އީގަލްސް ޓީމަށް މޯހަންގެ އޮތީ ތައުރީފް

ފަހު މެޗުގައި މާޒިޔާ އަތުން ބަލިވެ, ލީގު ނުލިބުނަސް އީގަލްސްގެ ކުޅުންތެރިންނާއި މުޅި ޓީމަށް ތައުރީފާއި ޝުކުރު ނޫން އެއްޗެއް ނެތްކަމަށް ކޯޗު މުޙައްމަދު ޝިޔާޒު (މޯހަން) ބުނެފިއެވެ.

އިހުސާން އަބުދުލްޣަނީ (ސާންތި) ސިއްހީ ސަބަބަކާ ގުޅިގެން ޓީމާ ވަކިވާން ޖެހުމުން އީގަލްސްއާ ހަވާލުވި ކޯޗު މޯހަން ބުނީ ބުނެނުދެވޭނެ އުނދަގޫ އެތައް ހާލަތެއްގެ ތެރެއިންވެސް އީގަލްސް ކުޅުންތެރިންގެ ފަރާތުން ފެނުނީ ވަރަށް ރަނގަޅު އެޓިޓިއުޑެއް ކަމަށެވެ. ކްލަބް އޮތް ހާލަތަށް ބަލާއިރު ކުޅުންތެރިން ކުރި މަސައްކަތާމެދު ވަރަށް, ވަރަށް ފަޚުރުވެރި ވާކަމަށް މޯހަން ބުންޏެވެ. އުނދަގޫ ހާލަތުގައިވެސް ބަރާބަރަށް ޕްރެކްޓިސް އަށް އައިސް, މޮޅުވާން ކުޅުންތެރިން މުޅި ލީގުގައިވެސް މަސައްކަތް ކުރިކަން މޯހަން ފާހަގަކުރިއެވެ.

ގައުމީ ޓީމްގެ ތޭރަ ސާދަ ކުޅުންތެރިންނާއި, ބިދޭސީ ކުޅުންތެރިންނާއެކު ވަރަށް ވަރުގަދަކޮށް މާޒިޔާއާ ދެކޮޅަށް ފަހު މެޗަށް ނުކުތީވެސް މޮޅުވެ ލީގު ހޯދަން ކަމަށާއި, އެކަމަށް ކުރަންޖެހޭ ހުރިހާ މަސައްކަތެއްވެސް ކުޅުންތެރިން ކުރިކަމަށް މޯހަން ބުންޏެވެ. އެގޮތުން ބޭނުންވި އެޓޭކިންގ ގޭމް ކުޅެ, ފުރުޞަތުތައްވެސް ހޯދިކަން ފާހަގަކުރިއެވެ.

މޯހަން ބުނީ ލީގުގައި އީގަލްސް އަށް ފައިޓްކުރެވިއްޖެ ކަމަށެވެ. މުޅި ލީގުގައި ވެސް އޭނާގެ ޓީމުން ވަރަށް އެޓޭކިންގ ފުޓްބޯޅައެއް ކުޅުނުކަންވެސް މޯހަން ފާހަގަކުރިއެވެ. ލީގުގައި އީގަލްސް ބަލިވީ ހަމައެކަނި ފަހު މެޗުންނެވެ. އެމެޗުންވެސް ބަލިވީ 1-0 ނެވެ. އެއީވެސް ޕެނަލްޓީ އަކުން މާޒިޔާއިން ޖެހި ލަނޑެކެވެ.