2018 ވަނަ އަހަރު ބަންދުކުރި ސަބުދެލި މަގު، އެންމެ ފަހުން ޢާންމުންނަށް ހުޅުވާލައިފި

ކުރީގެ ރައީސް، އަބްދުﷲ ޔާމީންގެ ޒަޢާމަތުގައި ބަންދުކުރި ސަބުދެލި މަގު، މަރާމާތުކުރުމަށް ފަހު އާންމުންނަށް ހުޅުވާލައިފިއެވެ.

މިހާރުގެ ރައީސް، ޑރ. މުޙައްމަދު މުއިއްޒު ހައުސިން މިނިސްޓަރު ކަމުގައި ހުންނެވި ދުވަސްވަރު ސަބުދެލި މަގު ބަންދުކުރީ، ހިރިޔާ ސްކޫލުގެ ފަހަތަށް، އަދި ރަސްފަންނު ކުރިމައްޗަށް އޮތް ހުސް ޖާގައިގައި "ކޮރަލް ބުލެވާޑް"ގެ ނަމުގައި ލަގްޒަރީ ހައުސިން ޕްރޮޖެކްޓެއް ހިންގުމަށެވެ.

މި ފަހުން އެ ބިން ވެސް ހިމެނޭ ސަބުދެލި މަގު ހުޅުވުމަށް ސަރުކާރުން ނިންމީ، އަމީނީ މަގު ޒަމާނީ ފެންވަރަށް ހެދުމަށް ބަންދުކުރުމާއެކު، ޓްރެފިކަށް އޭރު އޮތް ބާރު ކުޑަކުރުމަށެވެ. އެގޮތުން އެ މަސައްކަތް ފަށާފައިވާކަން، ކައުންސިލުތަކާ ބެހޭ ވުޒާރާއިން އެންގީ މި މަހުގެ ހަވަނަ ދުވަހުއެވެ.

އެގޮތުން އެ މަގު ހުޅުވިކަން އަންގައި، ރޯޑް ޑެވެލޮޕްމެންޓް ކޯޕަރޭޝަން (އާރްޑީސީ) އިން އެކްސްގައި ކުރި ޕޯސްޓެއްގައި ބުނީ، އެ މަގު ހުޅުވުމަށް ކުރަން ޖެހޭ މަސައްކަތްތައް ނިންމާލުމަށްފަހު އާންމުންނަށް ހުޅުވާލާފައިވާ ކަމަށެވެ.