"ކޮންމެ ދޫލައެއްގައިވެސް ދިރުމެއް ވޭ، މާޒީއެއް އޮވޭ...ބަލަނީ އެކަމާ ގުޅާލެވޭތޯ"

އެކަކަށް ކަމުނުގޮސްގެން ދޫކޮށްލާ އެއްޗަކީ، އަނެކާގެ ނަޒަރުގައި އަގުހުރި އެއްޗަކަށް ވެދަނީ މަދު ފަހަރަކު ނޫނެވެ. ބިނާ ކުރަނިވި ނަޒަރަކުން ދުނިޔެ ދުށުމަށް ސިކުނޑި ހާނުވާފައި ވާ މީހަކަށް، ހީވެސް ނުކުރާ ފަދަ އެއްޗެއްގެ ބޭނުން، އާދަޔާ ޚިލާފު ގޮތަކަށް ހިފިވެސް ދާނެއެވެ. ސޫރިޔާގެ ފަންނުވެރިއެއް ކަމަށް ވާ މުޙައްމަދު އަލް-ޢަލަބީގެ ވާހަކައަކީވެސް ހަމަ އެކަހަލަ ވާހަކައެކެވެ.

ޢަލަބީގެ ފަންނުވެރިކަން ގުޅިފައި އޮންނަނީ ބާވެ، ހަލާކުވެގެން މީހުން ދޫކޮށްލާ އެކި ކަހަލަ ކުނަލާއި ދޫލަތަކާއެވެ. ބަލާ ބެލުމަށް އެއީ ކިތަންމެ ބާވެ، ހަޑިވެފައި ވާ ކުނާ ނުވަތަ ދޫލަތަކެއް ކަމަށް ހީވި ނަމަވެސް، ޢަލަބީގެ އަތުގައި ޖެހޭ ހިސާބުން މަންޒަރު މުޅިން ބަދަލު ކޮށްލައެވެ. ފަނޑުވެ، ކުލަ މަރުވެފައި ވާ އެއްޗަކަށް، އުޖާލާ ވިދުވަރެއް ގެނެސްދެއެވެ. ބޭނުން ނެތިގެން އުކާލާ ފޮތްފޮތުންވެސް ޢަލަބީ ކުރަނީ ހަމަ މިފަދަ ކަމެކެވެ. އެއް ބަޔަކު ބޭނުން ނެތިގެން އުކާލާ ފޮތްފޮތުން ޞަފުޙާތައް ނަގައިގެން ޢަލަބީ ތައްޔާރު ކުރަނީ ކޮލާޖެކެވެ. އޭނާގެ ކުރެހުމުގެ ފަންނުވެރިކަމުގައި ހުރި ފެންވަރު ދައްކާލަނީ އޭގެ ފަހުންނެވެ.

ޢުމުރުން 52 އަހަރުގެ ޢަލަބީ ޤަބޫލު ކުރާ ގޮތުގައި، އޭނާގެ މި އީޖާދީ ފަންނުވެރި ޚިޔާލުގެ ސަބަބުން އުފެދިގެން ދަނީ ހަމަ އެކަނި އާދަޔާ ޚިލާފު އުފެއްދުންތަކެއް ނޫނެވެ. އެ މަސައްކަތަކީ، ވެށީގެ ދިރުން ހިމާޔަތް ކުރުމަށްވެސް އެހީވެދޭ މަސައްކަތެއް ކަމަށް ޢަލަބީ ސިފަ ކުރެއެވެ.

ޢަލަބީގެ މަސައްކަތް ރާވަލަނީ، އެ މަސައްކަތަކަށް އޭނާ ބޭނުން ކުރާ ކުނާ ނުވަތަ ދޫލައިގެ އަސްލު ފަރުމާތައް އަސްލަކަށް ބަލައިގެންނެވެ. އެ އެއްޗަކުން ބުނެދޭ ވާހަކަތައް އަޑު އަހައިގެންނެވެ. އެ ކުނާ ނުވަތަ ދޫލައިގެ ތާރީޚާއި މާޒީއަށްވެސް އަލިއަޅުވާލެވޭ ގޮތަށެވެ.

އުކާލާފައި ހުންނަ ސާމާނުގެ ތެރެއިން، އަލުން ބޭނުން ކުރެވޭ ގޮތަށް ހުންނަ އެއްޗެހި ބޭނުން ކޮށްގެން ޢަލަބީ ކުރަމުން ދާ މަސައްކަތުގެ ސަބަބުން، ކުރެހުމުގެ ފަންނުވެރި ކަން ކުރިއެރުވުމަށް އޭނާގެ ޖީބުން ކުރަން ޖެހޭ ޚަރަދުތަކަށްވެސް ލުއި ލިބިގެން ދެއެވެ. ކުރެހުމަށް ބޭނުންވާ އައު ސާމާނު ގަތުމަކީ މިއަދު ސޫރިޔާގައި އިންތިހާއަށް ދަތި ކަމެކެވެ. ސޫރިޔާގެ ފައިސާގެ އަގު، ދުވަހަކަށް ވުރެ ދުވަހަށް ދަށަށް ދާ ދިއުމަކީ، އެފަދަ ޚަރަދުތައް ކުރުމަށް ޢަލަބީ ފަދަ ފަންނުވެރިންނަށް އެޅޭ ބޮޑު ހުރަހެކެވެ.

ޢަލަބީ މިހާރުވެސް ވަނީ އޭނާގެ މަސައްކަތްތެރިކަމާއި ފަންނުވެރި ކަމުގެ ހުނަރު ދައްކާލުމަށްޓަކައި، ސޫރިޔާއާއި ސޫރިޔާއިން ބޭރުގައި ކުރިއަށް ގެންދިޔަ ގިނަ ޢަދަދެއްގެ މައުރަޒުތަކުގައި ބައިވެރިވެފައެވެ.