ގއ. ވިލިނގިލީ ރޭޕްގެ މައްސަލަ: ތުހުމަތުކުރެވޭ ތިން މީހުންނަށް ދައުވާ އުފުލައިފި
9 ނޮވެމްބަރު 2023 | ބުރާސްފަތި 16:43ތިން މީހުންގެ މައްޗަށް ވެސް ކުރަނީ ރޭޕްކުރުމުގެ ކުށުގެ ދައުވާ އާއި މީހަކަށް ޖިންސީ އަނިޔާއެއް ކުރުމުގެ ބޭނުމުގައި ހިފެހެއްޓުމުގެ ކުށުގެ ދައުވާ
ގއ. ވިލިނގިލި
ގއ. ވިލިނގިލީގައި އަންހެނަކު ރޭޕް ކުރި ކަމަށް ތުހުމަތު ކުރާ ތިން މީހުންނަށް ދައުލަތުން ދައުވާ އުފުލައިފިއެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ މި މައްސަލާގައި ދައުވާ އުފުލާގައިވަނީ ލ. ގަން މަތިމަރަދޫ، ދަނބުރުއްދޮށުގޭ، އިބްރާހީމް ރިޒާ 30، އާއި، ވިލިނގިލި ކެޔޮވިނަ އަހުމަދު ޝާލް 20، އާއި ހަމަ އެ ރަށު މަލަސް މުހައްމަދު މާއިލް މިހާދު 23، ގެ މައްޗަށް ކަމަށެވެ.
މި މައްސަލާގައި ތިން މީހުންގެ މައްޗަށް ވެސް ކުރަނީ ރޭޕްކުރުމުގެ ކުށުގެ ދައުވާ އާއި މީހަކަށް ޖިންސީ އަނިޔާއެއް ކުރުމުގެ ބޭނުމުގައި ހިފެހެއްޓުމުގެ ކުށުގެ ދައުވާއެވެ.
ރޭޕްގެ ތުހުމަތަށް އިބްރާހީމް ރިޒާ ހައްޔަރުކޮށް، ކުޑަކަމުދާތަކެތި ނަގައި ޓެސްޓު ކުރިއިރު ކެނަބިސްއަށް ޕޮޒިޓިވްވެފައިވާ ކަމަށް ވެސް ޕީޖީން ބުންޏެވެ. ކެނަބިސް ބޭނުންކުރުމުގެ ދައުވާ ސާބިތު ވެއްޖެނަމަ ތިން އަހަރުގެ ޖަލު ހުކުމެއް އަންނާނެއެެވެ.
އުމުރުން 22 އަހަރުގެ އަންހެނަކަށް ވިލިނގިލީ ގެއެއްގެ ކޮޓަރިއެއްގެ ތެރޭގައި އަންހެން މީހާގެ ނުރުހުމުގައި އޭނާ ހިފަހައްޓައި ތިން މީހުން ވެގެން އޭނާ ރޭޕްކުރި މައްސަލަ ހުށަހަޅާފައިވަނީ ޖުލައި މަހުގައެވެ.
