3 ވަނަ ކުއާޓަރުގައި ފުލުހަށް 3120 މައްސަލަ، ގިނައީ ވައްކަމުގެ މައްސަލަތައް!
މާލެއިން 2854 މައްސަލަ ހުށަހެޅި
ފުލުހުން ބޭނުން ކުރާ ޓޭޒަރ ގަން ދައްކާލަނީ
މިއަހަރުގެ ތިންވަނަ ކުއާޓަރުގައި ދިވެހި ފުލުހުންގެ ޚިދުމަތަށް 3120 މައްސަލަ ހުށަހެޅި ކަމަށް އެ އިދާރާގެ ތަފާސްހިސާބުތަކުން ދައްކައިފިއެވެ.
ފުލުހުން އާއްމު ކުރި ޖުލައި، އޮގަސްޓް އަދި ސެޕްޓެމްބަރު މަހުގެ ތަފާސްހިސާބުތަކުން ދައްކާ ގޮތުގައި އެންމެ ގިނައީ މާލެއިން ހުށަހެޅި މައްސަލަތަކެވެ. އެގޮތުން، ޖުމްލަ މުޅި ރާއްޖެއިން 3120 މައްސަލަ ހުށަހަޅާފައިވާއިރު މާލެއިން އެކަނި 2854 މައްސަލަ ވަނީ ހުށަހަޅައިފައެވެ. ކުޅުދުއްފުށި ސިޓީން 56 މައްސަލަ ހުށަހެޅިއިރު ފުވައްމުލައް ސިޓީން 78 އަދި އައްޑޫ ސިޓީން ވަނީ 154 މައްސަލަ ހުށަހަޅައިފައެވެ. ބާކީ 715 މައްސަލައަކީ ރާއްޖޭގެ އެހެން ހުރިހާ ރަށެއް ހިމެނޭހެން ހުށަހަޅާފައިވާ މައްސަލަތަކެވެ.
ތިންވަނަ ކުއާޓަރުގައި ފުލުހަށް އެންމެ ގިނައިން ހުށަހަޅައިފައިވަނީ ވައްކަމުގެ މައްސަލަތަކެވެ. ވައްކަމުގެ 1012 މައްސަލަ ހުށަހަޅާފައިވާކަމަށް ތަފާސްހިސާބުތަކުން ދައްކާ ގޮތުގައި މަގުމަތީގެ އެކްސިޑެންޓުތަކުގެ 606 މައްސަލަ އާއި ޑްރަގުގެ 412 މައްސަލަ އަދި ޚިޔާނާތްތެރިވުމުގެ 244 މައްސަލަ ވަނީ ހުށަހަޅައިފައެވެ.
ވައްކަމާއި ފޭރުމުގެ ގިނަ މައްސަލަތައް ވެސް ހުށަހަޅާފައިވަނީ މާލެއިންނެވެ. މި މުއްދަތުގައި މާލެއިން 919 ވައްކަމާއި ފޭރުމުގެ މައްސަލަ ހުށަހަޅާފައިވާއިރު އައްޑޫ ސިޓީން 34 މައްސަލަ، ފުވައްމުލައް ސިޓީން 17 މައްސަލަ، ކުޅުދުއްފުށި ސިޓީން 12 މައްސަލަ އަދި އެހެނިހެން ރަށްތަކުން 139 މައްސަލަ ވަނީ ހުށަހަޅައިފައެވެ. މުޅި ރާއްޖެއިން މި މައްސަލަތަކުގައި ފަސް އަނެހްނުންނާއި 271 ފިރިހެނުން ވަނީ ހައްޔަރުކޮށްފައެވެ.
ފުލުހުންގެ ތަފާސްހިސާބުތަކުން ދައްކާ ގޮތުގައި ތިންވަނަ ކުއާޓަރުގައި ގެވެށި އަނިޔާއާ ގުޅުންހުރި 46 މައްސަލައެއް ވަނީ ތަހުގީގުކޮށްފައެވެ. މި މައްސަލަތަކުގެ ތެރޭގައި ރޭޕު ކުރުމާއި ކުޑަކުދިނަށް ޖިންސީ ގޯނާ ކުރުމާއި ހަށިވިއްކުމާއި ޖިންސީ ފުރައްސާރަ ކުރުންފަދަ މައްސަލަތައް ހިމެނެއެވެ. މި މައްސަލަތަކުގައި މިހާތަނަށް ހައްޔަރުކޮށްފައިވަނީ ތިން މީހުން ކަމަށާއި އެއް މައްސަލައިގައި ދައުވާ ކޮށްދިނުމަށް އެދި ޕީޖީ އޮފީހަށް ފޮނުވާފައިވާ ކަމަށް ފުލުހުންގެ ރިޕޯޓުން ދައްކައެވެ.
ފުލުހުން ވަނީ އެ އިދާރާއަށް ހުށަހެޅިފައިވާ މައްސަލަތަކުގެ ތެރެއިން މި މުއްދަތުގައި ޖުމްލަ 2862 މައްސަލައެއް ތަހުގީގުކޮށް ނިންމާފައެވެ. އަދި 213 މައްސަލައެއްގައި ދައުވާ ކުރުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ވަނީ ފޮނުވާފައެވެ.
