ޚިދުމަތެއް ހޯދުމަށް ދައްކަން ނުޖެހޭ ފައިސާއެއް ދައްކަން ބުނާނަމަ އެކަން ރިޕޯޓްކުރެވޭނެ ނިޒާމެއް ގާއިމުކުރާނަން: އާޒިމް

އެއްވެސް ޚިދުމަތެއް ހޯދުމަށް ދައްކަންނުޖެހޭ ފައިސާއެއް ދައްކަން ބުނާނަމަ އެކަން ރިޕޯޓްކުރެވޭނެ ނިޒާމެއް ގާއިމުކުރައްވާނެ ކަމަށާއި، އެކަމަކާމެދު ފިޔަވަޅު އަޅާނެކަމަށް މާލެ ސިޓީ ކައުންސިލަށް އެމްޑީޕީގެ ޓިކެޓުގައި ވާދަކުރައްވާ އާދަމް އާޒިމް ވިދާޅުވެއްޖެއެވެ.

ރާއްޖެ ޓީވީން ގެނެސްދޭ "ރައްޔިތުންގެ ދަރުބާރު" ޕްރޮގްރާމުގައި، މާލޭގެ ޕާކިންގ މައްސަލައަށް ހައްލު ގެނައުމަށް ކުރައްވާނެކަންކަމާ ގުޅޭގޮތުން އާންމުންގެ މީހަކު ދެންނެވި ސުވާލަށް ޖަވާބު ދެއްވަމުން އާޒިމް ވިދާޅުވީ، މާލޭގައި 120،000އާ ގާތްކުރާ އަދަދަކަށް ވެހިކަލް ގެންގުޅޭކަމަށެވެ. ގާނޫނުން ލާޒިމްކުރަނީ މާލޭގެ ކެރީންގ ކެޕޭސިޓީ ކަނޑައެޅުން ކަމަށާއި، މޭޔަރުކަަމަށް އިންތިޚާބު ވެވަޑައިގެންފިނަމަ އެންމެ ފުރަތަމަ ކުރާނެކަމަކީ ކެރީން ކެޕޭސިޓީ ކަނޑައެޅުންކަމަށް އާޒިމް ވިދާޅުވިއެވެ.

މާލޭގައި ގެންގުޅޭ ވެހިކަލުތައް ޕާކުކުރާނެ ތަންތަން ކަނޑައެޅުމަކީ ކުރަންޖެހޭ ކަމަކަށްވާއިރު، މިހާރު ހުރި ވެހިކަލުތައް ޕާކުކުރެވޭނެ ތަންތަން ގާއިމުކުރެވޭނެކަމަށް އާޒިމް ވިދާޅުވިއެވެ. އެގޮތުން ޕާކިންގ ބިލްޑިންގތައް އަޅާނެކަމަށާއި، ޕާކުކުރާނެ ސްލޮޓްތައް ދޫކުރާނެކަމަށް އާޒިމް ވިދާޅުވިއެވެ.

ނަމަވެސް ސްލޮޓް ހޯދުމަށް ވަކި މީހަކަށް ގުޅައިގެން އެކަން ކުރަން ނުޖެހޭނެކަމަށް އާޒިމް ވިދާޅުވިއެވެ.

އާޒިމް ވިދާޅުވީ މޭޔަރުކަމާ ހަވާލުވެވަޑައިގަންނަވާ ގޮތަށް ޕާކިންގ މައްސަލައަށް ހައްލު ގެނައުމަށް މަސައްކަތް ފައްޓަވާނެކަމަށެވެ. އަދި މާލޭގެ މަގުމަތީގައި ހުރި އާންމުންނަށް އުނދަގޫވާ މައްސަލަތައް ހައްލުކުރުމަށް މަސައްކަތް ކުރައްވާނެކަމަށާއި، ފުލުހުންނާ ގުޅިގެން ގާތުން މަސައްކަތް ކުރައްވާނެކަމަށެވެ.