އަޔެކްސްގެ އަންހެން ކުޅުންތެރިންނާއި މުވައްޒަފުންނަށް ޖިންސީ ފުރައްސާރަ ކުރުމުގެ ސަބަބުން ނެދަލޭންޑްސްގެ ކުރީގެ ކުޅުންތެރިޔާ މާކް އޮވަމާސް އެއް އަހަރަށް ފީފާއިން ސަސްޕެންޑްކޮށްފި އެވެ.
ފީފާއިން އޭނާ ފުޓްބޯޅައިގެ ހުރިހާ ހަަކާތަކުން ސަސްޕެންޑްކުރީ އަޔެކްސްގެ ޓެކްނިކަލް ޑައިރެކްޓަރަކަށް ހުރިއިރު އަންހެން ކުޅުންތެރިންނާއި މުވައްޒަފުންނަށް ފޮނުވި ނޭދެވޭ މެސެޖްތަކާއި ފޮޓޯތަކާއި ގަދަކަމުން ނޭދެވޭ އަމަލުތަކެއް ހިންގަން އުޅުމާ ގުޅިގެންނެވެ.
މި މައްސަލާގައި ނެދެލޭންޑްސްއިން ވަނީ ފީފާއިން އޭނާ ސަސްޕެންޑް ކުރުމުގެ ކުރިން ދެ އަހަރު ދުވަހުގެ ސަސްޕެންޝަނެއް ދީފަ އެވެ. އަދި ފީފާއިން އޭނާ ސަސްޕެންޑްކުރީ މައްސަލަގައި ފިޔަވަޅު އަޅައިދޭން އަޔެކްސްއިން އެދުމުންނެވެ.
އާސެނަލް އާއި ބާސެލޯނާ އަށް ކުރިން ކުޅުނު އޮވަމާސް އަށް އަޔެކްސްގެ ވަޒީފާ ދޫކޮށްލަން ޖެހުނީ މި މައްސަލައާ ގުޅިގެން މިދިޔަ އަހަރުގެ ފެބްރުއަރީ މަހު އެވެ.
ފީފާއިން އޮވަމާސް ސަސްޕެންޑްކުރި ނަމަވެސް އޭނާ އަށް މައްސަލަ އިސްތިއުނާފު ކުރެވޭނެ އެވެ.
