ދުނިޔޭގެ އެންމެ ދުވަސްވީ ކުއްތާއަކީ އޮޅުވާލުމެއް! ގިނިސް ވޯލްޑް ރެކޯޑްސްއިން ތަހުގީގު ކުރަންފަށައިފި

ބޮބީ، ނުވަތަ ދުނިޔޭގެ އެންމެ ދުވަސްވީ ކުއްތާ މިދިޔަ އަހަރު އެސޮރުގެ 31 ވަނަ އުފަން ދުވަސް ފާހަގަކުރިއިރު މުޅި ދުނިޔެ ވަނީ އެސޮރާއެކު އުފާފާޅުކޮށްފައެވެ. އަދި  އޮކްޓޫބަރު މަހު އެސޮރު މަރުވުމުން މުޅި ދުނިޔެ ހިތާމަކުރިއެވެ.

އެކަމަކު މިހާރު އެސޮރުގެ ރެކޯޑް ބްރޭކިންގ ޓައިޓަލްއާމެދު ވަނީ ސުވާލު އުފެދިފައެވެ.

ބޮބީ މަރުވުމާއެކު، އެސޮރުގެ އުމުރާމެދު ވެޓުންނާއި އެހެނިހެން ތަޖުރިބާކާރުން ޝައްކު އުފެދުމާއެކު ގިނިސް ވޯލްޑް ރެކޯޑްސްއިން ވަނީ އެ މައްސަލަ ބަލަން ފަށާފައެވެ.

ރިވިއު ކުރިއަށްދާއިރު، ބޮބީގެ ޓައިޓަލް ސަސްޕެންޑްކޮށް، ދުނިޔޭގެ އެންމެ ދުވަސްވީ ދިރިހުރި ކުއްތާއާއި، މިހާތަނަށް އެންމެ ދުވަސްވީ ކުއްތާގެ ލަގަބަށް ކުރިމަތިލުމުގެ ފުރުސަތު ވަގުތީގޮތުން ވަނީ މެދުކަނޑާލާފައެވެ.

ގިނިސް ވޯލްޑް ރެކޯޑްސްއިން އަންގާރަ ދުވަހު އެސޯސިއޭޓެޑް ޕްރެސްއަށް އީމެއިލް މެދުވެރިކޮށް ދިން އިންޓަވިއުއެއްގައި ބުނެފައިވަނީ، އެމީހުންގެ ރިވިއު ކުރިއަށްދާއިރު، ދިރިހުރި އެންމެ ދުވަސްވީ ކުއްތާގެ ރެކޯޑް ޓައިޓަލްތައް ވަގުތީގޮތުން މެދުކަނޑާލަން ނިންމާފައިވާކަމަށެވެ.

ދުނިޔޭގައި އޮތް އެންމެ ދުވަސްވީ ކުއްތާގެ އުމުރާމެދު ސުވާލު އުފެދެނީ ކީއްވެ؟

ބޮބީއަކީ ޕޯޗުގީޒު ނަސްލުގެ ޖަނަވާރުގެ ބެލެނިވެރި ކުއްތާއެއް ކަމަށްވާ ޕިއުރްބްރޭޑް ރަފީރޯ ޑޯ އެލެންޓެޖޯއަށް ނިސްބަތްވާ ޖަނަވާރެކެވެ. މިއީ އާންމުކޮށް 12 އަހަރާ 14 އަހަރާ ދެމެދުގެ މުއްދަތަކަށް ދުނިޔޭގައި ތިބޭ ބާވަތެކެވެ. ބޮބީ ފަދަ، ބަރު މިފަދަ ކުއްތާ ގިނަ ފަހަރަށް މި އުމުރަށް ދިއުމުގެ ކުރިން މަރުވެއެވެ.

ގިނިސް ވޯލްޑް ރެކޯޑްސްއިން ބުނީ، ކުއްތާގެ އުމުރާމެދު ސުވާލު އުފައްދައި ބައެއް ވެޓުންގެ ކޯސްޕޮންޑެންސް ލިބިފައިވާކަމަށާއި، ވެޓުންނާއި އެހެނިހެން ޕްރޮފެޝަނަލުންގެ ޕަބްލިކް ކޮމެންޓްރީއަށް ސަމާލުކަން ދީފައިވާ ކަމަށެވެ.

އިނގިރޭސިވިލާތުގެ ނޫހެއް ކަމަށްވާ "ދަ ގާޑިއަން" އިން ބުނިގޮތުގައި، ބޮބީގެ އުމުރުގެ ވާހަކަ ބިނާވެފައިވަނީ ވެރިމީހާގެ ބަހެއްގެ މައްޗަށެވެ. ޖެނެޓިކް ޓެސްޓުތަކުން އެސޮރުގެ ސީދާ އުމުރު ކަށަވަރު ކުރެވޭ ގޮތެއް ނުވިއެވެ.

ޓެކް އެންޑް ކަލްޗަރ މަޖައްލާ "ވަޔަރޑް" އިން މިދިޔަ ޑިސެމްބަރު މަހުގެ ތެރޭގައި ތަހުގީގެއް ފަށާފައިވާއިރު، ޕެޓްސް ރަޖިސްޓްރީ ކުރުމަށް ޕޯޗުގަލް ސަރުކާރުގެ ޑޭޓާބޭސްއަށް ބޮބީގެ އުމުރު ކަށަވަރުކުރުމަށް ގުޅާފައި ނުވާކަން ވަނީ ފާހަގަކުރެވިފައެވެ.

މީގެ ކުރިން މި ރެކޯޑް އޮތީ އުމުރުން 29 އަހަރާއި ފަސް މަހުގައި 1939 ވަނަ އަހަރު މަރުވި އޮސްޓްރޭލިއާގެ ކުއްތާއެއް ކަމަށްވާ ބްލޫއީ އަތުގައެވެ.

ބޮބީގެ ވެރިފަރާތުން ބުނަނީ އެއީ ދޮގު ތުހުމަތުތަކެއް ކަމަށް!

ބޯބީ އެސޮރުގެ މުޅި އުމުރު ހޭދަކުރީ ޕޯޗުގަލްގެ ހުޅަނގުގައި އޮންނަ ލެއިރިއާގެ ރޫރަލް ވިލެޖް ކަމަށްވާ ކޮންކުއެރޯސްގައެވެ.

އެސޮރު އުފަންވެފައިވާ ކަމަށް ބެލެވިފައިވަނީ 1992 ވަނަ އަހަރު، އެމީހުން ލަކުޑި ރައްކާކޮށްފައި ހުރި ގުދަނެއްގައެވެ.

އެސޮރުގެ ވެރިޔާ ލިއޮނެލް ކޮސްޓާ ބުނާގޮތުގައި ވެޓުން ބޮބީގެ ލެގަސީއަށް މަލާމާތް ކުރަން މަސައްކަތްކުރަނީ، އިންސާނުންގެ މަސް ކެއުމަކީ މުސްކުޅިވުމުގެ އެއް ސިއްރެއްގެ ގޮތުގައި ސިފަކޮށްފައިވާތީއެވެ.

ގިނިސް ވޯލްޑް ރެކޯޑްސްއިން މި ރިވިއު ކުރިއަށްގެންދާއިރު ބޮބީގެ ޓައިޓަލް މިހާރު އޮތީ ހުއްޓިފައެވެ.