އެތުލެޓިކޯ މެޑްރިޑަށް ކުޅެމުން އަންނަ އާޖެންޓީނާގެ ފޯވާޑް، އެންހެލް ކޮރެއާ، އެ ކުލަބުގައި މަޑުކުރުމުގެ ފުރުސަތު ބޮޑު ކަމަށް ސްޕެއިންގެ މީޑިއާ ތަކުން ރިޕޯޓުކޮށްފި އެވެ.

ރެއާ، އެތުލެޓިކޯ އަށް ބަދަލުވީ 2015 ވަނަ އަހަރު އެވެ. އެ ކުލަބާއެކު އެންމެ ފަހުން އޭނާ ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ނަމަވެސް، ސައުދީ ޕްރޯ ލީގުން ވަނީ ކޮރެއާ އަށް ހުށަހެޅުމެއް ލިބިފައި ކަމަށް މީޑިއާ ރިޕޯޓުތައް ވަނީ ބުނެފަ އެވެ.

ކޮރެއާ އަށް ލިބިފަައި ވަނީ ސައުދީ ލީގުގެ އަލް އިއްތިހާދުގެ ހުށަހެޅުމެކެވެ. ނަމަވެސް، އޭނާ އެ ކުލަބަށް ބަދަލުވުމަކީ ދުރު ކަމެއް ކަމަށް މީޑިއާ ތަކުން ވަނީ ރިޕޯޓުކޮށްފަ އެވެ. ސަބަބަކީ، އަލް އިއްތިހާދުން އެތުލެޓިކޯއާ އެކު ކުރިއަށް ގެންދާ މަޝްވަރާތަކުން، ރަނގަޅު ގޮތެއް ނިމެނޭ ކަމަށް ނުބެލެވޭތީ އެވެ. އެގޮތުން ދެ ކުލަބުން ވެސް ބޭނުންވާ ކަންތައްތަކުގެ ތެރޭގައި ބޮޑު ތަފާތެއް ހުރި ކަމަށް ވަނީ ބުނެފަ އެވެ. އެހެންކަމުން، އެ މަޝްވަރާތަކުން ދެ ކުލަބަށް އެއްވެސް ކަހަލަ އެއްބަސްވުމަކަށް އާދެވޭނެ ކަމަށް ނުބެލެވެ އެވެ. ކުރިއަށް އޮތް ދުވަސްތަކުގެ ތެރޭގައި އެތުލެޓިކޯ އިން އެ ކުލަބުގެ ނިންމުމެއް ނިންމާނެ ކަމަށް ވެސް މީޑިއާ ތަކުން ބުނެ އެވެ.

މީޑިއާ ތަކުގައި އެހެން ރިޕޯޓުކޮށްފައި ވަނިކޮށް، އެތުލެޓިކޯގެ ކޯޗު ޑިއޭގޯ ސިމޯން ވަނީ އެކަމާ ގުޅޭ ގޮތުން ވާހަކަ ދައްކައިފަ އެވެ. ސިމޯން ބުނީ، އޭނާ އަށް ޤަބޫލު ކުރެވޭ ގޮތުގައި ކޮރެއާ އެތުލެޓިކޯގައި މަޑު ކުރާނެ އެވެ. އަދި އެއީ ކޮރެއާ އަށް ވެސް އެންމެ ރަނގަޅު ގޮތް ކަމަށް ސިމޯން ބުންޏެވެ. ނަމަވެސް، އޭނާ ވަނީ ކުރިން ބުނެފައިވާ ވާހަކަ ތަކުރާރު ކޮށްފަ އެވެ. އެއީ ކުޅުންތެރިޔަކު އެމީހެއްގެ ކުރިމަގާމެދު ވަކި ގޮތެއް ނިންމައިފި ނަމަ، އޭނާ އަށް އިޙުތިރާމް ކުރާނެ ވާހަކަ އެވެ.

ކޮރެއާ ވަނީ މިހާތަނަށް އެތުލެޓިކޯ އަށް ކުޅެދިން 399 މެޗުގައި 74 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ސްޕެނިޝް ލީގު، ޔުއެފާ ޔޫރޮޕާ ލީގު އަދި ޔުއެފާ ސުޕަ ކަޕް ކާމިޔާބު ކޮށްފަ އެވެ. އޭގެ އިތުރުން ޔުއެފާ ޗެމްޕިއަންސް ލީގުގެ ފައިނަލެއްގައި ވެސް އޭނާ ވަނީ އެ ޓީމާއެކު ކުޅެފަ އެވެ. އެތުލެޓިކޯގައި ސިމޯން އެންމެ އިސްކަން ދެމުން އަންނަ ކުޅުންތެރިންގެ ތެރޭގައި ވެސް އޭނާ ހިމެނެ އެވެ.

މީގެ އިތުރުން ކޮރެއާ އަންނަނީ 2015 ވަނަ އަހަރުން ފެށިގެން އާޖެންޓީނާގެ ޤައުމީ ޓީމުގައި ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 24 މެޗު ކުޅެދީ، ތިން ލަނޑު ޖަހައިފަ އެވެ. އާޖެންޓީނާ އާއެކު އޭނާ ވަނީ ކޮޕާ އެމެރިކާ ފުޓުބޯޅަ މުބާރާތް އަދި ފީފާ ވޯލްޑް ކަޕް ކާމިޔާބު ކޮށްފަ އެވެ.