މެންބަރު ޝިފާޢުއަށް މަރުގެ އިންޒާރުދިން މައްސަލަ ބަލައި ތަހުގީގުކޮށް ފިޔަވަޅު އެޅުމަށް އެމްޑީޕީން ގޮވާލައިފި
ދުސްތޫރީ ޒިންމާއަދާކުރުމުން މަރުގެ އިންޒާރުދީ އެފަދަ ލާއިންސާނީ ކުށެއްގެ ޝިކާރައަކަށް ރައްޔިތުންގެ މަޖިލީހުގެ މެންބަރުން ވެގެން ދިއުމަކީ ކަންބޮޑުވާކަމެއްގެ ގޮތުގައި ވަނީ ބުނެފައި
ރައީސް އަޒުލުކުރުމަށް އެދި ޕީޖީއަށް ހުށަހަޅާނެކަމަށް ވިދާޅުވުމުން ފޭސްބުކުގައި މީހަކު ވަނީ މެންބަރު ޝިފާއު ކަރު ކަނޑާލަންޖެހޭނެކަމަށް ބުނެ އިންޒާރުދީފައި
އިހަވަންދޫ ދާއިރާގެ މެންބަރު މުހައްމަދު ޝިފާޢުއަށް މަރުގެ އިންޒާރުދިން މައްސަލަ ބަލައި ތަހުގީގުކޮށް ފިޔަވަޅު އެޅުމަށް އެމްޑީޕީން ގޮވާލައިފިއެވެ.
އެމްޑީޕީން ނެރުނު ނޫސްބަޔާނެއްގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ރައްޔިތުންގެ މަޖިލީހުގެ އިއްޒަތްތެރި މެންބަރުންނަށް އެ މެންބަރުންގެ ދުސްތޫރީ އަދި ގާނޫނީ ޒިންމާއާއި މަސްއޫލިއްޔަތު އަދާކުރުމުގެ ތެރެއިން އެ މެންބަރުން ހާމަކުރައްވާ ހިޔާލުތަކާއި، މަޖިލީހުގައި ކުރައްވާ މަސައްކަތްތަކާ ގުޅިގެން މަރުގެ އިންޒާރުދިނުން އެ ޕާޓީން ހަރު އަޑުން ކުށްވެރިކުރާ ކަމަށެވެ.
އެގޮތުން ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުޙައްމަދު ޝިފާޢުއަށް މަރުގެ އިންޒާރު ދީފައިވާތީ އެކަން ބަލައި ތަހުގީގުކޮށް ފިޔަވަޅު އެޅުމަށް ދިވެހި ފުލުހުންނަށް އެމްޑީޕީން ވަނީ ގޮވާލާފައެވެ.
އަދި ރައްޔިތުންގެ މަޖިލީހުގައި ސިޔާސީ އިދިކޮޅު ޕާޓީއަކުން ކުރާނެ އެންމެ މާތް އެއް ޒިންމާއަކީ ސަރުކާރު ޖަވާބުދާރީކުރުވުން ކަމުގައިވީހިނދު, އެ ދުސްތޫރީ ޒިންމާއަދާކުރުމުން މަރުގެ އިންޒާރުދީ އެފަދަ ލާއިންސާނީ ކުށެއްގެ ޝިކާރައަކަށް ރައްޔިތުންގެ މަޖިލީހުގެ މެންބަރުން ވެގެން ދިއުމަކީ އެމްޑީޕީން ކަންބޮޑުވާކަމަށް ވަނީ ބުނެފައެވެ.
އަދި ރައްޔިތުންގެ މަޖިލީހުގެ މެންބަރުންނަކީ އެ މެންބަރުންނަށް ގާނޫނީ ގޮތުން ލިބިދޭ ހާއްސަ އިމްތިޔާޒުތަކުގެ ތެރެއިން ސަލާމަތާ ރައްކާތެރިކަން ފޯރުކޮށްދޭންޖެހޭ ބަޔަކަށްވާތީ، ރައްޔިތުންގެ މަޖިލީހުގެ އެއްމެހާ މެންބަރުންގެ ރައްކާތެރިކަން ކަށަވަރުކޮށްދިނުމަށް ސަލާމަތީ ޚިދުމަތްތަކަށް އެމްޑީޕީގެ ފަރާތުން ގޮވާލާފައިވެއެވެ.
މެންބަރު ޝިފާއުއަށް މަރުގެ އިންޒާރު ދީފައިވަނީ ރައީސް ޑރ. މުހައްމަދު މުއިއްޒުގެ ސަރުކާރަށް ތާއިދުކުރާ މީހެކެވެ. އެއީ ނ. މަނަދޫ މީހެއްކަމަށް ވެސް ރާއްޖެއެމްވީއަށް ވަނީ އެނގިފައެވެ. އޭނާ ވަނީ އެމްޑީޕީގެ މަޖިލިސް މެންބަރުންގެ އެކި އެކި ވާހަކަތަކާއި ގުޅިގެން ހަޑިހުތުރު ބަހުންނާއި، ތަފާތު އެކި ގޮތްގޮތަށް އިންޒާރުވެސް ދީފައެވެ.
