ހުޅުމާލޭ ރައްޔިތުންގެ ޝަކުވާއަށް ހައްލެއް، އިންތިޚާބުކޮށްފިނަމަ ތަފާތު ފެންނާނެ: އާޒިމް
ހުޅުމާލޭގައި އެންމެ ފުރަތަމަ އާބާދުވި މީހުން ދިރިއުޅޭ ފްލެޓްތަކުގައި ލިފްޓެއް ނުހުރޭ
އާޒިމް މާލޭގެ ގެއަކަށް ޒިޔާރަތްކުރައްވައި، އެ ގޭގެ މީހުންގެ ކަންބޮޑުވުންތައް އަޑުއައްސަވަނީ
ކުރިއަށް އޮތްތަނުގައި ތަފާތުކޮށް މަސައްކަތްކޮށް، މާލެ ސިޓީ ކައުންސިލްގެ ހަޔާތުގައި ދޭއްބައި އަހަރުން 10 އަހަރުގެ ތަރައްގީއާއި ކުރިއެރުން ފެންނާނެކަމަށް، އެމްޑީޕީގެ ކެންޑިޑޭޓް އަދި އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި އާޒިމް ވަނީ، ހުޅުމާލޭގައި ހުރި މައްސަލަތަކާއި، ތަރައްގީއާ ގުޅޭގޮތުން ވަރަށް ބޮޑަށް ވާހަކަފުޅުދައްކަވާފައެވެ. އާޒިމް ވިދާޅުވީ މިހާތަނަށް އައިއިރު ވަރަށް ގިނަ އަދަދެއްގެ ހުޅުމާލޭ ރައްޔިތުންނާ ބައްދަލުކުރައްވައި، ޝަކުވާތައް އަޑުއައްސަވާފައި ވާކަމަށެވެ.
އާޒިމް ވިދާޅުވީ ހުޅުމާލޭގައި އެންމެ ފުރަތަމަ އާބާދުވި މީހުން ދިރިއުޅޭ ފްލެޓްތަކުގައި ލިފްޓު ނުހުންނަ ކަމަށާއި، މިއަދު އެމީހުންނަށް ސިޑިން އަރައިފޭބުމަށް ދަތިވެފައިވާ ކަމަށެވެ. އަދި އުމުރުން ދުވަސްވުމާއެކު ގިނަ ބަޔަކު އެކަމަށް ހައްލު ހޯދައިދިނުމަށް އެދެމުންދާކަމަށް އާޒިމް ވިދާޅުވިއެވެ. އެގޮތުން އުސޫލާއި ގަވާއިދަށް ބެލުމަށްފަހު، ކަރަންޓު ގޮނޑި ނުވަތަ ލިފްޓެ ލެވޭނަމަ، އެކަން ކުރައްވާނެ ކަމަށް އާޒިމް ވިދާޅުވިއެވެ.
ތަރައްގީކުރެވޭ ޕާކުތަކާ ގުޅޭގޮތުން އާޒިމް ވިދާޅުވީ، ޕާކުތައް ތަރައްގީކުރާނީ އެންމެނަށް ވެސް ފުރިހަމަގޮތުގައި ޕާކު ބޭނުންކުރެވޭ ގޮތަށް ކަމަށެވެ. އުމުރުން ދުވަސްވީ މީހުންނާއި، ނުކުޅެދުންތެރިކަން ހުންނަ މީހުންނާއި، މާބަނޑު އަންހެނުންނާއި، ތުއްތުކުދިން ގެންގުޅޭ މީހުންނަށް ބޭނުންވާ ހުރިހާ ޚިދުމަތްތަކެއް ޕާކުތަކުން ލިބޭނެ އިންތިޒާމް ހަމަޖައްސަވާނެ ކަމަށެވެ. އަދި ވިދާޅުވީ ޕާކުތަކުގައި ފާޚާނާތައްވެސް ގާއިމްކުރައްވާނެ ކަމަށެވެ.
