އިންޝުއަރެންސް ސްކީމްއަކީ މިފްކޯގެ މުވައްޒަފުންނަށް ލިބުނު ވަރަށް ބޮޑު ލުއިއެއް: ފައުޒީ
ޓެކްނިކަލް ދާއިރާއިން ތަމްރީންވާ މީހުން މަދުކަން ފާހަގަކުރަން
މިފްކޯގެ ސީއީއޯ އިސްމާއީލު ފައުޒީ
އިންޝުއަރެންސް ސްކީމްއަކީ މިފްކޯގެ މުވައްޒަފުންނަށް ލިބުނު ވަރަށް ބޮޑު ލުއިއެއްކަމަށް މިފްކޯގެ ސީއީއޯ އިސްމާއީލު ފައުޒީ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ފައުޒީ ވިދާޅުވީ މިފްކޯ މުވައްޒަފުންގެ އިންޝުއަރެންސް ސްކީމްގައި މުވައްޒަފުންގެ އާއިލާތައްވެސް ހިމެނޭކަމަށެވެ.
މީގެއިތުރުން، މިފްކޯގެ މުވައްޒަފުންގެ މުސާރައިގެ އޮނިގަނޑު ބަލަމުންދާކަމަށާއި ކުރިމަގުގައި މުވައްޒަފުންގެ މުސާރައަށް ހެޔޮ ބަދަލެއް އަންނާނެކަމަށްވެސް ފައުޒީ ފާހަގަކުރެއްވިއެވެ.
ފައުޒީ އިތުރަށް ވިދާޅުވީ، ފާއިތުވެދިޔަ ހަތަރު އަހަރުވެސް މިފްކޯއިން ވަރަށް ގިނަ އައު އުފެއްދުންތަކެއް އުފައްދާފައިވާކަމަށެވެ.
މީގެއިތުރުން ފައުޒީ ވިދާޅުވީ، މިފްކޯގެ ކެޕޭސިޓީއާއި އެއްވަރަށް މިފްކޯގެ މުވައްޒަފުން ތަމްރީންވުން މުހިއްމުކަމަށެވެ. އަދި ޓެކްނިކަލް ދާއިރާއިން ތަމްރީންވާ މީހުން މަދުކަން ފާހަގަކުރައްވާ ފައުޒީ ވިދާޅުވީ، މެޝިން އޮޕަރޭޝަން، ރެފްރިގްރޭޝަން އަދި މެރިން އިންޖިނިއަރިންގް ފަދަ ދާއިރާތަކަށް ވަރަށް ބޮޑަށް ސަމާލުކަންދީ މީހުން ތަމްރީން ކުރަމުންދާކަމަށެވެ.
އެގޮތުން މިހާތަނަށް މުވައްޒަފުން ތަމްރީންކުރުމުގެ ގޮތުން ތަފާތު ގިނަ ޕްރޮގްރާމްތަކެއް ހިންގާފައިވާކަމަށް ފައުޒީ ފާހަގަކުރެއްވިއެވެ.
ނޮވެމްބަރު މަހުގެ 1 ވަނަ ދުވަހަކީ މިފްކޯގެ ނަމަށް ކުންފުނި ބަދަލުވީތާ 30 އަހަރު ފުރޭ ދުވަސްކަން ފާހަގަކުރައްވާ ފައުޒީ ވިދާޅުވީ އަހަރީ ދުވަސް ވަރަށް ކުލަގަދަކޮށް ފާހަގަކުރަން ނިންމާފައިވާކަމަށެވެ.
