ހިމާޔަތްކޮށް ރައްކާތެރިކޮށްފައިވާ ދިރޭތަކެތީގެ ލިސްޓަށް ފެހުރިހި އިތުރުކޮށްފި

ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކާތެރިކޮށްފައިވާ ދިރޭތަކެތީގެ ޤަވާއިދަށް 6 ވަނަ އިސްލާޙު ގެނައުމުގެ ޤަވާއިދަށް އަމަލުކުރަން ފަށައިފިއެވެ.

ބުރާސްފަތި ދުވަހު އަމަލުކުރަން ފެށި މި އިސްލާޙުގައި ވަނީ ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކާތެރިކޮށްފައިވާ ދިރޭތަކެތީގެ ލިސްޓަށް ފެހުރިހި (ވޭލް ޝާކް) އިތުރުކޮށްފައެވެ.

އޭގެ އިތުރުން، ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކައުތެރިކޮށްފައިވާ ދިރޭ ތަކެއްޗާމެދު ޢަމަލުކުރާނެ ގޮތުގެ އުސޫލުތައް އެޖެންސީގެ މަޝްވަރާއާއެކު، އެ އެއްޗެއް ޙިމާޔަތްކުރާ ތާރީޚުން ފެށިގެން 6 މަސްދުވަހުގެ ތެރޭގައި މި ގަވާއިދުގެ ޖަދުވަލު 6 ގެ ގޮތުގައި ދިވެހި ސަރުކާރުގެ ގެޒެޓުގައި ޝާއިޢު ކުރަންވާނެކަމަށްވެސް ބަޔާންކޮށްފައިވެއެވެ.

މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ވަނީ ފެހުރިހި ޙިމާޔަތްކޮށް ރައްކައުތެރިކުރާ ދިރޭ އެއްޗެއްގެ ގޮތުގައި ކަނޑައެޅުނު ސަބަބު ބުނެދީފައެވެ. އެގޮތުން މިތަކެއްޗަކީ އިންސާނުންނަށް ހަމަލާ ނުދޭ، ދުނިޔޭގެ އެކި ކަންކޮޅުތަކުގައި ފަތުރުވެރިކަމުގެ ދާއިރާގައި މުހިއްމު ދިރުމެއް ކަމަށް ފާހަގަވެފައިވާ ދިރުމެއްކަމަށް މިނިސްޓްރީން ބުނެއެވެ.

މިނިސްޓްރީން މައުލޫމާތު ދޭ ގޮތުގައި ފެހުރިހި އެންމެ ގިނައިން ދިވެހިރާއްޖެއިން ފެންނަނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން ހިމާޔަތްކޮށްފައިވާ ސައުތު އަރި މެރިން ޕާކް ސަރަހައްދުންނެވެ.

އަދި ފެހުރިއްސަކީ ދުނިޔޭގައި ނެތިދިއުމުގެ ބިރު ކުރިމަތިވެފައިވާ ދިރުމެއްކަންވެސް މިނިސްޓްރީން ފާހަގަކޮށްފައިވެއެވެ.

ފެހުރިއްސަކީ ޤުދުރަތީ ގޮތުގައި ނުވަތަ ޠަބީޢީ ގޮތުގައި ޙިމާޔަތްކޮށް ރައްކައުތެރިކުރާ ދިރޭ ތަކެތީ ގޮތުގައި ކަނޑައެޅުމުން މަނާވެގެންދާ ކަންތައްތަކުގެ ތެރޭގައި ފެހުރިހި ހިފުމާއި، ގެއްލުންދިނުމާއި، މެރުން ހިމެނެއެވެ.

އަދި ފެހުރިއްސަށް ގޯނާ ކުރުމާއި، ބޭނުންކުރުން އަދި ދިރުވައި އާލާކުރުންވެސް މަނާވާނެއެވެ.

އޭގެ އިތުރުން، ފެހުރިހި ވިހާ ތަންތަނާއި، އަދި އޭގެ ޠަބީޢީ ގޮތްތަކަށް ނުވަތަ ޤުދުރަތީ ނިޒާމަށް ބުރޫ އަރާނެ ފަދަ ޢަމަލެއް ކުރުންވެސް މަނާވާނެއެވެ.

ހަމައެއާއެކު، ފެހުރިއްސާއި އޭގެ ބައިތައް އިސްތިހާރު ކުރުމަކީވެސް މި އިސްލާޙުގެ ދަށުން މަނާވެގެންދާނެ ކަންކަމެވެ.

ފެހުރިއްސަކީ ކަނޑުގެ މަތީ ފަށަލައިގައި އުޅޭ ދުނިޔޭގެ ޓްރޮޕިކަލް ސަރަހައްދުން ފެންނަ މިޔަރެކެވެ. އެހެން މިޔަރުތަކާއި ޚިލާފަށް ފެހުރިއްސަކީ ރެދަން ފަދަ ތަކެތި ކައިއުޅޭ ފިލްޓާރ ފީޑަރ އެކެވެ.