މެތަޑޯންގެ ފަރުވާ ނަގާ 400ށް ވުރެ ގިނަ މީހުން އެބަތިބި
ނޭޝަނަލް ޑްރަގް އެޖެންސީ (އެންޑީއޭ)ގެ ސީއީއޯ އިމާދު ސާލިހް
މެތަޑޯންގެ ޚިދުމަތް ފުޅާކުރުމުގެ މަސައްކަތް ކުރަމުންދާ ކަމަށާއި، މިފަރުވާއާއެކު މަސްތުވާތަކެއްޗަށް އޮންނަ ޑިމާންޑް ކުޑަވެފައިވާ ކަމަށް ނޭޝަނަލް ޑްރަގް އެޖެންސީ (އެންޑީއޭ)ގެ ސީއީއޯ އިމާދު ސާލިޙު ވިދާޅުވެއްޖެއެވެ.
ރާއްޖެޓީވީގައި ވާހަކަފުޅު ދައްކަވަމުން އިމާދު ވިދާޅުވީ މަސްތުވާތަކެތީގެ ޝިކާރައަކަށްވެފައިވާ މީހުންނަށް ފަރުވާ ދިނުމަށްފަހު، އެމީހުން އަނބުރާ މުޖުތަމައަށް ނެރުމަށް ގިނަ މަސައްކަތްތައް ކުރަމުންދާ ކަމަށާއި، އެމީހުންނާއި ދޭތެރޭގައި މުޖުތަމައުއިން ދެކޭގޮތާއި، މުއާމަލާތް ކުރަމުންދާ ގޮތް ވެސް ބަދަލުވަމުންދާ ކަމަށެވެ. މީގެ ކުރިން މަސްތުވާތަކެތި ބޭނުންކުރާ މީހުންނާ ދޭތެރޭގައި ދެކެނީ ވަރަށް ގޯސްގޮތަކަށް ކަމަށާއި، ނަމަވެސް އާއްމު ރައްޔިތުން ހޭލުންތެރިކުރުވުމަށް ކުރެވުނު މަސައްކަތުގެ ނަތީޖާ ރަނގަޅު ކަމަށް އިމާދު ވިދާޅުވިއެވެ. އަދި ވިދާޅުވީ އެފަދަ މީހުންނަށް އެމީހުންގެ އާއިލާތަކުން ވެސް އެއްބާރުލުންދޭ މަންޒަރު މިހާރު މުޖުތަމައިން ފެންނަމުންދާ ކަމަށާއި، ސިއްހީ ގޮތުން ފަރުވާ ދިނުމަށް އައިލާތަކުން ވަރަށް ބޮޑަށް މަސައްކަތްކޮށްދޭ ކަމަށެވެ.
އިމާދު ވިދާޅުވީ މަސްތުވާތަކެތީގެ ޝިކާރައަކަށްވެފައިވާ މީހުން މުޖުތަމައުއަށް ނެރުމަށް ސިއްހީ އެޕްރޯޗަކުން މަސައްކަތް ފެށިގެން ދިޔައީ މީގެ 8 އަހަރު ކުރިން ކަމަށާއި، ފާއިތުވި 5 އަހަރުގެ ތެރޭގައި ވަރަށް ގިނަ މަސައްކަތްތައް ކުރެވިފައިވާ ކަމަށެވެ. އެގޮތުން މިހާރު ޑޮކްޓަރުންގެ އިރުޝާދުގެ ދަށުން މެތަޑޯންގެ ފަރުވާ ގިނަ އަދަދެއްގެ ބަޔަކު ނަގަމުންދާ ކަމަށާއި، މި ޕްރޮގްރާމް ކާމިޔާބު ކަމަށް އޭނާ ވިދާޅުވިއެވެ.
އެގޮތުން މިހާރު މެތަޑޯންގެ ފަރުވާ ނަގާ 400ށް ވުރެ ގިނަ މީހުން އެބަތިބި ކަމަށާއި، މުޅި ރާއްޖެއަށް މި ޚިދުމަތް ފުޅާކުރަމުންދާ ކަމަށް އިމާދު ވިދާޅުވިއެވެ. އަދި ވިދާޅުވީ މިއަހަރު ނިމުމުގެ ކުރިން ކުޅުދުއްފުށި ސިޓީގައި ވެސް ޚިދުމަތް ދިނުމަށް ސެންޓަރެއް ހުޅުވޭނެ ކަމަށް އުންމީދުކުރައްވާ ކަމަށެވެ.
އިމާދު ވިދާޅުވީ މެތަޑޯންގެ ޚިދުމަތާއެކު މަސްތުވާތަކެއްޗަށް އޮންނަ ޑިމާންޑް ކުޑަކުރެވިފައިވާކަން ފާހަގަކުރެވޭ ކަމަށާއި، ޖިނާއީ ކުދިކުދި ކުށްތަކަށް އަރައިގަތުން ވަރަށް ބޮޑަށް މަދު ކުރެވިފައިވާ ކަމަށް ފުލުހުން މައުލޫމާތުދޭ ކަމަށެވެ. އަދި ވިދާޅުވީ ވައްކަމުގެ މައްސަލަތައް ވެސް މަދުކަމަށް ރިކޯޑުތަކުން ދައްކާ ކަމަށެވެ. އެހެންކަމުން މަސްތުވާތަކެތި ބޭނުންކުރާ މީހުން މުޖުތަމައުއަށް ނެރުމަށްޓަކައި ސިއްހީ އެޕްރޯޗަކުން މަސައްކަތް ކުރުމުން ނަތީޖާ ރަނގަޅު ކަމަށާއި، މުޖުތަމައުއަށް އެކަމުގެ ހެޔޮ އަސަރު ކުރާ ކަމަށް އޭނާ ވިދާޅުވިއެވެ.
މެތަޑޯނަކީ ބޭހާއެކު ދެވޭ ފަރުވާއެކެވެ. ކައުންސެލިންއާއި އެޑިޔުކޭޝަންގެ އިތުރުން މިހާއަށް ދިރިއުޅުން ކުރިއަށް ގެންދެވޭ ގޮތަށް ގިނަ ސެޝަންތަކެއް މިޕްރޮގްރާމްގައި ކުރިއަށް ގެންދެއެވެ. މެތަޑޯންގެ ޑޯޒް ކުޑަކޮށް ފަށާ މަތިކުރަމުން ގޮސް އެ މީހަކާ ގުޅޭ މެއިންޓަނެންސް ޑޯޒް ދިނުމުން ބޭނުންކުރުން އެއްކޮށް ހުއްޓިގެންދެއެވެ.
