މިފްކޯ ބައިވެރިވެގެން އުފެއްދި ކުންފުނީގެ މަގުސަދު ހާސިލުނުވެ 2011ން 2016ށް 44.5 މިލިއަން ރުފިޔާގެ ގެއްލުން
އެމްއެމްޕީ އުފެއްދި މަގުސަދު ހާސިލްވާގޮތަށާއި އެ ކުންފުންޏަކީ ފައިދާވާ ކުންފުންޏެއްގެ ގޮތުގައި ކުންފުނި މެނޭޖްކޮށް ހިންގާފައި ނުވޭ
މިފްކޯއާއި ބައިވެރިވެގެން އުފެއްދި ކުންފުނިން އެތައް މިލިއަން ރުފިޔާގެ ގެއްލުން ލިބިފައިވޭ
މިފްކޯ ބައިވެރިވެގެން މެރިން މޯލްޑިވްސް ޕްރޮޑަކްޓްސް ޕްރައިވެޓް ލިމިޓެޑް (އެމްއެމްޕީ) އުފެއްދި މަގުސަދު ހާސިލްނުވެ އެ ކުންފުންޏަށް 44.5 މިލިއަން ރުފިޔާގެ ގެއްލުންވެއްޖެއެވެ.
މޯލްޑިވްސް އިންޑަސްޓްރިއަލް ފިޗަރީސް ކޮމްޕެނީ ލިމިޓެޑް (މިފްކޯ) ބައިވެރިވާ ޖޮއިންޓް ވެންޗަރ ކުންފުނިތަކާ ގުޅޭ ހާއްސަ އޮޑިޓް ރިޕޯޓުގައި ބުނެފައިވަނީ އެމްއެމްޕީ އުފައްދާފައިވަނީ ތައިލެންޑުގެ އެމްއެމްޕީ އިންޓަރނޭޝަނަލް ކޮމްޕެނީ ލިމިޓެޑް (އެމްއެމްޕީ އިންޓަރނޭޝަނަލް) އާއި ރާއްޖޭގެ އަމިއްލަ ކުންފުންޏެއް ކަމުގައިވާ އައިއޯއެފް ކޯޕަރޭޝަން ޕްރައިވެޓް ލިމިޓެޑް (އައިއޯއެފް) އަދި މިފްކޯ ގުޅިގެން ޖޮއިންޓް ވެންޗަރ ކުންފުންޏެއްގެ ގޮތުގައި 2011 ވަނަ އަހަރުއެވެ.
މި ކުންފުނި ރަޖިސްޓްރީކުރުމަށްފަހު 1 އަހަރު ދުވަހުގެ ތެރޭގައި މިފްކޯގެ ހިއްސާގެ ތެރެއިން 25 އިންސައްތަ ހިއްސާ އާންމުކޮށް ވިއްކުމަށް ހަަޖެހިފައިވާކަން، އެ ކުންފުނި އުފެއްދުމުގެ ހުއްދަ ދީފައިވާކަން އެންގުމުގެ ގޮތުން 29 އޮގަސްޓް 2011 ފޮނުވި ރައީސް އޮފީހުގެ ސިޓީގައި ބަޔާންކޮށްފައިވާ ކަމަަށެވެ.
