މިއަހަރުގެ މެއި މަހުގެ 24 ވަނަ ދުވަހުގެ ނިޔަލަށް ސަރުކާރުން އެކިފަރާތްތަކަށް ގެއްލުމުގެ ބަދަލުގެ ގޮތުގައި 95.5 މިލިއަން ރުފިޔާ ދައްކާފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.
އެމިނިސްޓްރީން އާންމުކޮށްފައިވާ "ފިސްކަލް ހިރާސްތަކުގެ ބަޔާން 2023" ބުނެފައިވަނީ މީގެތެރޭގައި ހިމެނެނީ ނ. މާފަރު އެއާޕޯޓް ތަރައްގީކުރުމުގެ މަސައްކަތްކުރި ކޮންޓްރެކްޓަރ ސިންގަޕޫރު އާބިޓްރޭޝަނަށް ހުށަހެޅި މައްސަލައާ ގުޅިގެން ދައުލަތުން ދައްކަން ހުކުމްކޮށްފައިވާ 92.5 މިލިއަން ރުފިޔާ އާއި، ޓްރައިބިޔުނަލް އަދި ސިވިލް ސަރވިސް ކޮމިޝަނުން މިނިސްޓްރީ އޮފް ހައުސިންގ އެންޑް އިންފްރާސްޓްރަކްޗަރ ހިންގަމުންދިޔައިރު އެ މިނިސްޓްރީގައި މަސައްކަތްކުރި މުވައްޒަފުންނަށް "ސްޕެޝަލް ޑިއުޓޫ އެލަވަންސް" ގެ ގޮތުގައި ނުދައްކާ ހުރި ފައިސާ ކަމަށެވެ.
މިނިސްޓްރީން ބުނެފައިވަނީ އަހަރުގެ ބާކީ ހުރި މުއްދަތުގައި އާބިޓްރޭޝަންގެ އެކި މައްސަލަތަކަށާއި ކޯޓު ހުކުމްތަކާއި ގުޅިގެން ސަރުކާރުން އެކި ފަރާތްތަކަށް ފައިސާ ދައްކަން ޖެހިއްޖެނަމަ އިތުރަށް ބަޖެޓް ބޭނުންވާނެކަމަށެވެ.
މިނިސްޓްރީން އިތުރަށް ބުނެފައިވަނީ ދައުލަތުގެ ބަޖެޓުން އެކި ފަރާތްތަކަށް ގެއްލުމުގެ ބަދަލުގެ ގޮތުގައި ދޭންޖެހޭ ފައިސާގެ އަދަދު ފާއިތުވި އަހަރުތަކުގައި ވަނީ އިތުރުވަމުން އައިސްފައިކަމަށެވެ. އެގޮތުން 2019 ވަނަ އަހަރު ދައުލަތުން 1،428.7 މިލިއަން ރުފިޔާ ގެއްލުމުގެ ބަދަލުގެ ގޮތުގައި އެކި ފަރާތްތަކަށް ދީފައިވާއިރު 2021 ވަނަ އަހަރު އެއަދަދު ހުރީ 203.1 މިލިއަން ރުފިޔާގައެވެ. އަދި 2022 ވަނަ އަހަރު ޚަރަދުކޮށްފައިވަނީ 30.4 މިލިއަން ރުފިޔާއެވެ.
މިނިސްޓްރީން ބުނީ 2019 ވަނަ އަހަރު މައިގަނޑު ގޮތެއްގައި އިތުރުފައިވަނީ ނޫމަޑި ޕްރައިވެޓް ލިމިޓެޑާއި ދިވެހި ސަރުކާރާ ދެމެދު ތަރައްގީގެ އެކި މަޝްރޫޢުތައް ގާއިމުކުރުމުގެ މަސައްކަތް ކުރިޔަށް ގެންދިޔުމަށް ސޮއިކުރި އެއްބަސްވުމާއި ގުޅިގެން ދިމާވި މައްސަލަތައް ހައްލުކުރުމަށް އާބިޓްރޭޝަން ކުރިޔަށް ގެންދިޔުމަށް އަލްޓަނޭޓް ޑިސްޕިއުޓް ރިޒަލިއުޝަން ކޮމިޓީއަށް ހުށަހަޅައިގެން ސެޓެލްމަންޓް އެގްރިމެންޓާއި އެއްގޮތަށް ދައްކަންޖެހޭ ފައިސާ އިތުރުވުމުންކަމަށެވެ. އެގޮތުން 2019 ވަނަ އަހަރު އިތުރުވި ޚަރަދުތަކަށް ފައިސާ ދައްކާފައިވަނީ އެއަހަރު ފާސްކުރި ބަޖެޓް ސަޕްލިމެންޓުންކަމަށާއި އެއަހަރު ހިނގި ހަރަދުތައް އިތުރުވުމާއެކު ވިދިގެން އައި އަހަރުތަކުގައި މިބަޔަކަށް ބަޖެޓް ކޮށްފައިވާ އަދަދު ވަނީ އިތުރުވެފައިކަމަށް ފިނޭންސް މިނިސްޓްރީން ބުނެއެވެ.
މީގެއިތުރުން ފިނޭންސް މިނިސްޓްރީން ބުނީ ފާއިތުވި އަހަރު ތަކުގައި ގެއްލުމުގެ ބަދަލުގެ ގޮތުގައި ބަޖެޓްކުރެވޭ މިންވަރު އެއް މިންގަނޑެއްގައި ހިފެހެއްޓިފައިވީ ނަމަވެސް، ދައުލަތުން އެކި ފަރާތްތަކަށް ގެއްލުމުގެ ބަދަލުގެ ގޮތުގައި ދައްކަންޖެހޭ ފައިސާއަކީ ކޯޓާއި ޑިސްޕިއުޓް ރިޒޮލިއުޝަން އެކި މަރުހަލާތަކުން އަދަދު ކަނޑައެޅޭ ހަރަދުތަކެއްކަމުން މައްސަލަ ނިމޭނެ ވަގުތެއް އަދި މިއަދަދުގެ އަންދާޒާކުރުމަކީ ދަތިކަމެއްކަމަށެވެ. އެހެންކަމުން ބަޖެޓްގައި ހިމެނިފައިނުވި ނަމަވެސް މިފަދަ ހަރަދުކުރަންޖެހުމުން ދައުލަތުގެ ކޭޝް ފްލޯ މެނޭޖްކުރުމަށް ދަތިވާކަމަށާއި ބަޖެޓްގެ ތެރެއިން ކުރިޔަށް ގެންދަން ބޭނުންވާ މަޝްރޫޢުތަކާއި ޕްރޮގްރާމްތައް ކުރިޔަށްގެންދިޔުމަށް ދަތިވާކަމަށް ފިނޭންސް މިނިސްޓްރީން ބުނެއެވެ.
