ދިވެހި ދިދައަށް އޮތް އިޙުތިރާމް އިތުރުކުރުމުގެ ގޮތުން ވަޒީރުންގެ ގެކޮޅާއި ކާރުކޮޅުގައިވެސް ޤައުމީ ދިދަ ނަގަނީ
ސަރުކާރުގެ އިދާރާތަކުގައި ދިވެހި ދިދަ 24 ގަޑިއިރު ނަގާފައި ބެހެއްޓެވުމަކީ ރައީސްކަމާއި ހަވާލުވެވަޑައިގެން މުއިއްޒު ނިންމެވި ފުރަތަމަ ނިންމެވުން
ރައީސް މުއިއްޒު ހުވާކުރެއްމުގެ ރަސްމިއްޔާތުގެ ތެރެއިން
މި ސަރުކާރުގެ ވަޒީރުންގެ ގެކޮޅާއި ކާރުކޮޅުގައިވެސް ޤައުމީ ދިދަ ނަގަން ހަމަޖައްސާފައިވާ ކަމަށް ސަރުކާރުން ބުނެފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސުލްޖުމްހޫރިއްޔާގެ އޮފީހުގެ އަންޑަރ ސެކްރެޓެރީ ފޮރ ޕަބްލިކް ޕޮލިސީ އަލްއުސްތާޛު މުޙައްމަދު ފިރުޒުލް ޢަބްދުﷲ ޚަލީލު ވިދާޅުވީ އެ ނިންމެވުން ނިންމަވާފައި ވަނީ ދިވެހި ދިދައަށް އޮތް އިޙުތިރާމް އިތުރުކުރުމުގެ ގޮތުން ކަމަށެވެ. ރައީސް ޑރ. މުހައްމަދު މުޢިއްޒުގެ އިފްތިތާހީ ތަޤުރީރުގައިވެސް ފާހަގަކުރެއްވި އެންމެ މުހިންމު ނުކުތާއަކީ ދިވެހި ޤައުމީ ދިދަޔަށް އޮތް ޤަދަރު އިއާދަކޮށްދެއްވުމުގެ ވާހަކަ ކަމަށް ފިރުޒުލް ވިދާޅުވިއެވެ.
އެމަނިކުފާނުގެ ވިސްނުންފުޅަކީ ދައުލަތެއްގެ ގޮތުގައި ރާއްޖެ ރަމްޒުކޮށްދޭ އެންމެ ވަރުގަދަ ނިޝާނަކީ ދިވެހި ދިދަ އަށް ހެދުން ކަމަށް ފިރުޒުލް ވިދާޅުވިއެވެ. އެހެންކަމުން ސަރުކާރުގެ ވަޒީރުންގެ ގެކޮޅުގައި އާއި ވަޒީރުން ވަޒީރުންގެ ކާރުކޮޅުގައި ތިއްބަވާ ވަގުތުގައި ދިދަ ނަގާފައި ހުންނާނެ ކަމަށާއި އެކަމުގެ ބޭނުމަކީ ދިވެހި މުޖުތަމައުގައި ދިވެހި ދިދަ ބޭނުން ކުރާ މިންވަރު އިތުރުން ކަމަށް ފިރުޒުލް ވިދާޅުވިއެވެ. އަދި ދިވެހި ދިދައަށް އޮންނަ ޝަރަފާއި ކަރާމާތް އިތުރުކުރުމާއި ދިވެހިވަންތަކަމާއި އަމިއްލަވަންތަކަމާ މެދު ފަޚުރުވެެރި ޖީލެއް ބިނާކުރުމަކީ ވެސް އެކަމުގެ މަޤްސަދެއް ކަަމަށް ފިރުޒުލް ވިދާޅުވިއެވެ.
ސަރުކާރުގެ އިދާރާތަކާއި ވުޒާރާތަކުގައި 24 ގަޑިއިރު ދިވެހި ދިދަ ނަގާފައި ބަހައްޓަވަން ރައީސް ޑރ.މުހައްމަދު މުއިއްޒު ވަނީ ނިންމަވާފައެވެ. މިއީ ރައީސްކަމާއި ހަވާލުވެވަޑައިގެން މުއިއްޒު ނިންމެވި ފުރަތަމަ ނިންމެވުމެވެ.
