ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކަންކަން ގޯހުން ގޯހަށް ދިޔައީ، މާބޮޑަށް ފަރުވާކުޑަވެ، އިހުމާލުވުމުން ކަމަށް އެ އެސޯސިއޭޝަންގެ ފުރަތަމަ އިންތިޚާބީ ރައީސް އަލީ އާޒިމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރުކަން ވެސް ކުރައްވަމުން އަންނަ އާޒިމް މިހެން ވިދާޅުވީ، "ރާއްޖެ އެމްވީ" އަށް ދެއްވި އިންޓަވިޔުއެއްގަ އެވެ. އާޒިމް ވިދާޅުވީ، މި ޙާލަށް އެފްއޭއެމްގެ ކަންކަން ދިޔައީ އެ އެސޯސިއޭޝަނާ ދޭތެރޭގައި އަޅަން ޖެހޭ ފިޔަވަޅު ނާޅާ އޮވެގެން ކަމަށެވެ. އެގޮތުން އެފްއޭއެމްގެ ހިންގާ ޤަވާއިދެއް އޮންނައިރު، ކަނޑައެޅިގެން އެ ޤަވާއިދާ ޚިލާފަށް އެ އެސޯސިއޭޝަނުން ކަންކަން ކުރަމުން ގެންދިޔަ އިރު ވެސް، ރަޖިސްޓްރާ އެކަމަށް ފިޔަވަޅު އަޅުއްވާފައި ނުވާކަން އާޒިމް ފާހަގަކުރެއްވި އެވެ. އާޒިމް ދެކިލައްވާ ގޮތުގައި އެފްއޭއެމްގެ ކަންކަމާ އޭރަކު އޮންނަ ސަރުކާރުން ނުބެހުނު ނަމަވެސް، ހިންގާ ޤަވާއިދާ ޚިލާފަށް ކަންތައް ކުރުމަކީ، ފިޔަވަޅު އަޅަން ޖެހޭނެ ކަމެކެވެ. އެއީ ރަޖިސްޓްރާ އަކަށް ހުންނަވާ ބޭފުޅެއްގެ މަސްއޫލިއްޔަތެއް ކަމަށާއި، އެފަދަ ޙާލަތެއްގައި ފިޔަވަޅު އެޅުމަކީ މަޖުބޫރު ކަމެއް ކަމަށް ވެސް އާޒިމް ވިދާޅުވި އެވެ.
މީގެ އިތުރުން އާޒިމް ވިދާޅުވީ އެފްއޭއެމްގެ އެތެރޭގައި އެތަނުގެ އިސްވެރިން ކޮރަޕްޝަންގެ އަމަލު ހިންގަމުންދާއިރު، އެއީ ޖިނާއީ ކުށެއް ކަމަށެވެ. އެހެންކަމުން އެކަންކަން ބެލުމަށް ފުލުހުންނަށް އެ އެސޯސިއޭޝަނަށް ވަދެ، އެކަންކަން ބެލޭނެ ކަމުގައި އާޒިމް ވިދާޅުވި އެވެ. އެކަމަކީ ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި އޭޝިއަން ފުޓުބޯލް ކޮންފަޑެރޭޝަން (އޭއެފްސީ) އިން ވެސް ވަރަށް ބޮޑަށް ބާރުއަޅާނެ ކަންތައްތަކެއް ކަމަށް އާޒިމް ވަނީ ވިދާޅުވެފަ އެވެ. އެފަދަ ޙާލަތުގައި ފުލުހުން ވަދެ، އެ ކޮރަޕްޝަންގެ ކަންކަން ހުއްޓުވުމަކީ ފީފާ އިން ވެސް ޤަބޫލު ކުރާނެ ގޮތެއް ކަމަށް އާޒިމް ވިދާޅުވި އެވެ. ސަބަބަކީ ފީފާގެ ޤަވާއިދުގައިވާ ގޮތުން، ބާރު ނުފޯރުވޭނީ އެ އިދާރާއެއްގެ ހިންގުމަށް ކަމަށްވާތީ އާއި، ފުލުހުން ވަނުމަކުން ހިންގުމުގެ އެއްވެސް ކަމަކަށް އަސަރު ނުފޯރާނެތީ އެވެ.
