މަޖިލީހުގެ ރައީސް ކަމުން ނަޝީދު އިސްތިއުފާދެއްވައިފި

ރައްޔިތުންގެ މަޖިލީހުގެ ރައީސް ކަމުން މައްޗަންގޯޅި މެދު ދާއިރާގެ މެމްބަރު ކުރީގެ ރައީސް މުހައްމަދު ނަޝީދު އިސްތިއުފާދެއްވައިފި އެވެ.

ނަޝީދު އިސްތިއުފާދެއްވިކަން މަޖިލީހުގެ ރިޔާސަތަށް އަންގާފައިވަނީ ހޯމަ ދުވަހުގެ ހަވީރު ބޭއްވި ޖަލްސާގަ އެވެ.

މަގާމުން އިސްތިއުފާދެއްވިކަން އިއުލާން ކުރައްވަމުން ނަޝީދު މަޖިލީހުގެ އިދާރާއަށް ފޮނުއްވި މެސެޖެއްގައި ވިދާޅުވީ ނަޝީދުގެ އިތުބާރު ނެތްކަމަށް ބުނެ ދެވަނަ ފަހަރަށް މަޖިލީހަށް ހުށަހަޅުއްވާފައިވާ ކަމަށާއި، އެ މައްސަލައާ އެކު މަޖިލީހުގެ މެޖޯރިޓީ ޕާޓ،ީ އެމްޑީޕީން ގެންދަނީ މަޖިލީހުގެ ބާރުތައް އަބަދުގެ އަބަދަށް ހަނިވެގެންދާނެ އެންމެހާ އަމަލުތައް ހިންގަމުން ކަމަށެވެ.

އެގޮތުން ޤަވައިދާ ގުޅޭގޮތުން މެޖޯރިޓީ ޕާޓީން އަމިއްލައަށް ފަނޑިޔާރުގެއަށް ގޮސް މަޖިލީހުގެ މެންބަރުންނަށް ކަނޑައެޅިގެން ލިބިދީފައިވާ ބާރެއް ހަނިކޮށްފައިވާ ކަމަށާއި، މަޖިލީހުގެ ކޮމިޓީއަކުން، މަޖިލިސް ހިންގުމާ ގުޅޭ ގޮތުން ލަފާ ހޯދުމަށް ބަންޑާރަ ނައިބު އަރިހުގައި ދަންނަވާފައިވާ ކަމަށް ނަޝީދު ވިދާޅުވި އެވެ.

ސިޓީގައި ނަޝިދު ވިދާޅުވީ އެ މައްސަލައިގައި ސުޕްރީމް ކޯޓުން ނެރުނު ޙުކުމުގައި ވެސް މިކަމުގެ ބިރުވެރިކަމާމެދު އަލިއަޅުވާލާފައި ވާ ކަމަށާއި، ސުޕްރީމް ކޯޓުން ބަޔާންކޮށްފައި ވަނީ ރައްޔިތުންގެ މަޖިލީހުގެ އެތެރޭގެ ކަންކަމުގެ ތެރެއަށް ސުޕްރީމް ކޯޓުން ވަނުމަކީ ވަރަށް އިސްތިސްނާ ހާލަތެއްގައި ނޫނީ ކުރެވޭނެ ކަމެއް ނޫން ކަމަށާއ،ި މިކަމުން ކޯޓުގެ ހުކުމްތައް ސިޔާސީ ވުމަށް މަގުފަހިވެ، ސިޔާސީ ކަންކަން ކޯޓުތަކުން ފައިސަލާކުރާ ބާވަތުގެ ގާނޫނީ މައްސަލަތަކަކަށް ބަދަލުވާނެ ކަމަށެވެ.

އެހެންކަމުން ކޯޓުން ހައްލެއް ހޯދުމުގެ ބަދަލުގައ،ި ސިޔާސީ މައްސަލަތަކަށް ހައްލު ހޯދަންވާނީ މަޖިލީހުގެ ތެރެއިންނާއި މަޖިލީހުން ބޭރުގައި އެއްބަޔަކު އަނެއް ބަޔަކާ ވާހަކަ ދައްކައިގެން ކަމަށް ނަޝީދު ވިދާޅުވި އެވެ.

ނަޝީދު އެފަދައިން ވިދާޅުވިއިރު، އިތުބާރު ނެތްކަމުގެ މައްސަލަ ހުށަހެޅި ފަހުން، ނަޝީދު އަދި މަޖިލިސް ނައިބު ރައީސް އީވާ ގެންދެވީ އިތުބާރު ނެތް ކަމުގެ ވޯޓަށް އެހުމަށް ފުރުސަތު ނުދެއްވަމުންނެވެ. އެގޮތުން ސުޕްރީމު ކޯޓަށް އެމްޑީޕީގެ ޕީޖީގެ ފަރާތުން މައްސަލަ ހުށަހެޅި އިރު، އެ ވާހަކަތައް ވެސް ބަޔާންކޮށްފައިވެ އެވެ.

ނަޝީދު އިތުރަށް ވިދާޅުވީ މަޖިލީހުގެ މެޖޯރިޓީ ޕާޓީގެ އަމަލުތައް މިމަގުން ގެންދާކަމީ ބޮޑު ހިތާމައެއް ކަމަށާއި، އެހެންކަމުން އެ މަގާމުގައި ނަޝީދު ހުރެފިނަމަ މަޖިލީހުގެ މެޖޯރިޓީ ޕާޓީން މަޖިލީހަށް ދޭ ގެއްލުން ދާނީ ބޮޑުވަމުން ކަމަށެވެ.

ސިޓީ ނިންމަވާލައްވަމުން ނަޝީދު ވިދާޅުވި ޑިމޮކްރަސީގެ އުޞޫލުތައް ދަމަހައްޓައ،ި ރައްޔިތުންގެ މަސްލަހަތަށް ޚިދުމަތް ކުރުމުގައި ރައްޔިތުންގެ މަޖިލީހުގެ މެންބަރުން ދެމި ތިއްބަވާނެ ކަމަށް އުންމީދު ކުރައްވާ ކަމަށާއި، އިސްތިއުފާއަކީ އަޅުގަނޑުމެންގެ ޑިމޮކްރެޓިކް ނިޒާމުގެ ތެރޭގައި ހަމަޖެހުމާއި ނަޒާހަތްތެރިކަން އަލުން އާލާކުރުމަށް އެހީތެރިވެދޭނެ ކަމެއް ކަމަށް އުންމީދު ކުރައްވާ ކަމަށެވެ.