ހުޅުމާލެ ފުރަތަމަ ފިޔަވަހީގެ ފްލެޓްތަކުގެ ކުލި ކުޑަކުރަނީ
6 ޖެނުއަރީ 2024 | ހޮނިހިރު 13:48އަންނަ މަހުން ފެށިގެން އެ ކުލިތައް 20 ޕަސެންޓު ކުޑަކުރަން ވަނީ ނިންމާފައި
ހުޅުމާލެގެ ފުރަތަމަ ފިޔަވަހީގައި ހުރި ފްލެޓްތައް
ހުޅުމާލޭގެ ފުރަތަމަ ފިޔަވަހީގައި ސަރުކާރުން އަޅާފައިވާ ފްލެޓުތަކަށް ދައްކަން ޖެހޭ ކުލި ކުޑަކުރުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
މާލެ ސިޓީގެ މޭޔަރު އިންތިހާބުގައި ވެރިކަން ކުރާ ކޯލިޝަންގެ ފަރާތުން ވާދަކުރައްވާ އާޒިމާ ޝަކޫރުގެ ކެމްޕެއިނުގައި ވާހަކަ ދައްކަވަމުން ރައީސް މުއިއްޒު ވިދާޅުވީ ހުޅުމާލޭގެ ފުރަތަމަ ފިޔަވަހީގައި ސަރުކާރުން އަޅާފައިވާ ފްލެޓުތަކަށް ދައްކަން ޖެހޭ ކުލި، އަންނަ މަހުން ފެށިގެން 20 ޕަސެންޓު ކުޑަކުރައްވަން ނިންމަވާފައިވާ ކަމަށެވެ.
ރައީސް ވިދާޅުވީ އެބަދަލު ދެއްވަނީ މިހާރުގެ އިގްތިސާދީ ޙާލަތަށް ބެއްލެވުމަށްފަހު ކަމަށާއި، ކުލި ކުޑަ ކުރި ނަމަވެސް ސަރުކާރަށް އެކަން މެނޭޖު ކުރެވޭނެ ކަމަށެވެ.
އަދި މީގެ އިތުރުން، ފްލެޓްތަކުގެ މެއިންޓެނެންސް ފީ ކުޑަކުރުމާ ގުޅޭގޮތުން ވެސް އާބަންކޯ އާ އެކު މަޝްވަރާ ކުރައްވަމުން ގެންދަވާ ކަމަށް ރައީސް ވިދާޅުވި އެވެ. އަދި ވިދާޅުވީ މަހު ޕޭމަންޓުން ނުދެއްކި ހުރި ފައިސާތައް ބަހާލައިގެން ދެއްކެވޭނެ ފުރުސަތު ދެއްވާނެ ކަމަށެވެ.
ރައީސް އެފަދައިން ވިދާޅުވިއިރު، މި އަހަރުން ފެށިގެން ސޯޝަލް ހައުސިންގެ ކުލީގެ ޖޫރިމަނާތައް ވެސް ވަނީ އެއް ޕަސެންޓަށް ކުޑަކޮށްފައެވެ.
އެހެން ނަމަވެސް، ހިޔާ ފްލެޓްތަކުގެ ކުލިން ދެ ލައްކައަށް ވާ ފައިސާ އާންމުންނަށް ދެއްވާނެ ކަމަށް ވިދާޅުވި ނަމަވެސް، އެމަނިކުފާނު އިއުލާނު ކުރެއްވި ގޮތުން އާންމުންނަށް ލިބޭނީ ގާތްގަޑަކަށް އެއްލައްކަ ދިހަ ހާސް ރުފިޔާއެވެ.
