ރަފީނިއާ ގަތުމަށް ޝައުގުވެރިވަނީ އާސެނަލް އާއި ލިވަޕޫލް

ބާސެލޯނާ އަށް ކުޅޭ ބްރެޒިލްގެ އެޓޭކިން މިޑްފީލްޑަރު ރަފީނިއާ ދޫކޮށްލަން ބާސެލޯނާ ވިސްނަމުންދާތީވެ އޭނާ ގަތުމަށް އިނގިރޭސިވިލާތުގެ ލިވަޕޫލާއި އާސެނަލް ޝައުގުވެރިވާކަމަށް ސްޕޭނުގެ މީޑިއާތަކުން ބުނަން ފަށައިފި އެވެ.

މީގެ ތެރެއިން އާސެނަލް އަކީ މީގެ ދެ ސީޒަން ކުރިން ބާސެލޯނާއިން ރަފީނިއާ ގަތްއިރު ވެސް ރޭހަށް ނުކުތް ޓީމެކެވެ. މިދިޔަ ސީޒަނާ އަޅާބަލާއިރު މި ސީޒަނުގައި ރަފީނިއާ ރަނގަޅު ކުޅުމެއް ދެއްކި ނަމަވެސް ބާސެލޯނާއިން އޭނާ ވިއްކާލަން ބޭނުންވަނީ އެކުލަބުގެ މާލީ ހާލަތު ހުރި ގޮތުން ބައެއް ކުޅުންތެރިން ވިއްކާލައިގެން ފައިސާ ހޯދަންޖެހޭތީ އެވެ.

ލީޑްސް ޔުނައިޓެޑުން 55 މިލިއަން ޔޫރޯ އަށް ބާސެލޯނާ އަށް ބަދަލުވުމަށްފަހު ރަފީނިއާ ވަނީ މިހާތަނަށް 71 މެޗުން 14 ގޯލު ޖަހައިދީފަ އެވެ. މި ސީޒަނުގައި ހަތަރު ގޯލު ޖަހައި ހަތް އެސިސްޓް ކޮށްދީފައިވަ އެވެ.

ނަމަވެސް އޭނާ ވިއްކަން ބާސެލޯނާއިން ކިޔާ އަގާމެދު މި ދެ ކުލަބުން ވެސް ދަނީ ވިސްނަމުންނެވެ. އެއީ 50 މިލިއަން ޔޫރޯއަށްވުރެ ކުޑަނޫން އަދަދެކެވެ.

އިނގިރޭސި މީޑިއާތަކުން ބުނާ ގޮތުގައި ރަފީނިއާ ގަތުމަށް ލިވަޕޫލަށްވުރެ ބޮޑަށް އާސެނަލް މަސައްކަތް ކުރާނެ އެވެ. ސަބަބަކީ ލިވަޕޫލްގައި މޮޅު ކުޅުންތެރިން ގިނައިރު އާސެނަލް އިތުރަށް ވަރުގަދަ ކުރަންޖެހޭތީ އެވެ. މީގެ އިތުރުން ޓޮޓެންހަމާއި ވެސްޓްހޭމް އަދި ނިއުކާސަލް ވެސް މި ރޭހަށް ވަންނާނެ ކަމަށް ބެލެވެ އެވެ.