ބްރައިޓަން ބަލިކޮށް، އިނގިރޭސި ޕްރިމިއަރ ލީގުގައި ވިދިވިދިގެން ތިން ބަލި ނުވެ ޗެމްޕިއަން ސިޓީ ސަލާމަތްވެއްޖެއެވެ.

ބްރައިޓަންއާ ދެކޮޅަށް އަމިއްލަ ދަނޑުގައި ނިކުތުމުގެ ކުރިން ލީގުގައި ސިޓީން އެންމެ ފަހުން ކުޅުނު ދެމެޗުގައި ވަނީ ރަށުން ބޭރުގައި ވުލްވްސްއާއި އާސެނަލް އަތުން ބަލިވެފައެވެ. ތިންވަނަ ބައްޔެއް ނުވެ ސަލާމަތްވީ ފުރަތަމަ ހާފްގައި ބްރައިޓަން ކޮޅަށް ޖެހި ދެ ގޯލުން މޮޅުވެގެންނެވެ. މެޗު ސިޓީން ކާމިޔާބުކުރީ 2-1 ނެވެ. ސިޓީގެ ދެ ލަނޑު ފުރަތަމަ ހާފްގައި ޖެހީ އަލްވަރޭޒްއާއި ހާލަންޑެވެ. ފުރަތަމަ ލަނޑު އަލްވަރޭޒް ޖެހީ މެޗު ފަށައިގެން 7 ވަނަ މިނިޓްގައެވެ. އަދި ހާލަންޑް ލަނޑު ޖެހީ 19 ވަނަ މިނިޓްގައެވެ.

ފުރަތަމަ ހާފްގައި ސިޓީން ގިނަވަގުތު ބޯޅަ ހިފަހައްޓައިގެން ކުޅުނު ނަމަވެސް ދެވަނަ ހާފްގައި ފެނުނީ ތަފާތު ގޭމެކެވެ. ބްރައިޓަން ގިނަވަގުތު ބޯޅަ ހިފަހައްޓައިގެން ކުޅުނެވެ. ބްރައިޓަންއިން ލަނޑު ޖެހީ ސިޓީއަށް ލިބުނު ރަނުގެ ފުރުޞަތެއް ބޭނުން ނުކުރެވި ގެއްލިގެން ދިޔަ ބޯޅައިގައި ކައުންޓަރ އެޓޭކަށް އަރައެވެ. ބާސެލޯނާއިން ބްރައިޓަންއަށް ބަދަލުވި އަންސޫ ފާޓީ ލަނޑު ޖެހިއިރު ސިޓީގެ ހަތަރު ޑިފެންޑަރުން އޭރިޔާ ތެރޭގައި ތިއްބެވެ. އެކަމަކު ބޯޅަ ގޯލަށް ވަންއިރު ކީޕަރު ސްޓެފަން އަށްވެސް އެއްވެސް ކަމެއް ނުކުރެވުނެވެ. ސިޓީން މެޗު ނިންމާލަން ޖެހުނީ ދިހަ ކުޅުންތެރިންނާއެކުއެވެ. އެއީ މެޗުގެ އިތުރު ވަގުތުގައި އަކަންޖީއަށް ދެވަނަ ރީނދޫ ކާޑާއެކު ރަތްކާޑް ދެއްކުމުންނެވެ.

މިމޮޅާއެކު ސިޓީއަށް ވަނީ ވަގުތ ގޮތުން ތާވަލްގެ އެއްވަނަ ލިބިފައެވެ. އެއީ 9 މެޗުން 21 ޕޮއިންޓް ހޯދައިގެންނެވެ. އެކަމަކު ހޮނިހިރު ދުވަހުގެރޭ އާސެނަލް އިން ޗެލްސީ ބަލިކޮށްފި ނަމަ, ސިޓީއަށް އެއްވަނަ ގެއްލި އެމަގާމް އާސެނަލް އަށް ލިބޭނެއެވެ.