އެ މައްސަލައިގައި ދައުލަތުގެ ވަކީލުން އެދީފައި ވަނީ އަލްވޭސްގެ މައްޗަށް ނުވަ އަހަރު ދުވަހުގެ ޖަލު ޙުކުމެއް އިއްވައި ދިނުމަށެވެ.

އަލްވޭސް އަކީ ބްރެޒިލްގެ ޤައުމީ ޓީމާއި، ސްޕެއިންގެ ބާސެލޯނާގެ އިތުރުން ސެވިއްޔާ، ޔުވެންޓަސް އަދި ޕެރިސް ސެއިންޓް ޖާމަން (ޕީއެސްޖީ) ފަދަ ކުލަބުތަކާއެކު ކެރިއަރުގައި 43 ތަށި ހޯދާފައިވާ ކުޅުންތެރިޔެކެވެ. އޭނާ އަކީ ފުޓުބޯޅައިގެ ތާރީޚުގައި ވެސް އުފެދުނު އެންމެ ކާމިޔާބު އެއް ކުޅުންތެރިޔާ އެވެ.