މާލެއަށް ކުރި ވިއްސާރައިގައި ގެއްލުންވި 164 ގެއަށް ލިބުނު ގެއްލުންތައް ދެނެގަންނަނީ

އިއްޔެ މާލެއަށް ކުރި ވިއްސާރައިގައި ގެއްލުންވި 164 ގެއަށް ލިބިފައިވާ ގެންލުންތައް ވަޒަންކުރުމަށް އެސެސްމަންޓް ޓީމުތަކުން ދަނީ ހަރަކާތްތެރިވަމުން ކަމަށް ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ އެންޑީއެމްއޭއިން ބުނެފިއެވެ.

އެންޑީއެމްއޭއިން ބުނިގޮތުގައި ގެއްލުންތައް ވަޒަން ކުރުމަށް އެން.ޑީ.އެމް.އޭ އާއި އެކު ފުލުހުންނާއި، ސިފައިން، ވެމްކޯ، އަދި މޯލްޑިވިއަން ރެޑްކްރެސެންޓުން ވަނީ ބައިވެރިވެފައެވެ.

އާދިއްތަ ދުވަހު ކުރި ވިއްސާރަ އާއި ގުޅިގެން އާދިއްތަ ދުވަހުގެ ރޭގެ ނިޔަލަށް 140 ގެއަކަށް ގެއްލުންވެ 11 ގެއަކުން 54 މީހުން ވަގުތީ ހިޔާތަކަށް ބަދަލުކޮށްފައިވާ ކަމަށް އެންޑީއެމްއޭ އިން ވަނީ ބުނެފައެވެ. އެގޮތުން އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ނެޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ޗީފް އެގްޒެކެޓިވް ހިސާން ޙަސަން ވިދާޅުވީ މާލެއަށް ހޮނިހިރު ދުވަހުގެ ރޭގެ މެންދަމުން ފެށިގެން ވެހެމުން އައި ވާރޭގައި އާދީއްތަ ދުވަހުގެ މެންދުރާ ހަމައަށް 140 ގެއަކަށް އެކިވަރުގެ ގެއްލުން ލިބުނު ކަމަށެވެ.

މި ވިއްސާރަ އާއި ގުޅިގެން މާލޭގެ ގެތަކަށް ފެންވަނުމާއި، ބިމު އަޑިން ފެން އެރުމާއި، ފެން ލީކުވެފައި ހުރިކަން، ކަމާއި ގުޅުން ހުރި އިދާރާތަކުން ފާހަގަކުރެއެވެ. ގެތަކަށް ލިބުނު ގެއްލުން ދެނެގަނެ ގެއްލުން ލިބުނު ގެތަކުގައި ދިރިއުޅެމުން ދިޔަ ފަރާތްތައް އެހެން ތަންތަނަށް ބަދަލުކުރުމުގެ މަސައްކަތް ކަމާއި ބެހޭ ފަރާތްތަކުން ދަނީ ކުރަމުންނެވެ. އެ މަސައްކަތް ކުރަމުން ދަނީ ޑިޒާސްޓަރ މެނޭޖްމަންޓް އޮތޯރިޓީ އާއި ރެޑް ކްރެސެންޓާއި ފުލުހުންނާއި ސިފައިން އަދި އެޗްޕީއޭއާއި ސިޓީ ކައުންސިލް ގުޅިގެންނެވެ. އަދި ބައެއް ކުންފުނިތަކުން ދަނީ މި މަސައްކަތަށް އެހީތެރިކަން ފޯރުކޮށްދެމުންނެވެ.

އާދިއްތަ ދުވަހު ލިބުނު ގެއްލުންތަކުގެ ތެރޭގައި 12 ގެއަކަށް އެކިވަރުގެ ގެއްލުންތައް ވަނީ ވެފައެވެ. އާދިއްތަ ދުވަހު 63 މީހަކު އެހެން ރައްކާތެރި ތަންތަންނަށް ބަދަލުކުރި ކަމަށް އެންޑީއެމްއޭ އިން ވަނީ ބުނެފައެވެ. އެގޮތުން 28 ކޮޓަރި ހޯދާ ބަދަލުކުރުމުގެ މަސައްކަތްކޮށްފައިވެއެވެ. އެ މަސައްކަތް ކުރީ އެމްޓީސީސީގެ ބަސްތައް ބޭނުންކޮށްގެންނެވެ.

މި ވިއްސާރަ އާއި ގުޅިގެން ލިބުނު ގެއްލުންތަކުގެ ތަފްސީލީ ރިޕޯޓެއް 2 ދުވަހުގެ ތެރޭގައި އެކުލަވާނެ ކަމަށް ވެސް އެ އިދާރާއިން ވަނީ ބުނެފައެވެ. މޫސުމާއި ބެހޭ ޤައުމީ އިދާރާ އިން ވަނީ މި ހަފްތާގެ ކުރިއަށް އޮތް ދުވަސްތަކުގައި ވެސް ވާރޭ ވެހޭނެކަމަށް ލަފާކޮށްފައެވެ. އަދި ވިއްސާރަ އަލިވިހާ އަވަހަށް ތަންތަނަށް ގޮސް ހިފާ ގެންގުޅޭ ތަކެތި އަދި ސްޓަރކްޗަރއަށް ލިބިފައިވާ ގެންލުން ބަލާފައި ސަރުކާރުން އެކަމާއި ގުޅޭ އެހީ ފޯރުކޮށްދޭނެ ކަމަށް އެންޑީއެމްއޭ އިން ވަނީ ބުނެފައެވެ.

މިހާރު ކުރަމުންދާ ވިއްސާރާގައި ރާއްޖޭގެ އެހެން ހިސާބުތަކަށް ވެސް ވަނީ ގެއްލުންވެފައެވެ. އެގޮތުން އައްޑޫ ސިޓީ އާއި ފުވައްމުލައް ސިޓީގެ އިތުރުން ގެއްލުން ލިބުނުކަމުގެ ރިޕޯޓުތައް ލިބިފައިވާ ރަށްތަކުގެ ތެރޭގައި ފ. ނިލަންދޫ، ކ.ގުރައިދޫ، ލ.ގަން އަދި ފޮނަދޫ އަދި ކ. ގުރައިދޫ ހިމެނެއެވެ.