ސައުދީ ޕްރޯ ލީގުގައި އަލް ތަޢާވޫނާ ދެކޮޅަށް ކުޅުނު މެޗުން ވެސް އަލް އިއްތިފާގު ބަލިވެއްޖެ އެވެ.

ލީގުގައި އަލް ތަޢާވޫނުން ވަނީ 2-0 އިން އަލް އިއްތިފާގުގެ މައްޗަށް ކުރި ހޯދައިފަ އެވެ. ލީގުގައި އަލް އިއްތިފާގަށް މޮޅެއް ނުހޯދި ހަ މެޗު ނިމުނީ އެވެ. އެންމެ ފަހުން ލީގުގައި އެ ޓީމަށް މޮޅެއް ހޯދިފައި ވަނީ އޮކްޓޫބަރު މަހުގެ 28 ވަނަ ދުވަހު އަލް ވެހްދާ ދެކޮޅަށް ކުޅުނު މެޗުންނެވެ. އޭގެ ފަހުން ލީގުގައި ކުޅުނު ހަ މެޗުގެ ތެރެއިން ހަތަރު މެޗުން ވަނީ އެއްވަރުވެފަ އެވެ. އަނެއް ދެ މެޗުން ވަނީ ބަލިވެފަ އެވެ.

އަލް އިއްތިފާގާ ދެކޮޅަށް ކުޅުނު މެޗުގައި އަލް ތަޢާވޫނުން ލަނޑު ޖަހައި ލީޑު ނެގީ ފުރަތަމަ ހާފުގެ 41 ވަނަ މިނެޓުގަ އެވެ. އެ ޓީމަށް ލިބުނު ޕެނަލްޓީއެއް ކާމިޔާބުކޮށްގެން ލީޑު ނަގައިދިނީ އަޝްރަފް އަލް މަހުދީ އެވެ. އެ ޓީމުގެ ދެ ވަނަ ލަނޑު ޖަހާފައި ވަނީ ދެ ވަނަ ހާފުގަ އެވެ. މެޗުގެ 63 ވަނަ މިނެޓުގައި އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ މަތެއުސް ކަސްޓްރޯ އެވެ. އޭގެ ކުރިން ލީގުގައި އަލް ފެއިހާއާ ދެކޮޅަށް ކުޅުނު މެޗުގައި ވެސް ކަސްޓްރޯ ވަނީ ލަނޑު ޖަހައިފަ އެވެ.

އަލް އިއްތިފާގު އަތުން ހޯދި މޮޅާއެކު، އަލް ތަޢާވޫން އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ކުޅުނު 17 މެޗުން 34 ޕޮއިންޓު ހޯދައިގެންނެވެ. ހަމަ އެ އަދަދަށް މެޗު ކުޅެގެން ތިން ވަނައިގައި އަލް އަހްލީ ސައުދީ އަށް ވެސް ލިބެނީ 34 ޕޮއިންޓެވެ. އަލް އަހްލީ ސައުދީ ކުރި ހޯދަނީ ލަނޑުންނެވެ. ލީގުގައި ދެން އަލް ތަޢާވޫނަށް އޮންނާނީ އަލް ފާތެހާ ދެކޮޅަށް ކުޅޭ މެޗެވެ.