ބާސެލޯނާގެ ކުޅުންތެރިން އޭނާއާ މެދު ހިތްހަމަނުޖެހޭކަން އެނގޭ ދުވަހު، ޓީމު ދޫކޮށް ދާނެ ކަމަށް އެ ޓީމުގެ ކޯޗު ޒަވީ ހެނާންޑޭޒް ބުނެފި އެވެ.

ކޮޕާ ޑެލް ރޭ ފުޓުބޯޅަ މުބާރާތުގެ ގަދަ 16 ވަނަ ބުރުގެ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ޒަވީ މިހެން ބުނީ، އޭނާއާ މެދު ޓީމުގެ ކުޅުންތެރިން ހިތްހަމަނުޖެހޭ ކަމަށް މީޑިއާތަކުން ބުނެފައި ވަނިކޮށެވެ. ބާސެލޯނާގެ ކުޅުންތެރިންނާ ހަވާލާދީ އީއެސްޕީއެންގައި ބުނެފައި ވަނީ، ގިނަ ކުޅުންތެރިން ދެކެނީ ޒަވީ އަށް ޓީމު ކާމިޔާބީގެ މަގަށް ބަދަލުކޮށް ނުލެވޭ ކަމަށެވެ. އަދި ޒަވީއާ އެކު ކުރިއަށް ދާން ބައެއް ކުޅުންތެރިން ބޭނުންނުވާ ކަމަށް ވެސް ބުނެފައިވެ އެވެ. ނަމަވެސް އެއީ ކޮން ކުޅުންތެރިޔެއް ނުވަތަ ކުޅުންތެރިންނެއް ކަމެއް ބުނެފައެއް ނުވެ އެވެ.

އެކަމާ ގުޅޭ ގޮތުން ވާހަކަ ދައްކަމުން ޒަވީ ބުނީ، ބާސެލޯނާގައި އޭނާ މަސައްކަތް ކުރަނީ ހިތްހަމަޖެހުމާއެކު ކަމަށެވެ. އަދި މަސައްކަތް ކުރަނީ، ބާސެލޯނާ ކާމިޔާބާ ހަމައަށް ގެންދިޔުމަށް ކަމަށާއި އޭނާގެ ވަގުތާއި، ހުރިހާ ކަމެއް ހުސްކޮށްލަނީ އެކަމަށް ކަމުގައި ޒަވީ ބުންޏެވެ. އޭނާ ބުނީ، މިހާތަނަށް އައިއިރު އަބަދު ވެސް ކުޅުންތެރިންގެ އެހީތެރިކަމާއި، އެއްބާރުލުން އޭނާ އަށް ލިބެމުން އައި ކަމަށެވެ. މިހާރު ވެސް އެކަން އޮތީ އެގޮތުގައިކަން ފާހަގަކޮށް ޒަވީ ބުނީ، ކުޅުންތެރިން ތިބީ އޭނާއާއެކު ނޫންކަން އެނގޭ ދުވަހަކުން، ވަގުތުން ޓީމު ދޫކޮށް ދާނެ ކަމަށެވެ.

މީގެ އިތުރުން އޭނާ ބުނީ، އަބަދު ވެސް ބާސެލޯނާ މަސައްކަތް ކުރަނީ ލަނޑުދަނޑިތަކެއް ކަނޑައަޅައިގެން ކަމަށެވެ. މި ސީޒަންގައި ބާސެލޯނާގެ ލަނޑުދަނޑިތަކަށް ވާސިލްނުވެވިއްޖެ ނަމަ، އެންމެ ފުރަތަމަ ޒިންމާ ނަގާނެ މީހަކަށް އޭނާ ވާނެ ކަމުގައި ވެސް ޒަވީ ބުންޏެވެ. އޭނާ ބުނީ ބާސެލޯނާ އަށް އޮންނާނީ އަބަދު ވެސް ލޯބި ކަމަށާއި ކުޅުންތެރިޔެއްގެ ގޮތުގައި ހުރިއިރު އޮތް ލޯބި، މިހާރު ވެސް އޮތް ކަމަށެވެ.

ކޮޕާ ޑެލް ރޭ މުބާރާތުގެ މެޗާ ކުރިމަތިލާއިރު، އެ މެޗު ކާމިޔާބު ކުރެވޭނެ ކަމުގެ ޔަގީންކަން ވެސް ޒަވީ އަށް އޮވެ އެވެ. އޭނާ ބުނީ، ބާސެލޯނާ އަކީ މެޗަކުން ބަލިވި ނަމަވެސް، އަބަދު އެކަމުގައި ތާށިވެ ތިބޭ ޓީމެއް ނޫން ކަމަށެވެ. އޭނާ ބުނީ، ބައްޔަށް ފަހު ވެސް، ބާސެލޯނާ އިން މަސައްކަތް ކުރާނީ ކުރިއަށް ދާން ކަމުގައި އޭނާ ބުންޏެވެ.