މިފްކޯ ބައިވެރިވެގެން އެމްއެމްޕީ އުފެއްދި މަގުސަދުގެ ތެރޭގައި، ދިވެހިރާއްޖޭގެ މާކެޓަށާއި ބޭރުގެ މާކެޓްތަކަށް މަސް ވިއްކުމާއި، ރިސޯޓް އައިލެންޑް އޮޕަރޭޓް ކުރުމާއި، ފަތުރުވެރިކަމުގެ ވިޔަފާރި ކުރުން އަދި ކޮންސްޓްރަކްޝަންގެ މަސައްކަތް ކުރުން ހިމެނެއެވެ. މީގެ އިތުރަށް ކުންފުނީގެ ބިޒްނަސް ޕްލޭންގައި ކުންފުނިން ކުރަން ކަނޑައަޅާފައިވާ ކަންތައްތަކުގެ ތެރޭގައި، ދުވާލަކު 5 ޓަނުގެ ކަނޑުމަސް ބަންދުކުރާ ކާރުހާނާއަކާއި 10 ޓަނުގެ ޓޫނާ ލޮއިންސް އުފެއްދޭވަރުގެ ކާރުހާނާއެއް ބިނާކުރުމާއި، ކަނޑު ބޯޓުތައް މަރާމާތުކުރާ މަރުކަޒެއް ގާއިމްކުރުމާއި، އެއްފަހަރާ 1300 މެޓްރިކް ޓަނުގެ ތެޔޮ ރައްކާކުރެވޭ ވަސީލަތްތައް ގާއިމްކުރުމާއި މަހުގެ ބާވަތްތައް ޓެސްޓްކުރުމަށް ލެބޯޓަރީއެއް އުފެއްދުމާއި ދުވާލަކު 150 ޓަނުގެ އައިސް އާއި 100 ޓަނުގެ ފެން އުފައްދާ ވިއްކުމާއި އަދި 1200 ޓަނުގެ ފެން ރައްކާކުރެވޭވަރުގެ ވަސީލަތްތައް ގާއިމްކުރުން ހިމެނެއެވެ.
އެމްއެމްޕީގެ ބިޒްނަސް ޕްލޭނުގައި އެމްއެމްޕީ ހިންގަންފަށާ ދުވަހުން ފެށިގެން 5 އަހަރު ދުވަހުގެ ތެރޭގައި މަސް ވިއްކައިގެން 85.2 މިލިއަން ޑޮލަރު ނުވަތަ 1.3 ބިލިއަން ރުފިޔާގެ އާމްދަނީއެއް ލިބޭނެކަމަށް ވެސް ލަފާކޮށްފައިވެއެވެ.
ނަމަވެސް، އެމްއެމްޕީ އުފެއްދި މަގުސަދު ހާސިލްވާގޮތަށާއި އެ ކުންފުންޏަކީ ފައިދާވާ ކުންފުންޏެއްގެ ގޮތުގައި ކުންފުނި މެނޭޖްކޮށް ހިންގާފައި ނުވުމުން 2011 ވަނަ އަހަރުން ފެށިގެން 2016 ވަނަ އަހަރާ ހަމައަށް ޖުމްލަ 44.5 މިލިއަން ރުފިޔާގެ ގެއްލުން ވެފައިވެއެވެ. މީގެ އިތުރަށް އެމްއެމްޕީ ހިންގުމަށް މިފްކޯއިން ހަރަދުކުރަމުން ގޮސްފައިވާއިރު އެމްއެމްޕީ އިން މިފްކޯއަށް ދައްކަންޖެހޭ 13 މިލިއަން ރުފިޔާ މިފްކޯއަށް އަނބުރާ ލިބިފައިނުވާކަމަށް ވެސް އޮޑިޓުގައި ބުނެފައިވެއެވެ.
އެމްއެމްޕީ ހިންގައިގެން ކުންފުންޏަށް ގެއްލުންވުމަށް މެދުވެރިވެފައިވާ މައިގަނޑު ސަބަބުތަކުގެ ތެރޭގައި އެމްއެމްޕީ ހިންގުމަށް ބޭނުންވާ ފައިސާ ހިއްސާދާރުންގެ ފަރާުން ނުލިބުމާއި، އެމްއެމްޕީގެ ބޯޑު ބައްދަލުވުންތައް ގަވާއިދުން ނުބޭއްވުމާއި، ބިޒްނަސް ޕްލޭނުގައި ކުރަން ކަނޑައެޅި ކަންކަން ކޮށްފައި ނުވުމާއި އަދި ހިއްސާދާރެއްގެ ހައިސިއްޔަތުންނާއި އެންމެ ގިނައިން ކުންފުންޏަށް ހޭދަކޮށްފައިވާ ފަރާތެއްގެ ހައިސިއްޔަތުން އަޅަންޖެހޭ ފިޔަވަޅުތައް މިފްކޯއިން އަޅާފައި ނުވުން ކަމަށް ބުނެފައިވެއެވެ.
