ސްޕެނިޝް ލީގުގައި ވެލެންސިއާއާ ދެކޮޅަށް ކުޅުނު މެޗުން ރެއާލް މެޑްރިޑު މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި ރެއާލުން ދެ ލަނޑު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގަ އެވެ. މެޗު ފަށައިގެން ތިން ވަނަ މިނެޓުގައި ރެއާލަށް ލީޑު ނަގައިދިނީ ޑެނީ ކަވަހާލް އެވެ. އޭނާ އެ ލަނޑު ޖެހީ ޓޯނީ ކްރޫސް ތަނަވަސްކޮށްދިން ފުރުސަތެއްގަ އެވެ. އޭގެ ފަހުން 42 ވަނަ މިނެޓުގައި ރެއާލަށް ލީޑު ފުޅާ ކޮށްދިނީ ބްރެޒިލްގެ ވިނީޝިއުސް ޖޫނިއާ އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ރޮޑްރީގޯ އެވެ.

ދެ ވަނަ ހާފުގެ ކުރީ ކޮޅު ރެއާލުން ވަނީ އިތުރު ދެ ލަނޑު ޖަހައިފަ އެވެ. ދެ ވަނަ ހާފު ފަށައިގެން ހަތަރު ވަނަ މިނެޓުގައި ރެއާލްގެ ތިން ވަނަ ލަނޑު ޖެހީ ވިނީޝިއުސް އެވެ. މިފަހަރު ވެސް އޭނާ ލަނޑު ޖެހީ ރޮޑްރީގޯގެ އެހީތެރިކަމާއެކު އެވެ. އޭގެ މިނެޓެއް ފަހުން، ރޮޑްރީގޯ ވަނީ ރެއާލްގެ ހަތަރު ވަނަ ލަނޑު ޖަހައިފަ އެވެ. ރެއާލްގެ ފަސް ވަނަ ލަނޑު ވެސް ޖެހީ ރޮޑްރީގޯ އެވެ. މެޗުގެ 84 ވަނަ މިނެޓުގައި އޭނާ އެ ލަނޑު ޖެހީ ފްރެންސިސްކޯ ގާސިއާ ތަނަވަސްކޮށްދިން ފުރުސަތެއްގަ އެވެ. މެޗުގައި ވެލެންސިއާގެ ހަމައެކަނި ލަނޑު 88 ވަނަ މިނެޓުގައި ޖެހީ ހޫގޯ ޑޫރޯ އެވެ.

މޮޅާއެކު ވެސް ރެއާލް އޮތީ ދެ ވަނައިގަ އެވެ. އެއީ ލީގުގައި ޖިރޯނާ ކުޅުނު މެޗުން އެ ޓީމު މޮޅުވެފައިވާތީ އެވެ. ރެއާލް ދެ ވަނައިގައި އޮތީ 13 މެޗުން 32 ޕޮއިންޓާއެކު އެވެ. ހަމަ އެ އަދަދަަށް މެޗު ކުޅެގެން އެއް ވަނައިގައި ޖިރޯނާ އަށް ލިބެނީ 34 ޕޮއިންޓެވެ. ތިން ވަނައިގައި އޮތީ ބާސެލޯނާ އެވެ.