އެމީހުން (އެފްއޭއެމްގެ އިސްވެރިން) އެތާ އެތެރޭގައި ކޮރަޕްޝަންގެ އަމަލު ހިންގަނީ. އެއީ ޖިނާއީ ކުށެއް. އެ ކުށް ބަލަން ފުލުހުންނަށް ވަދެވޭނެ، އެއީ އެކަމަށް އެންކަރޭޖު ކުރާނެ. އެއީ ވަރަށް ބޮޑަށް ފީފާ ވެސް އޭއެފްސީ ވެސް ޤަބޫލު ކުރާނެ ކަންކަން. އެތަނެއްގެ ތެރޭގައި ޖިނާއީ ކަންކަން ކުރަންޏާ ހުއްޓުވުން. އެހެންވީމާ އެއީ އެތަންތަނުން (ފީފާ އަދި އޭއެފްސީ) ޤަބޫލު ކުރާނެ ކަންކަން. ފީފާ، އޭއެފްސީ ނުވަތަ އޮލިމްޕިކް ޗާޓަރުގައި އޮންނަނީ އެމީހުންގެ ހިންގުމަށް އެއްވެސް ވަރަކަށް ނުފޫޒު ފޯރުވައިގެން ނުވާނޭ. މިއީ ހިންގުމުގެ މައްސަލައެއް ނޫންތާ. ހިންގުމަށް ނުފޫޒު ފޯރައިފި ނަމަ، ސަސްޕެންޑު ކުރާނެ.އަލީ އާޒިމް / އެފްއޭއެމްގެ ފުރަތަމަ އިންތިޚާބީ ރައީސް
އިތުރަށް އާޒިމް ވިދާޅުވީ ފުލުހުން އެފްއޭއެމަށް ވަދެގެން، ރާއްޖެ ސަސްޕެންޑު ކުރާނެ އެއްވެސް ޙާލަތެއް ނާންނާނެ ކަމަށެވެ. ނަމަވެސް، މިވަގުތު ރާއްޖެ ސަސްޕެންޑު ކުރުމަކީ، ފުޓުބޯޅަ އަށް ލިބޭ ގެއްލުމަށްވުރެ ބޮޑަށް، ފައިދާވާނެ ކަމެއް ކަމަށް އާޒިމް ވަނީ ވިދާޅުވެފަ އެވެ. އެއީ ގޯހުން ގޯހަށް ގޮސްފައިވާ ކަންކަން ރަނގަޅު ކުރުމަށް ލިބޭނެ ފުރުސަތެއް ކަމަށް އާޒިމް ދެކިލައްވަ އެވެ. ސަސްޕެންޑު ކުރުމާއެކު އިންޓަރިމް މަރުހަލާއެއް އަންނާނެ ކަމަށާއި، މިހާރު ބޭނުންވާ ގޮތަށް ކަންކަން ބަދަލުކުރުމުގެ ފުރުސަތު އެމީހުންނަށް އޮންނާނެ ކަމަށް އާޒިމް ފާހަގަކުރެއްވި އެވެ. އެހެންކަމުން އެއީ މައްސަލަ ދިމާވެފައި ވަނިކޮށް، ލިބިގެންދާނެ ވަރަށް ބޮޑު ކުރިއެރުމެއް ކަމަށް އާޒިމް ވިދާޅުވި އެވެ. އިތުރަށް އާޒިމް ވިދާޅުވީ ހުރިހާ ކުލަބުތަކެއް ގުޅިގެން ފުޓުބޯޅައިގެ ޙާލަތު ރަނގަޅު ކުރުމަށް މަސައްކަތް ކުރަން ޖެހޭ ކަމަށެވެ.
އެފްއޭއެމާ ދެކޮޅަށް ކުރިއަށް ގެންދާ ތަހުގީގާ ގުޅިގެން މި ހަފްތާގެ އާދީއްތަ ދުވަހު ފުލުހުން ވަނީ އެފްއޭއެމްގެ އޮފީހަށް ވަދެފަ އެވެ. ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފައިވާ ގޮތުގައި، އެފްއޭއެމަށް އެކި ފަރާތްތަކުން ދެމުން އަންނަ ފައިސާތަކަށް އެ އިދާރާގެ އިސްވެރިން ޚިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތު ކުރެވޭ މައްސަލައިގެ އެއްވެސް ހިސާބެއްގައި މަނީ ލޯންޑަރިން، ވައްކަން، ޚިޔާނާތް އަދި މަކަރާއި ހީލަތް ނުވަތަ އެ ނޫން ވެސް ޖިނާއީ ކުށެއްގެ މައްސަލައެއް ހިނގަމުންދާނަމަ، އެ ކަމެއް ތަޙުގީގުކޮށް، އެ މައްސަލައިގައި ދަޢުވާއެއް ކުރެވެން އޮތް ބައެއްގެ މައްޗަށް ދަޢުވާ ކުރުމަށް ފޮނުވައި ދިނުމަށް އެދޭ ކަމަށެވެ.
މައުލޫމާތު ލިބިފައިވާ ގޮތުގައި އެފްއޭއެމާ ދެކޮޅަށް ފުލުހުން ކުރަމުން ދަނީ ސީރިއަސް ތުހުމަތު ތަކެކެވެ. އެގޮތުން އެ އިދާރާ އަށް އެކި ގޮތް ގޮތުން ލިބެމުން އަންނަ ފައިސާ، އިދާރާގެ އިސްވެރިންނާއި، އިސްވެރިންނާއި ގާތް ގުޅުން އޮތް ފަރާތްތަކުގެ އިތުރުން، އެކި އެކި ކުންފުނިތަކަށް ވެސް ވަނީ ޖަމާކޮށްފަ އެވެ. ނަމަވެސް މިކަންކަމާ ގުޅިގެން މިހާތަނަށް އެފްއޭއެމުން އެއްވެސް ވާހަކައެއް ދައްކައިފައެއް ނުވެ އެވެ.
