ކޮލޯން ބަލިކޮށް ލެވަކޫސަން އެއް ވަނައިގައި ޕޮއިންޓެއްގެ ލީޑެއް

ޖަރުމަނު ލީގުގައި އެފްސީ ކޮލޯންއާ ދެކޮޅަށް ކުޅުނު މެޗުން މޮޅުވެ، ބަޔާ ލެވަކޫސަން އެއް ވަނައިގައި ދެމި އޮވެއްޖެ އެވެ.

ލެވަކޫސަންގެ އަމިއްލަ ދަނޑުގައި އާދިއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗު ފަށައިގެން 22 ވަނަ މިނެޓުގައި ލެވަކޫސަން އަށް ލީޑު ނަގައިދިނީ ޖޯނަސް ހޮފްމަން އެވެ. އޭނާ އެ ލަނޑު ޖެހީ ފްލޯރިއަން ވާޓްޒް ތަނަވަސްކޮށްދިން ފުރުސަތެއްގަ އެވެ. އޭގެ ފަހުން ފުރަތަމަ ހާފު ނިމުމުގެ ކުރިން ލެވަކޫސަން އިން ވަނީ ދެ ވަނަ ލަނޑެއް ވެސް ޖަހައިފަ އެވެ. 32 ވަނަ މިނެޓުގައި އެ ލަނޑު ޖަހައިދިނީ ޖެރެމީ ފްރިންޕޮންގް އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ އެލެކްސް ގްރިމާލްޑޯ އެވެ. ލެވަކޫސަންގެ ތިން ވަނަ ލަނޑު އެ ޓީމުން ޖެހީ ދެ ވަނަ ހާފުގަ އެވެ. މެޗުގެ 67 ވަނަ މިނެޓުގައި ހޮފްމަން ތަނަވަސްކޮށްދިން ފުރުސަތެއްގައި އެ ލަނޑު ޖެހީ ވިކްޓާ ބޮނިފޭސް އެވެ.

ރެއާލް މެޑްރިޑުގެ ކުރީގެ ކުޅުންތެރިޔާ ޒަބީ އަލޮންސޯގެ އިރުޝާދުގެ ދަށުން ކުޅެމުން އަންނަ ލެވަކޫސަން އެއް ވަނައިގައި އޮތީ ޕޮއިންޓެއްގެ ލީޑަކުންނެވެ. މިހާތަނަށް ކުޅުނު ހަތް މެޗުން އެ ޓީމު ވަނީ 19 ޕޮއިންޓު ހޯދައިގެންނެވެ. މި ސީޒަންގެ ޖަރުމަނު ލީގުގައި މިހާތަނަށް ކުޅުނު އެއްވެސް މެޗަކުން ލެވަކޫސަން ބަލިވެފައެއް ނުވެ އެވެ.