މާލެއާއި ހުޅުމާލޭގައި ފުލުހުން ހިންގި ޑްރަގް އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލަ މީގެ ކުރިން ބައްލަވަމުން ގެންދެވީ އެ ކޯޓުގެ ގާޒީ ދީބާނާޒް ފަހުމީއެވެ. ނަމަވެސް ދީބާނާޒް ހައިކޯޓަށް އައްޔަނު ކުރައްވާފައިވާތީ، މިހާރު މި މައްސަލަ ބައްލަވަނީ އެ ކޯޓަށް އަލަށް އައްޔަނުކުރެއްވި ގާޒީ އިބްރާހީމް އިހުސާންއެވެ.
ނެޓްވޯކެއްގެ ގޮތުގައި އޮޕަރޭޓްކޮށް ޑްރަގް ޓްރެފިކް ކުރިކަމަށް ތުހުމަތުވާ މި މައްސަލާގައި ޑައިމޯފިން ޓްރެފިކް ކުރުމުގެ ކުށުގެ ދައުވާ ދައުލަތުން މިހާރު އުފުލާފައިވަނީ ގދ. ހޯނޑެއްދޫ އިރުމަތީގެ، އަހުމަދު ސުނައިނުއާއި ގދ. ހޯނޑެއްދޫ ގުލޭނޫރަންމާގެ، އަލީ ޒުބައިރުގެ އިތުރުން، ގދ. ހޯޑެއްދޫ އަލޯރާ އަހުމަދު މުޖާހިދު މައްޗަށެވެ.
އާދީއްތަ ދުވަހުގެ އަޑުއެހުމުގައި ދައުލަތުން ހުށަހަޅާ 5 ހެއްކެއްގެ ހެކިބަސް ނެގުން އޮތެވެ. އެހެންނަމަވެސް ހެކިބަސް ދިނުމަށް ކޯޓަށް ހާޒިރުވީ 3 ހެކިވެރިންނެވެ. ބާކީ ދެ ހެކިވެރިންގެ ތެރެއިން އެކަކު ރަށުން ބޭރުގައި ހުރުމުން ހެކިބަސް ނެގިފައެއް ނުވެއެވެ. ގާޒީ ވިދާޅުވެފައިވަނީ، ކޯޓަށް އަންނަން އަންގާފައި ވަނިކޮށް ރަށުން ބޭރަށް ދާންޖެހުނު ސަބަބެއް ކޯޓަށް ލިޔުމުން ފޮނުވުމުން، ސަބަބަށް ރިއާޔަތްކޮށް އެ ހެކިވެރިޔާގެ ހެކި ނަގާނެ ކަމަށެވެ. އަދި އަނެއް ހެކިވެރިޔާ އާއިލީ ޒިންމާގައި ހުރިކަން ކޯޓަށް ވަނީ އަންގާފައެވެ. އެހެންކަމުން އެ ހެކިވެރިޔާގެ ހެކި ފަހުން ނަގާނެކަމަށް ގާޒީ ވިދާޅުވިއެވެ.
އެގޮތުން ޑްރަގް އެންފޯސްމަންޓް ޑިޕާޓްމަންޓުގައި މަސައްކަތްކުރާ ޕޮލިސް ރެކްރޫޓް މޫސާ ވަހީދު ބުނެފައިވަނީ، ކާރެއްގައި މަސްތުވާތަކެތި ގެންދަން އުޅުނުކަމުގެ މައުލޫމާތު ލިބުނު ކަމަށާއި، އެ މައުލޫމާތު ލިބުމުން އެންމެ ރަނގަޅު ލޮކޭޝަނެއްގައި ކާރު ހުއްޓުވުމަށް މަސައްކަތް ކުރި ކަމަށެވެ. އަދި ކާރު ހުއްޓުވުމަށްފަހު އޮންނަ އުސޫލުގެ ދަށުން ކަންކަން ކުރިއަށް ދިޔަ ކަމަށެވެ.
