ތޫނު އެއްޗަކުން ހަމަލާދީ ވ. ކެޔޮދޫ ދޭލިއާގޭ، މޫސާ އަހުމަދު މަރާލި މައްސަލާގައި ތުހުމަތުކުރެވޭ މީހުންނަށް ސާބިތުނުވި މައްސަލަ އިސްތިއުނާފު ކުރުމާމެދު ވަކި ގޮތެއް ނުނިންމާ ކަމަށް ޕްރޮސެކިއުޓާ ޖެނަރަލް (ޕީޖީ) އޮފީހުން ބުނެފިއެވެ.

މޫސާ އަހުމަދު މަރާލި މައްސަލައިގައި މާމިނގިލީ ސޭޑީގްރޯވް، އިބްރާހީމް ސައްމާހު އަހުމަދު ފަތުހީގެ މައްޗަށް ކުރާ ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ ސާބިތުނުވާކަމަށް ކްރިމިނަލް ކޯޓުން ކުރި ހުކުމާއި، އިބްރާހީމް ސައްމާހު އަހުމަދު ފަތުހީއާއި، ސ. ހިތަދޫ ގުލްބަކާގޭ، މުހައްމަދު ނާޒިޝް ނާޒިމްގެ މައްޗަށް ކުރި މަގްބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ދައުވާ ސާބިތުނުވާކަމަށް ކުރި ހުކުމް އިސްތިއުނާފު ކުރާނެތޯ ރާއްޖެއެމްވީން ކުރި ސުވާލަކަށް ޕީޖީން ބުނީ މިދެމައްސަލަ އިސްތިއުނާފުކުރުމުގެ މުއްދަތު އަދި އެބައޮތް ކަމަށާއި، މައްސަލަ ނިންމެވި ގޮތާއި ޝަރީއަތް ނިމުނު ގޮތުގެ ރިޕޯޓު ދިރާސާކުރަމުންދާ ކަމަށެވެ.

އިސްތިއުނާފުކުރުމާމެދު ގޮތެއް ނިންމާ ހިސާބުން މައުލޫމާތު ހިއްސާކުރާނެ ކަމަށާއި، މިވަގުތަށް އަދި ގޮތެއް ނިންމާފައިނުވާ ކަމަށް ޕީޖީން ބުނެފައިވެއެވެ.

23 ޖެނުއަރީ 2024 ގައި ކްރިމިނަލް ކޯޓުން ކުރި ހުކުމުގައި ބުނެފައިވަނީ، އެ ދެމީހުންގެ މައްޗަށް ކުރާ މަގުބޫލު ސަބަބެއް ނެތި އާންމު ތަނެއްގައި ތޫނު އެއްޗެއް ގެންގުޅުމުގެ ކުށުގެ ދައުވާ ގާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއް ނެތް މިންވަރަށް ޝަރީއަތަށް ސާބިތުނުވާކަމަށެވެ.

މި މައްސަލައިގައި ސައްމާހު އަހުމަދު ފަތުހީގެ މައްޗަށް ތޫނު އެއްޗެއް ބޭނުންކޮށްގެން ގަސްތުގައި މީހަކު މެރުމުގެ ކުށުގެ ދައުވާ އުފުލި ނަމަވެސް އެ ދައުވާވެސް ސާބިތުނުވާކަމަށް ވަނީ ހުކުމް ކުރައްވާފައެވެ.

ކްރިމިނަލް ކޯޓުގައި މި މައްސަލަ ކުރިއަށް ގެންދެވީ ގާޒީ އިބްރާހިމް އިޙްސާންއެވެ.

2017 ވަނަ އަހަރުގެ ސެޕްޓެމްބަރު މަހުގެ 24 ވަނަ ދުވަހު މާފަންނު އައިޓަމްސް ފިހާރަ ކައިރީގައި ތޫނު ހަތިޔާރު ބޭނުންކޮށްގެން ހިންގި ގޭންގު މާރާމާރީއެއްގައި، ވ.ކެޔޮދޫ ދޭލިޔާގޭ މޫސާ އަޙްމަދު މަރާލި މައްސަލައާއި ގުޅިގެން އިތުރު މީހުންގެ މައްޗަށްވެސް ދައުވާތަކެއް އުފުލައި ޝަރީއަތް ކުރިއަށްދެއެވެ. އެ މައްސަލަތައް ވެސް އޮތީ ހުކުމާއި ހިސާބުގައެވެ.