ހުޅުމާލޭ 3 ވަނަ ފިޔަވަހީގެ ބިން ހިއްކުމުގެ ދެވަނަ ފިޔަވަހީގެ މަސައްކަތް މި ހަފުތާގައި ފަށަނީ

ހުޅުމާލޭ 3 ވަނަ ފިޔަވަހީގެ ބިން ހިއްކުމުގެ ދެވަނަ ފިޔަވަހީގެ މަސައްކަތް މިހަފުތާތެރޭގައި ފަށާނެ ކަމަށް އާބަންކޯއިން ބުނެފިއެވެ.

އާބަންކޯއިން ވަނީ، ހުޅުމާލޭ 3 ވަނަ ފިޔަވަހީގެ ބިން ހިއްކުމުގެ ދެވަނަ ފިޔަވަހީގެ މަސައްކަތް މި ހަފުތާތެރޭގައި ކުރިއަށް ގެންދިއުމަށް ހަމަޖެހިފައިވާތީ، އެ ސަރަހައްދުގެ ފަޅުތެރޭގައި އަޅާފައިވާ އުޅަނދުތައް ނެގުމަށް އަންގާފައެވެ. ނަމަވެސް އަމަލީ މަސައްކަތް ފަށާނެ ވަކި ދުވަހެއް އާބަންކޯއިން ހާމަކޮށްފައެއް ނުވެއެވެ.

އެގޮތުން ހުސްކުރަންޖެހޭ ސަރަހައްދަކީ އެކުލަވާލެވިފައިވާ ޗާޓުގެ ސްޓޭޖް 2، ސައިޓް ބީއެވެ.

އާބަންކޯއިން ބުނީ ނެގޭ، އުޅަނދުތައް އެ ސަރަހައްދުގެ ބޭރުގައި އެޅުމުގެ ފުރުސަތު ފަހިކޮށްދީފައި ވާކަމަށެވެ.

މިކަމާ ގުޅިގެން އިތުރު މައުލޫމާތު ބޭނުންވާނަމަ، އާބަންކޯގެ ހޮޓްލައިން 1516އަށް ގުޅައި މައުލޫމާތު ސާފުކުރުމަށް ވަނީ އެދިފައެވެ.

މި މަޝްރޫއަކީ މާލޭ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށް ކުރީގެ ސަރުކާރުން ފެށި މަޝްރޫއެކެވެ. މިމަޝްރޫއުގެ ދަށުން، ހުޅުމާލެ ފޭސް 3ށް 63 ހެކްޓަރުގެ ބިން އިތުރުކުރުމަށްވަނީ ހަމަޖެހިފައެވެ.

މި މަސައްކަތް ކުރަމުންދަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ޕްރައިވެޓް ލިމިޓެޑް (ސީއެމްސީ)ންނެވެ.