މަސައްކަތްތެރިންގެ ހައްޤުތަކާއި ގުޅޭގޮތުން ރައްޔިތުންގެ މަޖިލީހުން ފާސްކުރި ދެ ބިލުގެ ސަބަބުން މަސައްކަތްތެރިންނަށް ސަރުކާރާއި މަޝްވަރާކޮށްގެން ކަންކަން ހައްލުކުރުމުގެ ޤާނޫނީ ރައްކާތެރިކަން ލިބިގެންދާނެ ކަމަށް މޯލްޑިވްސް ޓްރޭޑް ޔޫނިއަން ކޮންގްރެސްގެ ރައީސް މައުރޫފް ޒާކިރު ވިދާޅުވެއްޖެއެވެ.

މަސައްކަތްތެރިންގެ ހައްގުތަކާ ގުޅޭ މުހިންމު ދެ ބިލެއް ރައްޔިތުންގެ މަޖިލީހުން ވަނީ ފާސްކޮށްފައެވެ. އެއީ މަސައްކަތުގެ މާހައުލުގެ ސަލާމަތާއި ސިއްހީ ރައްކާތެރިކަމުގެ ބިލާއި، އިންޑަސްޓްރިއަލް ރިލޭޝަންސްއާ ބެހޭ ބިލެވެ.

މި ދެ ބިލު ފާސްވުމާއި ގުޅިގެން މޯލްޑިވްސް ޓްރޭޑް ޔޫނިއަން ކޮންގްރެސް އިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މައުރޫފް ވަނީ މި ދެ ބިލް ފާސްކުރުމަށް އެ ޔޫނިއަނުން ކުރި ބުރަ މަސައްކަތަށް އަލިއަޅުވާލާ ވާހަކަދައްކަވާފައެވެ. އިންޑަސްޓްރިއަލް ރިލޭޝަންސާއި ގުޅޭ ބިލެއް އެންމެ ފުރަތަމަ މަޖިލީހަށް ހުށައަޅައި މަސައްކަތް ފަށާފައިވަނީ 2013 ވަނަ އަހަރުއެވެ. ނަމަވެސް ދިމާވި އެކިއެކި ކަންކަމާއި ގުޅިގެން މި ބިލް ފާސްވުން ފަސްވެގެންދިޔަކަން ފާހަގަކުރެއްވިއެވެ.

މިގޮންޖެހުންތަކާއެކު މި ދެ ބިލު ފާސްވެގެން ދިޔުމާއި ގުޅިގެން މަސައްކަތްތެރިންގެ ހައްގުތައް ގާނޫނީގޮތުން ރައްކާތެރިކަން ލިބިގެންދާނެކަމަށެވެ.

މައުރޫފް ވިދާޅުވީ، ރާއްޖޭގައި މިވަގުތު ހަރަކާތްތެރިވަމުންދާ މަސައްކަތްތެރިންގެ ޖަމިއްޔާތަކަށް ދިމާވާ އެންމެ ބޮޑު ގޮންޖެހުމަކީ ވަޒީފާދޭ ފަރާތްތަކުން އެ ޖަމިއްޔާތައް އެއީ ވަޒީފާ އަދާ ކުރާ ފަރާތްތަކުގެ މަސައްކަތުގައި ދިމާވާ ކަންކަން ހައްލު ކުރުމަށްޓަކައި ވާހަކަދައްކަން ޖެހޭ ފަރާތެއްކަމަށް ގަބޫލުނުކުރުންކަމަށެވެ.