ސޯޝަލް ސެންޓަރގައި ސިޔާސީ ޕާޓީއަކުން ކޯލްސެންޓަރ ހިންގާ ކަމަށް ބުނެ ރަސްމީކޮށް އީސީ އަށް ޝަކުވާ ހުށަހަޅާފައިވާ ކަމަށާއި މިހާތަނަށް ބެލި ބެލުމުން އެތަނުގައި ތިބީ އިދާރީ މުވައްޒަފުންތަކެއް ކަމަށް އެނގިފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ރާއްޖެޓީވީން ގެނެސްދެމުންދާ "ބައި އިލެކްޝަންސް" ކަވަރޭޖަށް އީސީގެ އެސްޖީ ހަސަން ޒަކަރިއްޔާ ވިދާޅުވީ އެފަދަ ޝަކުވާ އެއް މިހާރު އެ ކޮމިޝަނަށް ރަސްމީކޮށް ހުށަހަޅާފައިވާ ކަމަށެވެ. އަދި ސިޔާސީ ޕާޓީއަކުން ސޯޝަލް ސެންޓަރތެރޭގައި ކޯލް ސެންޓަރ ހިންގާކަމަށް ބުނެ ލިބުނު ޝަކުވާތައް ބޮޑުވެ އެތަން ބަލާލަން އީސީން ގޮސްފައިވާ ކަމަށެވެ.
އެގޮތުން ބެލި ބެލުމުން އެތަނަކީ އެއީ ޔޫތް މިނިސްޓްރީގެ މަސައްކަތްތަކެއް ކުރާ ތަނެއް ކަަމަށާއި އެތަނުގައި ތިބީ އިދާރީ މުވައްޒަފުންކަމަށް އީސިީ އަށް އެނގިފައިވާ ކަމަށް އޭނާ ވިދާޅުވިއެވެ. އެހެންނަމަވެސް އެފަދަ މައްސަލަ އެއް ބަލާ އިންތިޚާބު ބާއްވާ ތަނެއްގައި ނުވަތަ އެ ނޫން ތަނެއްގައި ވެސް އުސޫލާއި ޚިލާފަށް އަމަލުކުރާ ނަމަ އެކަން ބަލާނެ ކަމަށާއި ފިޔަވަޅުވެސް އަޅާނެ ކަަމަށް އިލެކްޝަންސް ކޮމިޝަނުން ވަނީ ބުނެފައެވެ.
ސަރުކާރުން ސޯޝަލް ސެންޓަރގައި އޮފީސް ހަދައިގެން ތިބިކަމުގެ ތުހުމަތުކުރެވެން ފަށާފައި ވަނީ މީސްމީޑިއާގައި ދައުރުވަމުންދާ ވީޑިއޯ އާއި ފޮޓޯތަކުން އާއްމު މީހަކު ބަޔަކު ސޯޝަލް ސެންޓަރގެ ޔޫތް ވިންގްބައިގައި ތިބިކަން ފާހަގަވި ހިސާބުންނެވެ. އަދި އެތަނުގައި ކުރަމުން ދަނީ އިންތިޚާބާއި ގުޅުން ހުރި މަސައްކަތްތައް ކަމަށް ވަނީ ތުހުމަތުކޮށްފައެވެ.
