ޝަޚްތަރު ޑޮނެސްކު އަތުން ބަލިވެ، ބާސެލޯނާ އަށް އިތުރު އިންތިޒާރެއް

ޔުއެފާ ޗެމްޕިއަންސް ލީގުގައި ޝަޚްތަރު ޑޮނެސްކާ ދެކޮޅަށް ކުޅުނު މެޗުން ބާސެލޯނާ ބަލިވެއްޖެ އެވެ.

އަންގާރަ ދުވަހުގެ ރޭ ޝަޚްތަރު ޑޮނެސްކުގެ ދަނޑުގައި ކުޅުނު މެޗުން ބާސެލޯނާ ބަލިވީ 1-0 އިންނެވެ. އެ މެޗުން މޮޅުވެ، މުބާރާތުގެ އަނެއް ބުރުން ޖާގަ ހޯދުމުގެ ފުރުސަތު ބާސެލޯނާ އަށް އޮތެވެ. ނަމަވެސް ބައްޔާއެކު، ބާސެލޯނާ އިން އިތުރު އިންތިޒާރެއް ކުރަން ޖެހޭނެ އެވެ. އަނެއްކޮޅުން މިއީ މި ސީޒަންގެ ޔުއެފާ ޗެމްޕިއަންސް ލީގުގައި ބާސެލޯނާގެ ފުރަތަމަ ބައްޔެވެ.

ޝަޚްތަރު ޑޮނެސްކުގެ ދަނޑުގައި ކުޅުނު މެޗު ފަށައިގެން ވެސް ބާސެލޯނާ އިން ދިޔައީ ލަނޑު ޖެހުމަށް މަސައްކަތް ކުރަމުންނެވެ. އެ ޓީމުގެ ޕޮލެންޑުގެ ފޯވާޑް ރޮބާޓް ލެވަންޑޯސްކީ އަށް ލަނޑު ޖަހާނެ ފުރުސަތު ލިބި، ބޭކާރުވި އެވެ. އޭގެ އިތުރުންް ޖަރުމަނުގެ އިލްކާއީ ގުންޑޮގާން ފޮނުވާލި ބޯޅަ ގޯލާ އަމާޒުވާ ގޮތެއް ނުވި އެވެ. ޝަޚްތަރު ޑޮނެސްކުން ވެސް ދިޔައީ އެ ޓީމަށް ލިބޭ ފުރުސަތުގައި ބާސެލޯނާގެ ގޯލަށް ނުރައްކާ ކުރަމުންނެވެ. އެ ޓީމުން މެޗުގައި ލަނޑު ޖަހައި ލީޑު ނެގީ 40 ވަނަ މިނެޓުގަ އެވެ. އެ ޓީމުގެ ޑިފެންޑަރު ޖިއޯޖީ ގޮޗޮލެއިޝްވިލީ ހުރަސްކޮށްދިން ބޯޅަ، ބޮލުން ގޯލަށް ވައްދާލައިގެން ލީޑު ނަގައިދިނީ ޑެނީލޯ ސިކާން އެވެ.

ބައްޔާއެކު ވެސް ބާސެލޯނާ އޮތީ ގްރޫޕް އެޗުގެ އެއް ވަނައިގަ އެވެ. އެއީ މިހާތަނަށް ކުޅުނު ހަތަރު މެޗުން ނުވަ ޕޮއިންޓު ހޯދައިގެންނެވެ. މި ގްރޫޕުގައި ކޮންމެ ޓީމެއް ވެސް ހަތަރު މެޗު ކުޅެފައިވާއިރު، ދެ ވަނައިގައި އޮތީ ޕޯޓޯ އެވެ. ބާސެލޯނާ ބަލި ކުރި ޝަޚްތަރު ޑޮނެސްކު އޮތީ ތިން ވަނައިގަ އެވެ.