ސަރުކާރުން އަލަށް އުފެއްދި ވުޒާރާތަކުގެ މެންޑޭޓް ރައްޔިތުންގެ މަޖިލީހުން ފާސްކުރަން ފޮނުވާފައި ނުވާތީ، މަޖިލީހަށް ހުށަހެޅި ނިޒާމީ ނުކުތާ ބަލައިގަނެ، ސަރުކާރުގެ ވުޒާރާތަކުގެ މެންޑޭޓް ނުފޮނުވާތީ އެޖެންޑާއިން ވަޒީރުންނަށް ރުހުން ދިނުމުގެ މައްސަލަ އަނބުރާ ކޮމިޓީ އަށް ފޮނުވައިފިއެވެ.

މަޖިލިސް ފެށުމާއި އެކު ތުޅާދޫ ދާއިރާގެ މެމްބަރު ހިސާން ހުސައިން ވަނީ ނިޒާމާއި ބެހޭ މައްސަލަ އެއް ނަންގަވާފައެވެ. އޭނާ އެ ނިޒާމީ ނުކުތާ ނެންގެވީ ހޯމަ ދުވަހުގެ އެޖެންޑާގައި ހިމަނާފައިވާ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 129 ވަނަ މާއްދާގެ (ހ)ގެ ދަށުން ވަޒީރުންގެ މަޖިލީހަށް ރައީސުލްޖުމްހޫރިއްޔާ ޢައްޔަންކުރައްވާފައިވާ 22 ވަޒީރުންނަށް ރުހުންދިނުމުގެ މައްސަލަ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާކޮމިޓީން ދިރާސާކޮށް ނިންމިގޮތުގެ ރިޕޯޓާއި ގުޅޭގޮތުންނެވެ.

އެ ނިޒާމީ ނުކުތާ ބަލައިގަންނަން މަޖިލީހުގެ ރައީސް މުހައްމަދު އަސްލަމް ނިންމެވީ އެކަމާއި މެދު މަޖިލީހުގެ މެޖޯރިޓީ ލީޑަރާއި މައިނޯރިޓީ ލީޑަރާއި އެކު މަޝްވަރާކުރެއްވުމަށް ފަހުގައެވެ. އެ މަޝްވަރާއަށްޓަކާ މަޖިލިސް ފަސް މިނިޓުގެ ބްރޭކަކަށް މެދުކަނޑާލިއެވެ. އެގޮތުން ކުރި މަޝްވަރާތަކަށް ފަހު ސަރުކާރުގެ ވުޒާރާތަކުގެ މެންޑޭޓް ނުފޮނުވާތީ އެޖެންޑާއިން ވަޒީރުންނަށް ރުހުން ދިނުމުގެ މައްސަލަ އުނިކޮށްފައިވާކަމަށް އަސްލަމް އިޢުލާންކުރެއްވިއެވެ. އަދި އެ މައްސަލަ ސަރުކާރުގެ މަސްޢޫލިއްޔަތު އަދާކުރާ މިންވަރުބަލާ ކޮމިޓީ އަށް ވަނީ ފޮނުވާފައެވެ. އެ މައްސަލަ ކޮމިޓީ އަށް ފޮނުވީ 200 ވަނަ މާއްދާ އާއި އެއްގޮތަށް އެ ރިޕޯޓް އެކުލަވާލުމަށްޓަކައެވެ. މަޖިލީހުގެ ރައީސަށް އެ މައްސަލަ އެޖެންޑާއިން އުނި ނުކުރެވޭނެ ކަމަށް ފޮނަދޫ ދާއިރާގެ މެމްބަރު މޫސާ ސިރާޖް ވަނީ ނިޒާމީ ނުކުތާއެއް ނަންގަވާފައެވެ. އެހެންކަމުން އަސްލަމް ވަނީ އެޖެންޑާއިން އެ މައްސަލަ އުނިކުރީ ނޫން ކަމަށާއި އެ ރިޕޯޓް އިސްލާހުކުރުމަށް ކޮމިޓީ އަށް ފޮނުއްވީކަމަށް ވެސް ވިދާޅުވެފަވެ.

މަޖިލީހުގައި ހޯމަ ދުވަހު ހިސާން ވަނީ ވުޒާރާތަކުގެ މެންޑޭޓް ފާސްކުރަން ފޮނުވާފައި ނެތީސް ވަޒީރުންނަށް ރުހުން ދިނުމުގެ މައްސަލައިގެ ރިޕޯޓް މަޖިލީހުގެ ކަމާ ބެހޭ ކޮމިޓީން ފާސްކުރީ ގަވައިދާ ހިލާފަށް ކަމަށް ފާހަގަކުރައްވާފައެވެ. އެ މައްސަލަ އެޖެންޑާގައި ހިމަނާފައި ވަނީ މަޖިލީހުގެ ޤަވާއިދުގެ 200ވަނަ މާއްދާގެ ވ އަދި ރ، ކ އަދި އ ގައި ބަޔާންކުރާ ހަމަތަކާއި ޚިލާފަށް ކަމަށް ހިސާން ވިދާޅުވިއެވެ. އެހެންކަމުން މިހާރު ރިޕޯޓް އޮތީ އެ އުސޫލާއި ޚިލާފަށް ކަމަށް ވެސް އަސްލަމް ވިދާޅުވިއެވެ. އަދި ރިޕޯޓްގައި ފުރިހަމަކުރަން ޖެހޭ ކަންކަން ފުރިހަމަކޮށްފައި ނުވާ ކަމަށް އަސްލަމް ވިދާޅުވިއެވެ.