ދިރިއުޅުމުގެ މައިދާނުގައި ކުރިމަތިލާން ޖެހޭ ގޮންޖެހުންތަކާއި ހުރަސްތައް ގިރާ ކުރުމަށް ބޭނުންވަނީ ހިތުގެ ސާބިތުކަމާއި އަމިއްލަ ނަފުސަށް އޮންނަ އިތުބާރުކަން މި ދުވަސްވަރު އެންމެ ސާފުކޮށް ފެންނަން އޮތް އެއް މަންޒިލަކީ، ފަލަސްޠީނުގެ ޣައްޒާއެވެ. ޔަހޫދީ އިޒްރޭލުން ދެމުން ދާ، ތާރީޚު ދެކެފައި ނުވާ ފަދަ ރަޙުމެއް ނެތް ޢުދުވާންތަކުގައި ޣައްޒާ ހަފުސްވެފައި ވާ އިރުވެސް، އެ ރަށުގެ އަހުލުވެރިންގެ ފަރާތުން، ފަސްޖެހުމާއި މާޔޫސްކަމުގެ ކުޑަ ނަމަވެސް އަސަރެއް ނުފެނެއެވެ. ގިސްލަގިސްލާ ރޯ މަންޒަރު ފެނުނު ކަމުގައި ވީ ނަމަވެސް، އަމިއްލަ ފައިމައްޗަށް ތެދުވެ، ލެއްވި ޙާލެއްގައި ދިރިއުޅުމައިގެން ކުރިއަށް ދިއުމުގައި ޣައްޒާޣެ ރަށްވެހިން ދައްކަމުން ދަނީ މުޅި ދުނިޔެއަށްވެސް ލާމަސީލު މިސާލެކެވެ.

އިޒްރޭލުން ވަނީ ދިރިއުޅުމަށް ބޭނުންވާ އެންމެ އަސާސީ ޚިދުމަތްތަކުންވެސް ޣައްޒާ މަޚްރޫމު ކޮށްފައެވެ. ފެނެއް ކަރެންޓެއް ނެތެވެ. 2.3 މިލިއަން މީހުންގެ އާބާދީއެއް އޮތް ޣައްޒާގެ 80 ޕަސެންޓް މީހުންނަކީ، އިޒްރޭލުގެ ފަހުގެ ޢުދުވާންތައް ފެށުމުގެ ކުރިންވެސް ބައިނަލްއަޤުވާމީ އެހީއަށް ބަރޯސާވެގެން އުޅުނު ބައެކެވެ. ނަމަވެސް، ޣައްޒާއަށް އެހީ ފޯރުކޮށްދެވެން އޮތް ހުރިހާ ދޮރެއްގައި އިޒްރޭލުން އަތް އަޅައިގެން އޮތް އިރު، ޣައްޒާއަށް ބޭނުން ވާ އެހީގެ ސާމާނުވެސް އެތެރެ ކުރެވޭނެ ގޮތެއް ނެތެވެ.

ދިރިހުރުމަށްޓަކައި ކައިބޮއި ހެދުމަކީ ޛަރޫރީ ޙައްޤަކަށް ވާ އިރު، އެމީހެއްގެ ކެރިފޯރުންތެރިކަން ހުރި މިންވަރަކުން ޣައްޒާގެ ކޮންމެ ރަށްވެއްސަކުވެސް ދަނީ ކެއިންބުއިމުގެ ކަންކަން ހަމަޖައްސަމުންނެވެ. ހަމަ އެކަނި އަމިއްލަ ނަފުސަކަށް ނޫނެވެ. ތަނަވަސްކަން ހުރި މިންވަރަކުން، އެހެން މީހުންނަށްވެސް އެހީތެރިކަން ފޯރުކޮށްދެމުންނެވެ.

ޣައްޒާއިން ތެޔޮ ހުސްވެފައި ވާ މި ދަނޑިވަޅުގައި، އެއްޗެއް ކައްކާލެވޭނެ ގޮތެއް ނެތޭ ކިޔައި، ދެ އަތް ބޮލުގައި އަޅައިގެން ރޯން އިނުމުގެ ބަދަލުގައި، ކައިބޮއި ހެދޭނެ އިންތިޒާމު ހަމަޖެއްސުމުގައި އެންމެ ސާބިތު ކަމާއެކީ ތެދުވެ ހުރި އެކަކީ މުޙައްމަދު އަލް-އަޔާލްއެވެ.

