ފުށިދިއްގަރުފަޅަށް މާލޭ ރައްޔިތުން ނުގެންގޮސް މިހާރުން މިހާރަށް ފްލެޓްތައް ހަވާލުކުރުމަށް ޞާލިހު ރައީސް މުއިއްޒަށް ގޮވާލައްވައިފި

މާލޭގެ ރައްޔިތުންނަށް އެމްޑީޕީ ސަރުކާރުގައި ހަވާލުކުރި ގޯތިތަކާއި ފްލެޓްތައް މިހާރުން މިހާރަށް ހަވާލުކޮށް ފުށިދިއްގަރުފަޅަށް މާލޭ ރައްޔިތުން ނުގެންދިޔުމަށް ކުރީގެ ރައީސް އަދި އެމްޑީޕީގެ ރައީސް އިބްރާހީމް މުހައްމަދު ޞާލިހު ރައީސުލްޖުމްހޫރިއްޔާ ޑރ މުހައްމަދު މުއިއްޒަށް ގޮވާލައްވައިފިއެވެ.

މޭޔަރކަމުގެ ގޮނޑި އެމްޑީޕީގެ ޓިކެޓްގައި ނިކުމެވަޑައިގެންނެވި އާދަމް އާޒިމް ކާމިޔާބުކުރެއްވުމާއި ގުޅިގެން މާލޭގެ ރައްޔިތުންނަށް ޝުކުރު އަދާކުރުމަށް އެމްޑީޕީން ސަލްޓަންޕާކުގައި ބޭއްވި ޖަލްސާގައި ވާހަކަފުޅުދައްކަވަމުން ރައީސް ޞާލިހު ވިދާޅުވީ މާލޭ ރައްޔިތުން މިއަދު މެސެޖެއް ދީފިކަމަށެވެ. 71 އިންސައްތަ ރައްޔިތުން ސަރުކާރަށް ނޫނެކޭ ބުނެފިކަމަށް ޞާލިހު ވިދާޅުވިއެވެ.

ވެރިކަމަށް އައިތާ ދެ މަސްނުވަނީސް މާލޭ ރައްޔިތުން މިސަރުކާރުގެ ސިޔާސަތުތަކަށް ނޫނެކޭ ބުނީ ސަބަބުތަކެއް ނެތިއެއް ނޫންކަމަށް ޞާލިހު ވިދާޅުވިއެވެ.

ރައީސް ޞާލިހު ރައީސް މުއިއްޒަށް ދެން ގޮވާލެއްވީ އެމަނިކުފާނުގެ ވެރިކަމުގައި މާލޭގެ ރައްޔިތުންނަށް ދިން ގޯއްޗާއި ފްލެޓް ލަސްނުކޮށް ހަވާލުކުރުމަށެވެ. ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި މާލޭގެ ރައްޔިތުންގެ ރުހުމެއް ބޭނުންވާކަމަށްވާނަމަ އެކަން ކުރުމަށް ރައީސް ޞާލިހު ގޮވާލެއްވިއެވެ.

އެހެންނޫންކަމަށްވާނަމަ އަނެއްކާވެސް ރައްޔިތުން މިސަރުކާރަށް ނޫނެކޭ ބުނާނެކަމަށް ޞާލިހު ވިދާޅުވިއެވެ.

ރައީސް ޞާލިހު ވިދާޅުވީ މިސަރުކާރު ގެނައީ މަޑުމައިތިރިކަމާއެކީގައި ރައްޔިތުންގެ އަޑުއަހައިގެން ވެރިކަން ކުރުމަށްކަމަށެވެ. އެކަން އެގޮތަށް ނުކުރާނަމަ ރައްޔިތުން ނިކުމެ ސަރުކާރު ޖަވާބުދާރީ ކުރުވާނެކަމަށާއި ގެންނަންޖެހޭ ބަދަލު ގެންނާނެކަމަށް ޞާލިހު ވިދާޅުވިއެވެ.