ސަރުކާރުން ގޮތްދޫނުކުރުމުގެ އަގަކީ މައުސޫމު ދިވެހި ޅަދަރިންގެ ފުރާނައަށްވެއްޖެ - އެމްޑީޕީ
ސަރުކާރުގެ އިހުމާލުން އަނެއްކާ ވެސް ދިވެހި ދަރިއެއްގެ ފުރާނަ ގެއްލުމާ ގުޅިގެން ކަންބޮޑުވާ ކަމަށް އެމްޑީޕީން ބުނޭ
ހުވަދުއަތޮޅު ވިލިނގިލި
ސަރުކާރުން ގޮތްދޫނުކުރުމުގެ އަގަކީ މައުސޫމު ދިވެހި ޅަދަރިންގެ ފުރާނައަށް ވެފައިވާ ކަަމަށާއި ސަރުކާރުގެ އިހުމާލުން އަނެއްކާ ވެސް ދިވެހި ދަރިއެއްގެ ފުރާނަ ގެއްލުމާ ގުޅިގެން ކަންބޮޑުވާ ކަމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބުނެފިއެވެ.
އެމްޑީޕިން ނެރުނު ބަޔާނެއްގައި ބުނީ، ގއ. ވިލިނގިލީގައި ސްޓްރޯކެއް ޖެހި ހާލު ދެރަވި 13 އަހަރުގެ ކުޑަކުއްޖެއް ފަރުވާ ދިނުމަށް މާލެ ގެނައުން ލަސްވީ ސަރުކާރުގެ ސީދާ އިހުމާލުން ކަމަށެވެ. އަދި އެ ކުއްޖާ މާލެ ގެނައުން 16 ގަޑިއިރަށް ވުރެ ލަސްވެ އެ ކުއްޖާގެ ފުރާނަ ގެއްލިފައިވާތީ އެމްޑީޕީން ހިތާމަކުރާ ކަމަށް ވަނީ ބުނެފައެވެ.
މި ބަޔާނުގައި އިތުރަށް ބުނީ އިމަޖެންސީގައި ބަލި މީހުން އުފުލޭނެ އިންތިޒާމުތައް ހުރިކަން ކަށަވަރުވާ ކަމަށާއި އެހެންކަމުން އެ ވަސީލަތްތައް ބޭނުން ނުކުރުމަކީ ކުށްވެރިކުރާ ކަމެއް ކަަމަށެވެ. އަދި ސަރުކާރުގެ އިސްވެރިން މި ހާދިސާގެ ޒިންމާއިން ރެކި ދައުލަތުގެ ކުންފުނިތައް ބަދުނާމު ކުރާ ކުރުން އެ ޕާޓީން ދެކެނީ ފިނޑި އަމަލެއްގެ ގޮތުގަ ކަމަށާއި މިކަމުގައި ސަރުކާރުގެ އިސްވެރިން ޒިންމާ ނަގައި އާއިލާގެ ފަރާތުން މައާފަށް އެދުމަށް އެމްޑީޕީއިން ވަނީ ގޮވާލާފައެވެ.
އެއާ އެމްބިއުލާންސްގެ ހިދުމަތް މާޗު މަހުގެ އެއްވަނަ ދުވަހު ފެށުމާއި ހަމައަށް ރާއްޖޭގައި ލިބެން ހުރި ހުރިހާ ވަސީލަތެއް ބޭނުންޖެހޭ ކޮންމެ ހާލަތެއްގައި ފަސްނުޖެހި ބޭނުންކުރުމަށް ވެސް އެމްޑީޕީން ވަނީ ގޮވާލާފައެވެ. އަދި މިއީ ދިވެހި ދަރިއެއްގެ ފުރާނައަށް ވުރެ އަމިއްލަ ސިޔާސީ މަސްލަހަތު ސަރުކާރުން އިސްކުރި ދެވަނަ ފަހަރުކަމަށް އެ ޕާޓީގެ ބަޔާނުގައިވެއެވެ. އެމްޑީޕީއިން ބުނީ ސަރުކާރުން ގޮތްދޫނުކުރުމުގެ އަގަކީ މައުސޫމު ދިވެހި ޅަދަރިންގެ ފުރާނައަށް މިއަދު ވެފައިވާ ކަމަށެވެ.