ކާރު ޑްރައިވަރާއެކު 2 މީހަކު ތިބި. ކާރުގަ ޒުބައިރު އިން ފަހަތު ޝީޓުގަ. ހުއްޓުވާފަ، ހަށިގަނޑު ބަލާ ފާސްކޮށްފަ ވޭ. އަލީ ޒުބައިރުގެ ހަށިގަނޑުން މަސްތުވާތަކެތި ނުފެނޭ. ގުޅުންހުރި ފޯނު ފެނުނު. ފޯނުގެ އިތުރުން ޕެންޑްރައިވްތަކެއް ފެނުނު. ކާރު ބަލާ ފާސްކޮށްފަ ވޭ. ކާރުގެ ފަހަތު ޑިކީ ތެރޭން، ގަވާއިދާ ޚިލާފު އެއްޗެހި ފެނިފަ ވޭ. ކާރުގެ ޑިކީ ހުޅުވީ ކާރުގަ ތިބި މީހުންނަށް ފެންނަ ގޮތަށް ފުލުހުން. ދަބަހުގަ ހުރީ ކޯޗެއްތޯ ސުވާލުކުރެވުނު. އަދި ހުޅުވި އިރު މަސްތުވާތަކެތި. ދެ ދަބަސް ފެނިފަ ވޭ، 33 ކިލޯ ހުރި. 1 ކިލޯގެ މަގުން ހުރީ ހެރޮއިން. ޕެކްކޮށްފަ ހުރީ ގިނަ ލޭޔަރތަކަށް ލައިގެން ބަންޑްލް ކުރާ އުސޫލުން. ކޮންމެ އެއްޗެއްގަ 9 ލޭޔަރު ހުރި.ޕޮލިސް ރެކްރޫޓް، މޫސާ ވަހީދު
ދެވަނަ ހެކިވެރިޔާ، ކައުންޓަރ ނާކޮޓިކްސް އޮޕަރޭޝަން ޑިޕާޓްމަންޓްގައި މަސައްކަތްކުރާ ހަސަން ޝުޖާއު ހެކިބަސް ދެމުން ބުނީ، ލިބުނު މައުލޫމާތަކާ ގުޅިގެން މއ. ކަނޑޫގެ ބަލާ ފާސްކުރިއިރު ރިމޯޓެއް ފެނިފައިވާ ކަމަށެވެ. އެއީ ޕީސީއެކްސް ސައިކަލެއްގެ ރިމޯޓް ކަމަށާއި، އެ ސައިކަލު އިނީ މެރީބްރައުން ކައިރީގައި ކަމަށެވެ. އަދި ކަނޑޫގެއަކީ އަލީ ޒުބައިރު ދިރިއުޅޭ ގެކަމަށާއި، އަލީ ޒުބައިރާއެކު ގޮސް މެރީ ބްރައުން ޕާކިން ޒޯނުން ޕީސީއެކްސްގެ މަޑިދަށް ބެލިއިރު މަސްތުވާތަކެތި އަޅާފައިހުރި 5 ރަބަރު ޕެކެޓް ފެނިފައި ވާކަމަށެވެ.
ސައިކަލު ބަލާ ފާސްކުރީ ޒުބައިރުގެ ހުއްދައާއެކު. ސައިކަލު މަޑި ދަށުން ވޮލްކޮމް ޕެކްޕެކެއްގެ ތެރެއިން 5 ރަބަރު ޕެކެޓް ފެނިފަ ވޭ. ކޮންމެ އެއްޗެއްގަ ކިލޯއެއް ހުރި. އެގަޑީގަ ކަނޑާ ބަލާފަ ވާނެ. އަލީ ޒުބައިރާ ސުވާލުކުރުމުން ބުނީ އޭނާގެ އެއްޗެއް ނޫން ކަމަށް. އަކްރަމް ކިޔާ މީހެއްގެ ސައިކަލެއް ކަމަށް.ހަސަން ޝުޖާއު، ހެކިވެރިއެއް
ތިންވަނަ ހެކިވެރިޔާ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތްކުރާ ސާޖަންޓް އަހުމަދު މާނިއު ހެކިބަސް ދެމުން ބުނެފައިވަނީ، އަލީ ޒުބައިރާއި އިތުރު ފަރާތްތައް ގުޅިގެން މަސްތުވާތަކެތީގެ ވިޔަފާރިކުރާ ކަމުގެ އިންޓެލް މައުލޫމާތު ލިބުނު ކަމަށާއި، މެރީ ބްރައުން ކުރިމަތީގައި ހުރި ސައިކަލެއް ބަލައި ފާސްކުރަން އޭނާ ދިޔަކަމަށެވެ. އަދި ފުލުހުންގެ އިންޓެލިޖެންސުން އެ މައުލޫމާތު ލިބުމުން، ސައިކަލު ހޯދާފައިވަނީ އަލީ ޒުބައިރު އެތަނަށް ގެނެސް ސުވާލުކުރުމުން، ސައިކަލާ ދިމާލަށް އިޝާރަތްކުރުމުން ކަމަށެވެ. އެގޮތުން މަސްތުވާތަކެތި ހުރި 5 ރަބަރު ޕެކެޓް މަޑި ދަށުން ފެނިފައި ވާކަމަށާއި، ސިޓީ އުރައިގައި 2 ޕެކެޓް އޮތް ކަމަށެވެ. އަދި ސީންގައި 1 ޕެކެޓް ކަނޑައި، ބަލައި ފާސްކޮށްފައި ވާކަމަށެވެ.
މި މައްސަލައިގައި ދައުލަތުން އިތުރު ހެކިންތައް ހާޒިރުކުރަން އެދިފައި ވީނަމަވެސް ބައެއް ހެކިވެރިން ހާޒިރެއްނުވެއެވެ. އެގޮތުން ފުލުސް އޮފިސަރު ސައްޔާހް ހަލީލާއި ސީނިއަރ ސާޖަންޓް މުހައްމަދު އަބްދުލް ހަކީމް ހާޒިރުކުރަން ނިންމާފައި ވީނަމަވެސް ހާޒިރުކުރެވިފައެއް ނުވެއެވެ. އަދި މުހައްމަދު އަބްދުލް ހަކީމް އާއިލީ ޒިންމާގެ ޗުއްޓީގައި ހުރުމުން އެހެން ދުވަހަކަށް ތާވަލުކުރާ ގޮތަށް ގާޒީ ނިންމިއެވެ. މި މައްސަލައިގައި އިތުރު އަޑުއެހުމެއް ހޯމަ ދުވަހު ހެނދުނު 9:00ގައި އޮންނާނެކަމަށް ގާޒީ ވިދާޅުވިއެވެ. އެގޮތުން ހޯމަ ދުވަހުވެސް 5 ހެކިންގެ ހެކިބަސް ނަގާނެކަމަށް ގާޒީ ވިދާޅުވިއެވެ.
