ދިވެހި ޖުމްހޫރިއްޔަތަކަށް 55 އަހަރު ފުރުން ފާހަގަކުރަމުންދާއިރު، ޖުމްހޫރީ ކޮންމެ ވެރިކަމެއްގެވެސް އިންތިޤާލީ މަރުޙަލާގައި މީގެ ކުރިން ފެނިފައިވަނީ "ކަޅު" ދުވަސްތަކެކެވެ. ވެރިކަމުގެ ނިޒާމު ބަދަލުވާ މަރުޙަލާއަކީ، ހިނގަމުންދާ ސަރުކާރުން، ދެން އުފެދެން އަންނަ ސަރުކާރަކަށް މާ ބޮޑު އެއްބާރުލުމެއް ދޭ މަރުޙަލާއެއް ނޫނެވެ. އެންމެ ކުޑަމިނުން ރައީސުލްޖުމްހޫރިއްޔާގެ މަޤާމުގައި ހުންނަވާ ބޭފުޅަކު، ދެން އުފެދެން އަންނަ ސަރުކާރުގެ ރައީސުލްޖުމްހޫރިއްޔާއަށް ހެޔޮ ބަސްފުޅެއްވެސް ވިދާޅުވެފައެއް ނެތެވެ.

އަނެއްކާވެސް ޖުމްހޫރިއްޔަތުގެ ވެރިކަން ބަދަލުވާން ދާއިރު، މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މި ވަނީ ޑިމޮކްރަސީގެ ރިވެތި މިސާލެއް ދައްކަވާފައެވެ.

ނަމޫނާ ދައްކަވައިފިއެވެ. ވެރިކަމުގެ ފަސް އަހަރު ދުވަހުވެސް އެމަނިކުފާނަކީ ޑިމޮކްރަސީގެ އެންމެހާ ސިފަތައް ޤަބޫލުކުރައްވާ، ޢަމަލުފުޅުން އެކަން ދެއްކެވި ރައީސެކެވެ. މިކަަމަށް ދިވެހި އެންމެހާ ލޮބުވެތި ރައްޔިތުން ހެކިވާނެއެވެ. އަނެއްކޮޅުން، އިދިކޮޅުގައި ތިއްބެވި އިސް ބޭފުޅުންވެސް މިކަމަށް އެއްބަސްވެ ވަޑައިގަންނަވައެވެ.

ޖުމްހޫރީ ދުވަހު ރައީސް ޞާލިޙު ޤައުމާ މުޚާޠަބުކުރައްވައި ވާހަކަފުޅުދެއްކެވިއިރު، މިއީ އެމަނިކުފާނުގެ ރިޔާސީ ދައުރުގެ އެންމެ ފަހު ތަޤުރީރެވެ. ފަސް އަހަރު ދުވަހު ކުރެއްވުނު މަސައްކަތާއި، ޤައުމަށް ގެނެސްދެއްވުނު ހެޔޮ ބަދަލުގެ ވާހަކަފުޅު ޙިއްޞާކުރެއްވީ ހިނިފުޅުވަޑުވައިގެން ހުންނަވައެވެ. ރައްޔިތުންނަށް ބޭނުންވާ އަސާސީ ޚިދުމަތްތައްް ފޯރުކޮށްދިނުމަށް ސަރުކާރުން ކުރި ކާމިޔާބު މަސައްކަތާއި، އަންނަ އޮތް ޖީލުތަކަށް އެކަމުގެ ނަތީޖާގެ އަސަރު ކުރާނެ މިންވަރު ރައީސް ޞާލިޙު ބަޔާންކޮށްދެއްވީ، އިޚުލާޞްތެރިކަމާއެކުއެވެ. ރިޔާސީ ދައުރު ނިންމަވާލެއްވުމަށްފަހު، އެނބުރި ވަޑައިގަންނަވާއިރުވެސް، ދެއްކެވީ ޑިކޮމްރަސީގެ ލާމަސީލު ނަމޫނާއެވެ.

ފެހި ޤާނޫނު އަސާސީގެ ދަށުން، ގިނަ ޕާޓީ އެކުލެވޭ ސިޔާސީ ނިޒާމަށް ރާއްޖެ ބަދަލުވިފަހުން، އޮމާންކަމާއެކު ވެރިކަން ބަދަލުވުމުގެ މަރުޙަލާ ހިނގަމުން މިދަނީ ހަމައެކަނި މިފަހަރުއެވެ. މީގެކުރިން އެކަން ހިނގާފައި އޮތީ ވޯޓުން ނުވިއްޔާ، ކޯޓުންނެވެ. ނުވަތަ މަގުމަތީންނެވެ. ކުރިއަށް އޮތް ތަނުގައިވެސް ރާއްޖޭގައި އޮންނަ ރިޔާސީ އިންތިޚާބުތަކާއި، ވެރިކަން ބަދަލުވެގެންދިޔުން މިގޮތުގައި ހިނގަމުންދާތަން ދިވެހިރައްޔިތުން ދެކެން ބޭނުންވާނެކަން ކަށަވަރެވެ. ރައީސް ޞާލިޙު ވިދާޅުވީ، ހޯދުނު ކާމިޔާބީތައް ހިފަހައްޓައި، ދަމަހައްޓައި، ޤައުމުގައި އެކަން އަށަގެންނެވުމަކީ، ދެން އަންނަ ހުރިހާ ސަރުކާރުތަކާއި ވެރިންގެ މަސްއޫލިއްޔަތެއް ކަމަށެވެ. އެމަނިކުފާނު ވިދާޅުވީ ސަރުކާރުތައް ބަދަލުވާނެކަމަށާއި، ވެރިން އައިސް، ގޮސް ވާނެކަމަށެވެ. ނަމަވެސް، ޤާއިމްވެ، ދާއިމުވެ، ދެމި އޮންނާނީ ދިވެހި ޤައުމާއި، ދިވެހި ރައްޔިތުން ކަމަށެވެ.

ވަދާޢީ ތަޤުރީރު ނިންމަވާާލައްވަމުން ރައީސް ޞާލިޙު ވަނީ، ދެން އުފެދެން އަންނަ ސަރުކާރަށް ކާމިޔާބަށް އެދިވަޑައިގެންފައެވެ. މީގެ ކުރިން، ދައުރު ފުރިހަމަކުރައްވައި ވަޑައިގަންނަވާ ވެރިން، އުފެދެން އަންނަ ސަރުކާރަށް ކާމިޔާބަށް އެދިވަޑައިގެންފައެއް ނެތެވެ. ޖުމްހޫރީ ދުވަހު، ދިވެހި ޖުމްހޫރިއްޔާގެ ހަތްވަނަަ ރައީސް، ރައީސް ޞާލިޙު މި ދެއްކެވީ އަންނަ އޮތް ޖީލުތަކަށްވެސް އެމަނިކުފާނުގެ ރީތި ނަންފުޅު ދެމިއޮންނާނެފަދަ މިސާލެކެވެ.

"ވެރިޔެއް މިފަދަ ފެންނާނެހޭ؟"