ސްޕެނިޝް ލީގުގައި ވިޔަރެއާލާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު މޮޅުވެއްޖެ އެވެ.

ލީގުގައި ހޯމަ ދުވަހުގެ ރޭ އެތުލެޓިކޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 3-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވިޔަރެއާލް އިންނެވެ. މެޗުގެ 20 ވަނަ މިނެޓުގައި އެ ޓީމަށް ލީޑު ނަގައިދިނީ ޖެރާޑް މޮރޭނޯ އެވެ. ނަމަވެސް އޭގެ ފަހުން ފުރަތަމަ ހާފުގެ އިތުރު ވަގުތުގައި އެތުލެޓިކޯ އިން ވަނީ ލަނޑު ޖަހައި، ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ އެކްސެލް ވިޓްސެލް އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ފްރާންސްގެ ފޯވާޑް އެންޓޮއިން ގްރީޒްމަން އެވެ.

އެތުލެޓިކޯ އިން އެ ޓީމުގެ އަނެއް ދެ ލަނޑު ޖެހީ މެޗުގެ ދެ ވަނަ ހާފުގަ އެވެ. މެޗުގެ 80 ވަނަ މިނެޓުގައި މާކޮސް ލޮރެންޓޭ ތަނަވަސްކޮށްދިން ފުރުސަތެއްގައި އެތުލެޓިކޯ އަށް ލީޑު ނަގައިދިނީ ގްރީޒްމަން އެވެ. އޭގެ ފަސް މިނެޓު ފަހުން ލިނޯ ވަނީ އެތުލެޓިކޯގެ ތިން ވަނަ ލަނޑު ޖަހައިފަ އެވެ. އެ ލަނޑު އޭނާ ޖެހީ ޕަބްލޯ ބޭރިއޮސް ތަނަވަސްކޮށްދިން ފުރުސަތެއްގަ އެވެ.

މޮޅާއެކު އެތުލެޓިކޯ އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ކުޅުނު 12 މެޗުން 17 ޕޮއިންޓު ހޯދައިގެންނެވެ. 12 މެޗުގެ ތެރެއިން އެ ޓީމު ވަނީ ނުވަ މެޗުން މޮޅުވެފަ އެވެ. ދެ މެޗުން ބަލިވެފައިވާއިރު، އަނެއް މެޗު ވަނީ އެއްވަރުވެފަ އެވެ.