ޖަރުމަނު ލީގުގަައި ހޮފެންހައިމާ ދެކޮޅަށް ކުޅުނު މެޗުން މޮޅުވެ، މި ސީޒަންގައި ބަޔާ ލެވަކޫސަން އިން މޮޅުވަމުން އައި ސިލްސިލާ ދަމަހައްޓައިފި އެވެ.
ހޮނިހިރު ދުވަހުގެ ރޭ ހޮފެންހައިމްގެ ދަނޑުގައި ކުޅުނު މެޗު ލެވަކޫސަން އިން ކާމިޔާބު ކުރީ 3-2 އިންނެވެ. މެޗު ފަށައިގެން ނުވަ ވަނަ މިނެޓުގައި ލެވަކޫސަަން އިން ވަނީ ލަނޑު ޖަހައި ލީޑު ނަގައިފަ އެވެ. ވިކްޓޯ ބޮނިފޭސް ތަނަވަސްކޮށްދިން ފުރުސަތެއްގައި އެ ޓީމަށް ލީޑު ނަގައިދިނީ ފްލޯރިއަން ވާޓްޒް އެވެ. އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވެ، އިތުރަށް ދިން ވަގުތުގައި ލެވަކޫސަން އަށް ލީޑު ފުޅާކޮށްދިނީ އެލެކްސް ގްރިމާލްޑޯ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޖޯނަސް ހޮފްމަން އެވެ.
ދެ ވަނަ ހާފަށް ނުކުމެ ހޮފެންހައިމް އިން ވަނީ ދެ ލަނޑު ޖަހައި ނަތީޖާ ހަމަހަމަކޮށްފަ އެވެ. މެޗުގެ 56 ވަނަ މިނެޓުގައި އެ ޓީމުގެ ފުރަތަމަ ލަނޑު ޖަހައިދިނީ އެންޓޯން ސްޓަކް އެވެ. އޭގެ ދެ މިނެޓު ފަހުން އެ ޓީމަށް ނަތީޖާ ހަމަހަމަކޮށްދިނީ ނެދަލެންޑްސްގެ ވައުޓް ވެހޯސްޓް އެވެ. ނަމަވެސް އޭގެ ފަހުން ލެވަކޫސަން އިން ވަނީ ތިން ވަނަ ލަނޑެއް ޖަަހައި މެޗުން މޮޅުވެފަ އެވެ. 70 ވަނަ މިނެޓުގައި އެ ޓީމު މޮޅު ކޮށްދިނީ ގްރިމާލްޑޯ ޖެހި ލަނޑުންނެވެ.
މޮޅާއެކު ލެވަކޫސަން އޮތީ އެއް ވަނައިގައި އެވެ. އެއީ މިހާތަނަށް ކުޅުނު 10 މެޗުން 28 ޕޮއިންޓު ހޯދައިގެންނެވެ. މި ސީޒަންގެ ލީގުގައި މިހާތަނަށް ކުޅުނު އެއްވެސް މެޗަކުން ލެވަކޫސަން ބަލިވެފައެއް ނުވެ އެވެ. ކުޅުނު 10 މެޗުގެ ތެރެއިން އެ ޓީމު ވަނީ ނުވަ މެޗުން މޮޅުވެ، އެއް މެޗުން އެއްވަރުވެފަ އެވެ.
