ވާޑާ ބްރެމަން އަތުން ބަލިވެ، ބަޔާނުން ފުރުސަތު ނަގާލައިފި

ޖަރުމަނު ލީގުގައި ވާޑާ ބްރެމަނާ ދެކޮޅަށް ކުޅުނު މެޗުން ބަލިވެ، އެންމެ ފަހުގެ ޗެމްޕިއަން ބަޔާން މިއުނިކުން ފުރުސަތު ނަގާލައިފި އެވެ.

ލީގުގައި އާދީއްތަ ދުވަހުގެ ރޭ ބަޔާންގެ އަމިއްލަ ދަނޑުގައި ވާޑާ ބްރެމަނާ ދެކޮޅަށް ނިކުތްއިރު، ބަޔާން އޮތީ ދެ ވަނައިގަ އެވެ. އެއީ އެއް ވަނައިގައި އޮތް ބަޔާ ލެވަކޫސަނަށް ވުރެ ދެ މެޗުން މަދުން ކުޅެގެންނެވެ. ނަމަވެސް، އެ މެޗުން މޮޅުވެ އެއް ވަނައިގައި އޮތް ލެވަކޫސަނާ ދެމެދު ފަރަގު ކުޑަކުރުމުގެ ފުރުސަތު އެ ޓީމަށް އޮތެވެ. ނަމަވެސް މެޗުން ބަލިވެ، އެ ފުރުސަތު ވަނީ ގެއްލިފަ އެވެ.

މެޗުގައި ބަޔާނުން ރަނގަޅަށް ކުޅުނުއިރު، އެ ޓީމަށް ވަނީ ލަނޑު ޖަހާނެ ފުރުސަތު ވެސް ލިބިފަ އެވެ. މެޗުގެ ފުރަތަމަ ހާފުގަައި ވާޑާ ބްރެމަން އިން ލަނޑު ޖަހައި ލީޑު ނެގި އެވެ. މެޗުގެ 25 ވަނަ މިނެޓުގައި އެ ޓީމުގެ ޖަސްޓިން ޖިންމާ ލަނޑު ޖެހި ނަމަވެސް، ވީއޭއާރު ބެލުމަށްފަހު ރެފްރީ ނިންމީ އެ ލަނޑު ބަލައި ނުގަތުމަށެވެ. ނަމަވެސް ދެ ވަނަ ހާފު ފަށައިގެން ކުރީ ކޮޅު ވާޑާ ބްރެމަން އިން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ 59 ވަނަ މިނެޓުގައި މާކޯ ފްރީޑް ތަަނަވަސްކޮށްދިން ފުރުސަތެއްގައި އެ ލަނޑު ޖެހީ، މިޗެލް ވެއިސާ އެވެ.

މިއީ މި ސީޒަންގެ ޖަރުމަނު ލީގުގައި ބަޔާންގެ ދެ ވަނަ ބައްޔެވެ. މިހާތަނަށް ކުޅުނު 17 މެޗުން އެ ޓީމަށް ލިބެނީ 41 ޕޮއިންޓެވެ. އެއް ވަނައިގައި ލެވަކޫސަން އޮތީ 18 މެޗުން 48 ޕޮއިންޓާއެކު އެވެ.