ހުރިހާ ކޮޅަކުން ބައްދާލާފައި އޮތް ޣައްޒާއިން ކާބޯތަކެތި ވަނީ މުޅިން ހެން ހުސްވެފައެވެ. ހުރި މަދު އެތިކޮޅުން ފުއްދާލައިގެން، ވީހާވެސް ގިނަ ބަޔަކަށް އެހީތެރިކަން ފޯރުކޮށްދިނުމުގައި އަޔާލް ދައްކަމުން ދަނީ ރީތި މިސާލެކެވެ.

ޣައްޒާގައި އަޔާން ހިންގާ ބޭކަރީގައި މިއަދު ބޭނުން ކުރަނީ ދަރު އުނދުނެވެ. ކަރަންޓުގެ ޚިދުމަތް މެދުކެނޑިފައި އޮތުމާއި، ޖަނަރޭޓަރުތަކަށް އަޅާނެ ތެޔޮ ފޮދެއްވެސް ނުލިބުމުގެ ސަބަބުން، މިއަދު އަޔާލްއަށް އެނޫން ގޮތެއް ނެތުނީއެވެ. ދަރު އުނދުނުގައި އިހު ޒަމާނުގައިވެސް ބޭނުން ކޮށް އުޅުނު އެއްޗަކަށް ވީ އިރު، މިއަދު އޭގެ ބޭނުން ނުކުރާންވީ ސަބަބެއް ނެތެވެ. ޚާން ޔޫނިސްގެ ރަށްވެހިންނަށް ބޭނުންވާ ޕާން ސަޕްލައި ކޮށްދިނުމުގެ މަސައްކަތުގައި، އަޔާލް މިއަދު މުޅިންވެސް ބޭނުން ކުރަނީ ދަރު ޖައްސައިގެން ފިހާ އަވަންތަކެވެ.

2007 ވަނަ އަހަރު ފަލަސްޠީނުގައި ހިނގާދިޔަ ދާޚިލީ ދެބަސްވުންތަކަށް ފަހު ޣައްޒާ ކޮންޓްރޯލް ކުރަމުން ދާ ހަމާސް ޖަމާޢަތުން، އަމިއްލަ ވަޒަނުގެ މިނިވަން ކަމަށްޓަކައި، އޮކްޓޯބަރ 7 ވަނަ ދުވަހު އިޒްރޭލަށް ދިން ޙަމަލާތަކުގެ ރައްދުގައި ކަމަށް ބުނެ، ޔަހޫދީން ދޭން ފެށި ޢުދުވާނީ ޙަމަލާތަކުގައި ފަލަސްޠީނުން 3000 އަށް ވުރެ ގިނަ މީހުންގެ ފުރާނަ ވަނީ ގެއްލިފައެވެ. އޭގެ 4 ބައިކުޅަ 1 ބަޔަކީ ކުޑަ ކުދިންނެވެ. އެތައް ހާސް ބަޔަކު ޒަޚަމްވެފައި ވާ އިރު، ގުނަ ޢަދަދުވެސް ނުކުރެވޭހާ ގިނަ ބައެއްގެ ގެދޮރު ވަނީ ގެއްލިފައެވެ. އިންސާނަކަށް ވީތީ ލިބިދޭންޖެހޭ ދިރިހުރުމުގެ ޙައްޤާއި، ދިރިއުޅުމުގެ އެތައް ޙައްޤަކުން ޣައްޒާގެ ރައްޔިތުން އެކަހެރި ކޮށްފައި ވާ އިރު، އެކަމަށް ބަހެއް ބުނެލުން ފިޔަވައި، ޢަމަލީ ސިފައެއްގައި ރައްދު ދޭނެ އިތުރު ބަޔަކު ބައިނަލްއަޤުވާމީ ސިޔާސީ މައިދާނުން ފެންނާކަށް ނެތެވެ.