މިސްކިތްތަކުގެ ސާފުތާހިރުކަމަށް އިޝާރާތްކުރައްވައި އާޒިމް ވިދާޅުވީ، މިހާރު ގިނަ މިސްކިތްތަކުގެ ފާޚާނާތައް ސާފުތާހިރު ނޫންކަމަށާއި، ފާޚާނާތައް ބޭނުންނުކުރެވޭ ކަމަށެވެ. ނަމަވެސް މޭޔަރުކަމަށް އިންތިޚާބުކޮށްފިނަމަ މިސްކިތްތަކުގެ ފާޚާނާތައް މަރާމާތުކޮށް، ސާފުތާހިރު ތަންތަނަށް ހައްދަވާނެކަމަށާއި، މިސްކިތްތައް ބެލެހެއްޓުމަށް އިސްކަން ދެއްވާނެ ކަމަށެވެ.
މީގެ އިތުރުން އާޒިމް ވިދާޅުވީ ސިޓީ ކައުންސިލަށް އަހަރެއްގެ މައްޗަށް 85 މިލިއަން ވަންނަނަމަ، އެ އަދަދު ވަރަށް ބޮޑު އަދަދަކަށް ބަދަލުކުރައްވާނެ ކަމަށާއި، އިންވެސްޓްކުރަން އެނގިވަޑައިގަންނަވާ ކަމަށެވެ. މާލެސިޓީ ތަރައްގީކުރާނެ ޕްލޭންތައް އެބަހުރިކަމަށާއި، ވެހިކަލް ފީތަކުން ވެސް ގިނަ އަދަދެއްގެ ފައިސާ ވަންނަ ކަމަށެވެ. ނަމަވެސް ފާއިތުވެދިޔަ އަހަރުތަކުގައި މާލެސިޓީ ކައުންސިލަށް ވަންނަ ފައިސާއިން މާލޭގެ ތަރައްގީއަށް ކުރި މަސައްކަތެއް ފެންނަން ނެތް ކަމަށް އޭނާ ވިދާޅުވިއެވެ.
އެމްޓީސީސީއަށް އިޝާރާތްކުރައްވައި އާޒިމް ވިދާޅުވީ، ފުރަތަމަ މަގާމާ ހަވާލުވެވަޑައިގަތްއިރު، އެމްޓީސީސީގައި ހުރީ 2 ބިލިއަން ރުފިޔާ ކަމަށެވެ. ނަމަވެސް ތިން އަހަރުގެ ތެރޭގައި 5 ބިލިއަން އެސެޓް ހައްދަވާފައިވާކަން އާޒިމް ފާހަގަކުރެއްވިއެވެ. އާޒިމް ވިދާޅުވީ މިހާރުވެސް އެގޮތަށް މަސައްކަތް ކުރެއްވޭނެކަމަށާއި، ރައްޔިތުންނަށް އުފާވެރި ދިރިއުޅުމެއް ހޯދައިދިނުމަށް މަސައްކަތް ކުރައްވާނެކަމަށެވެ.
އާޒިމް ވިދާޅުވީ އިދިކޮޅު ކެންޑިޑޭޓުން މެނިފެސްޓޯ ކޮޕީކުރާ ކަމަށާއި، މެނިފެސްޓޯ ކޮޕީކުރަނީވެސް އެ ތަސައްވުރު މާބޮޑަށް ރަނގަޅުވުމުން ކަމަށެވެ. ނަމަވެސް އެބޭފުޅުންނަށް ފުރުސަތު ލިބިވަޑައިގެން، ނަތީޖާ ދެއްކެވިފައި ނުވާކަމަށް އާޒިމް ވިދާޅުވިއެވެ. އަދި ވިދާޅުވީ މޭޔަރު ކަމަށް އިންތިޚާބުކޮށްފިނަމަ ތަފާތު ފެންނާނެ ކަމަށާއި، ސިޓީ ކައުންސިލްގެ ހަޔާތުގައި ދެ އަހަރާއި ބައިން، 10 އަހަރުގެ ތަރައްގީއާއި ކުރިއެރުން ފެންނާނެ ކަމަށެވެ.
