ސްޕެއިންގެ ރެއާލް މެޑްރިޑަށް ކުޅެމުން އަންނަ ފްރާންސްގެ ޑިފެންސިވް މިޑްފީލްޑަރު އައުރެލިން ޗުއަމެނީ އަށް އަނިޔާވެ، ކުޅުމާ ދުރަށް ދާން ޖެހިއްޖެ އެވެ.

އުމުރުން 23 އަހަރުގެ ކުޅުންތެރިޔާ އަށް އަނިޔާވެފައި ވަނީ ސްޕެނިޝް ލީގުގައި ރެއާލުން ވާދަވެރި ބާސެލޯނާއާ ދެކޮޅަށް ކުޅުނު މެޗުގަ އެވެ. ރެއާލް މެޑްރިޑުން ހާމަކޮށްފައިވާ ގޮތުގައި ޗުއަމެނީގެ ވާއަތު ފަޔަށް ވަނީ އަނިޔާވެފަ އެވެ. ރެއާލުން ބުނީ އެ ޓީމުގެ މެޑިކަލް ޓީމުން ކުރިއަށް ގެންދިޔަ ޓެސްޓުތަކުން ދައްކާ ގޮތުގައި ޗުއަމެނީގެ ވާއަތު ފައިތިލަ އަށް އަނިޔާވެފައިވާކަން އެނގިފައިވާ ކަމަށެވެ. އޭގެ ސަބަބުން ގާތް ގަނޑަކަށް ހައެއް ނުވަތަ އަށް ހަފްތާގެ މުއްދަތަކަށް އޭނާ ކުޅުމާ ދުރުގައި ހުންނަން ޖެހޭނެ ކަމަށް ވެސް އެ ކުލަބުން ވަނީ ބުނެފަ އެވެ. ރެއާލްގައި މޮޅު ކުޅުމެއް ދައްކަމުން އަންނަ ޗުއަމެނީ އަށް އަނިޔާވެ ކުޅުމާ ދުރަށް ދާން ޖެހުމަކީ އެ ޓީމުގެ ކޯޗު ކާލޯ އަންޗެލޮޓީ އަށް އުނދަގޫ ކަމަކަށް ވާނެ އެވެ.

މޮނާކޯ ދޫކޮށް މިދިޔަ އަހަރު ޗުއަމެނީ ރެއާލަށް ބަދަލުވީ ހަ އަހަރު ދުވަހުގެ އެއްބަސްވުމެއްގެ ދަށުންނެވެ. އޭގެ ފަހުން މިހާތަނަށް އޭނާ ވަނީ އެ ކުލަބުގައި މޮޅު ކުޅުމެއް ވެސް ދައްކައިފަ އެވެ. ރެއާލަށް މިހާތަނަށް ކުޅެދިން 64 މެޗުގައި ޗުއަމެނީ ވަނީ އެއް ލަނޑު ޖަހައިފަ އެވެ. ރެއާލްގެ ކޯޗު އަންޗެލޮޓީ އެންމެ އިސްކަން ދެމުން އަންނަ ކުޅުންތެރިންގެ ތެރޭގައި ވެސް ޗުއަމެނީ ހިމެނެ އެވެ. ރެއާލާއެކު އޭނާ ވަނީ މިހާތަނަށް ކޮޕާ ޑެލް ރޭ، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކޮށްފަ އެވެ.

ޒުވާން ކުޅުންތެރިޔާ އަކީ ފްރާންސް ޤައުމީ ޓީމުގައި ވެސް ހިމެނޭ ކުޅުންތެރިޔެކެވެ. އޭނާ އަށް ފްރާންސް ޤައުމީ ޓީމުން ޖާގަ ލިބުނީ 2021 ވަނަ އަހަރު އެވެ. އޭގެ ފަހުން އޭނާ ވަނީ މިހާތަނަށް ޤައުމީ ޓީމަށް 29 މެޗު ކުޅެދީ، ތިން ލަނޑު ޖަހައިފަ އެވެ. ފްރާންސް އިން މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕްގެ ދެ ވަނަ ހޯދިއިރު، ޗުއަމެނީ އަކީ އެ ޓީމުގައި ހިމެނޭ ކުޅުންތެރިޔެކެވެ.