އިންތިޚާބީ ރައީސް ޑރ. މުޙައްމަދު މުއިއްޒާއި އިންތިޚާބީ ނާއިބު ރައީސް ހުސައިން މުޙައްމަދު ލަތީފް ހުވާކުރައްވާ ރަސްމިއްޔާތަށް ހޭދަވާނީ 22.9 މިލިއަން ރުފިޔާކަމަށް ރައްޔިތުންގެ މަޖިލީހުން ބުނެފިއެވެ.
މީގެ ކުރިން އެ ރަސްމިއްޔާތަށް 200 މިލިއަނަށް ވުރެ ގިނަ ރުފިޔާ ހޭދަވާ ކަމަށް ބައެއް މީޑިއާތަކުން ވަނީ ރިޕޯޓްކޮށްފައެވެ. އަދި އެގޮތަށް ރިޕޯޓްކޮށްފައި ވަނީ މަޖިލީހުގެ އިދާރާ އާއި ހަވާލާދީއެވެ. އެހެންނަމަވެސް މަޖިލީހުގެ އިދާރާ އިން ވަނީ އެ އަދަދު ރަނގަޅު ނޫންކަން ހޯމަ ދުވަހު ހާމަކުރައްވާފައެވެ.
މަޖިލީހުގެ އިިދާރާއިން ވަނީ ކުރިއަށް އޮތް ނޮވެމްބަރު މަހުގެ 17 ވަނަ ދުވަހުގެ ހަވީރު ޖުމްހޫރީ މައިދާނުގައި ބާއްވާ އެ ރަސްމިއްޔާތުގެ ތަފްސީލް ހިއްސާކުރައްވާފައެވެ. މަޖިލީހުގެ ކޮމިއުނިކޭޝަންސް ޑިރެކްޓަރުގެ ހަސަން ޒިޔާއު ވިދާޅުވީ ހުވާކުރުމުގެ ރަސްމިއްޔާތުގެ ހުރިހާ މަސައްކަތް ޓެންޑާ ބޯޑުން ހަވާލު ކޮށްފައިވަނީ ސިފައިންގެ ވެލްފެއަ ކުންފުނި (ސިވެކް)އާ ކަމަށެވެ. އެ ރަސްމިއްޔާތަށް 22.9 މިލިއަން ރުފިޔާ ހޭދަވާނެ ކަން ހާމަކުރި ނަމަވެސް ވަކިވަކި ކަންކަމަށް ހިނގާ ޚަރަދުތަކުގެ ތަފްސީލް ހާމަކުރައްވާފަ އެއް ނުވެއެވެ.
މުއިއްޒު ހުވާކުރައްވާ ހަފްލާއަށް 3،000ށްވުރެ ގިނަ މީހުންނަށް ދައުވަތު ފޮނުވާނެ ކަމަށް މަޖިލީހުގެ އިދާރާއިން ވަނީ ބުނެފައެވެ. އަދި އެ ހަފްލާ އަށް ތިން ޤައުމެއްގެ ވެރިން ވަޑައިގަންނަވާ ގޮތަށް ވަނީ ހަމަޖެހިފައެވެ. ޒިޔާއު ކުރިން ވިދާޅުވީ އިންތިޒާމުތައް ހަމަޖެހިފައި އޮތް ގޮތުން އަދި އާންމު ރައްޔިތުންނަށް އެ ހަފުލާގައި ބައިވެރިނުވެވޭ ކަމަށެވެ.
