ބްރެޒިލްގެ ކެޕްޓަން ނޭމާ އަށް އަނެއްކާވެސް އަނިޔާވެ, ކުޅުމާ ދުރަށް ދާން ޖެހިއްޖެއެވެ.

ނޭމާއަށް އަނިޔާވީ އަންގާރަ ދުވަހު ވަރލްޑްކަޕް ކޮލިފައިންގައި އުރުގުއޭ އަތުން 2-0 ން ބަލިވި މެޗުގައެވެ. އަނިޔާގެ ސަބަބުން އަށިގަނޑުގައި ދަނޑުން ބޭލިއިރު އޭނާ ދިޔައީ ރޮމުންނެވެ. މިއަނިޔާއާ ގުޅިގެން ވައަތު ފައިގެ ކަކޫ ލިގަމެންޓް އޮޕަރޭޝަން ކުރަން ޖެހޭކަން ބްރެޒިލްގެ ފުޓްބޯޅަ ފެޑެރޭޝަނުން ވަނީ ޔަޤީންކޮށްދީފައެވެ. ނަމަވެސް އޮޕަރޭޝަނާއެކު ނޭމާ ކުޅުމާ ދުރުގައި ހޭދަކުރަން ޖެހޭނީ ކިހާ މުއްދަތެއްކަން އަދި ސާފެއް ނޫނެވެ.

ބްރެޒިލް ގައުމީ ޓީމަށް އެންމެ ގިނަ ލަނޑު ޖަހައިދީފައިވާ ފޯވާޑަށް މިދިޔަ ދެ ސީޒަންގައިވެސް އަނިޔާގެ ސަބަބުން އެންމެ އެދެވޭ ކުޅުންވެސް ނުދެއްކެއެވެ. އަނިޔާގެ ސަބަބުން ސީޒަންގެ ބޮޑު ބައެއް ކުޅުމާ ދުރުގައި ހޭދަކުރަން ޖެހެއެވެ. 31 އަހަރުގެ ފޯވާޑް ވަނީ މިދިޔަ ސީޒަނަށްފަހު ޕީއެސްޖީ ދޫކޮށް, ސައޫދީ އަރަބިޔާގެ އަލް-ހިލާލަށް ބަދަލުވެފައެވެ. އެންމެ ފަހުން ނިމުނު ވަރލްޑްކަޕްގައި ބްރެޒިލް ކުޅުނު ފުރަތަމަ މެޗުގައި ލިބުނު އަނިޔާގެ ސަބަބުން ޖެހިގެން އައި ދެ މެޗުގައިވެސް ނޭމާ އަށް ނުކުޅެވުނެވެ. 2014 ވަނަ އަހަރު ބްރެޒިލްގައި އޮތް ވަރލްޑްކަޕްގައި ވެސް ނޭމާ އަށް އަނިޔާ ވިއެވެ.