ވެޔެކާނޯ އިން ރެއާލް މޮޅުވިޔަ ނުދީ ހިފަހައްޓައިފި

ސްޕެނިޝް ލީގުގައި ރަޔޯ ވަޔެކާނޯއާ ދެކޮޅަށް ކުޅުނު މެޗުން ރެއާލް މެޑްރިޑު އެއްވަރުވެއްޖެ އެވެ.

އާދީއްތަ ދުވަހުގެ ރޭ ރެއާލްގެ އަމިއްލަ ދަނޑުގައި ކުޅުނު މެޗު ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވި އެވެ. މެޗު ފަށައިގެން ފަސް ވަނަ މިނެޓުގައި ރެއާލްގެ ފެޑެރިކޯ ވަލްވާޑޭ އަށް ލިބުނު ފުރުސަތެއްގައި އޭނާ ފޮނުވާލަން މަސައްކަތް ކުރި ބޯޅަ، ވަޔެކާނޯގެ ގޯލް ކީޕަރު ވަނީ ހުއްޓުވައިފަ އެވެ. އޭގެ ފަހުން ރެއާލަށް ލިބުނު ކޯނަރެއްގައި ހުރަސްވި ބޯޅަ، ހޮސޭލޫ ބޮލުން ފޮނުވާލި ނަމަވެސް، ގޯލާ އަމާޒުވާ ގޮތެއް ނުވި އެވެ. ފުރަތަމަ ހާފުގެ 31 ވަނަ މިނެޓުގައި ރެއާލްގެ ފްރެންސިސްކޯ ގާސިއާ ފޮނުވާލި ބޯޅަ ދިޔައީ، ގޯލުގެ ހުރަސް ދަނޑި މަތިންނެވެ. މެޗުގެ ދެ ވަނަ ހާފުގައި ރެއާލްގެ ވިނީޝިއުސް ޖޫނިއާ ލަނޑެއް ޖެހި ނަމަވެސް، ރެފްރީ ނިންމީ އޮފްސައިޑު ކަމަށެވެ. މެޗުގައި ރެއާލަށް ވަނީ ލަނޑު ޖަހާނެ ގިނަ ފުރުސަތުތަކެއް ލިބި، ބޭކާރުވެފަ އެވެ.

މި ނަތީޖާ އާއެކު އެއް ވަނަ އަށް ޖެހިލަން ލިބުނު ފުރުސަތު ރެއާލުން ވަނީ ނަގާލައިފަ އެވެ. މިހާތަނަށް ކުޅުނު 12 މެޗުން 29 ޕޮއިންޓާއެކު އެ ޓީމު އޮތީ ދެ ވަނައިގަ އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ޖިރޯނާ އޮތީ 31 ޕޮއިންޓާއެކު އެވެ. ވާދަވެރި ބާސެލޯނާ އޮތީ 27 ޕޮއިންޓާއެކު ތިން ވަނައިގަ އެވެ.