ބީއެމްއެލުން، ރީސައިކަލް ކޮށްފައިވާ ތަކެތި ބޭނުންކޮށްގެން ހަދާފައިވާ ކާޑުތަކެއް ތައާރަފުކޮށްފި
18 އޮކްޓޯބަރު 2023 | ބުދަ 11:18މި ކާޑުތަކުގައި ބޭނުންކޮށްފައިވަނީ ރާއްޖޭގެ ފޮޓޯގްރާފަރުން ނަގާފައިވާ ފޮޓޯތައް
ބޭންކް އޮފް މޯލްޑިވްސްއިން، ރީސައިކަލް ކޮށްފައިވާ މެޓީރިއަލްގައި ޕްރިންޓްކުރި ކާޑުތައް
ރީސައިކަލް ކޮށްފައިވާ ތަކެތި ބޭނުންކޮށްގެން ތައްޔާރުކޮށްފައިވާ ކާޑުތަކެއް، ބޭންކް އޮފް މޯލްޑިވްސް (ބީއެމްއެލް)އިން ތައާރަފުކޮށްފިއެވެ.
މި ކާޑުތަކަކީ ރާއްޖޭގެ ގުދުރަތީ ރީތިކަން ދައްކުވައިދޭގޮތަށް، ރީސައިކަލް ކޮށްފައިވާ މެޓީރިއަލްގައި ޕްރިންޓްކޮށްފައިވާ ކާޑުތަކެކެވެ.
ބީއެމްއެލްގެ ސީއީއޯ އަދި މެނޭޖިންގ ޑައިރެކްޓަރު ކާރލް ސްޓުމްކަ ވިދާޅުވީ، ރާއްޖޭގެ ގުދުރަތީ ރީތިކަން މި ކާޑުތަކުގެ ޒަރީއާއިން ދައްކުވައިދިނުމަކީ، އަންނަން އޮތް ޖީލުތަކަށް ރާއްޖޭގެ ރީތި، ނަމަވެސް ނާޒުކު ވެށި ހިމާޔަތްކުރުމަށް ޒިންމާދާރުކަމުގެ އިހުސާސް އުފެއްދުމަށް އެހީތެރިވުމަށް ބޭންކަށް ލިބޭ ފުރުސަތެއް ކަމަށެވެ. އަދި އަލަށް ތައާރަފްކުރި ކާޑުތައް އުފައްދާފައިވަނީ ރީސައިކަލް ކޮށްފައިވާ ޕްލާސްޓިކުގައި ކަމަށާއި، މިއީ ވިޔަފާރީގައި ދެމެހެއްޓެނިވި ގޮތެއްގައި ކަންކަން ކުރުމަށް ކުރަމުން އަންނަ މަސައްކަތެއްކަން އޭނާ ފަހަގަކުރެއްވިއެވެ.
އަލަށް ތައާރަފްކުރި ކާޑުތަކުގައި ބޭނުންކޮށްފައިވައިނީ ރާއްޖޭގެ ފޮޓޯގްރާފަރުން ނަގާފައިވާ ފޮޓޯތައް ކަމަށް ބީއެމްއެލުން ބުނެއެވެ. މި ފޮޓޯތަކުން ދައްކުވައިދެނީ ރާއްޖޭގެ ރަށްތަކުން ފާހަގަކުރެވޭ ރެދަނާއި މުރަކައިގެ ތަފާތު ރީތި މަންޒަރުތަކެވެ.
މި އައު ޑިޒައިންތަކަކީ ބޭންކުގެ ވިސާ އަދި މާސްޓަރ ކާޑުގެ ޑެބިޓް އަދި ކްރެޑިޓް ކާޑަށް ތައާރަފްކުރި ޑިޒައިންތަކެކެވެ. ބީއެމްއެލް ވިސާ ކްރެޑިޓް ގޯލްޑް ކާޑާއެކު، އަލަށް ތައާރަފްކުރި ކާޑުތައް ބުދަ ދުވަހުން ފެށިގެން ދޫކުރާނެ ކަމަށް ބީއެމްއެލުން ބުނެއެވެ.
