ސްޕެނިޝް ލީގުގައި ރެއާލް ސޮސިއެޑާޑާ ދެކޮޅަށް ކުޅުނު މެޗުން އެތުލެޓިކޯ މެޑްރިޑު މޮޅުވެއްޖެ އެވެ.

އާދީއްތަ ދުވަހުގެ ރޭ އެތުލެޓިކޯގެ އަމިއްލަ ދަނޑު، މެޓްރޮޕޮލިޓާނޯ ސްޓޭޑިއަމްގައި ކުޅުނު މެޗު އެ ޓީމުން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އެތުލެޓިކޯ އިންނެވެ. ފުރަތަމަ ހާފުގެ 22 ވަނަ މިނެޓުގައި އެ ޓީމަށް ލީޑު ނަގައިދިނީ ލިނޯ އެވެ. އޭނާ އެ ލަނޑު ޖެހީ ކޯކޭ ތަނަވަސްކޮށްދިން ފުރުސަތެއްގަ އެވެ. ނަމަވެސް ދެ ވަނަ ހާފުގައި ސޮސިއެޑާޑުން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. މެޗުގެ 73 ވަނަ މިނެޓުގައި ކާލޯސް ފެނާންޑޭސް ތަނަވަސްކޮށްދިން ފުރުސަތެއްގައި ސޮސިއެޑާޑަށް ނަތީޖާ ހަމަހަމަ ކޮށްދިނީ މިކޭލް އޮޔާޒަބަލް އެވެ. މެޗުން އެތުލެޓިކޯ މޮޅުވީ މެޗުގެ ފުރިހަމަ ވަގުތު ހަމަވާން މިނެޓަކަށްވެފައި ވަނިކޮށް ލިބުނު ޕެނަލްޓީއެއް ކާމިޔާބު ކޮށްގެންނެވެ. އެ ޕެނަލްޓީ ކާމިޔާބުކޮށް މެޗުން އެ ޓީމަށް ތިން ޕޮއިންޓު ހޯދައިދިނީ ފްރާންސްގެ އެންޓޮއިން ގްރީޒްމަން އެވެ.

މޮޅާއެކު އެތުލެޓިކޯ އޮތީ ސްޕެނިޝް ލީގު ތާވަލްގެ ހަތަރު ވަނައިގަ އެވެ. މިހާތަނަށް ލީގުގައި ކުޅުނު އަށް މެޗުން އެ ޓީމަށް ލިބެނީ 19 ޕޮއިންޓެވެ. އަށް މެޗުގެ ތެރެއިން އެ ޓީމު ވަނީ ހަ މެޗުން މޮޅުވެފަ އެވެ. އެއް މެޗުން ބަލިވެފައިވާއިރު، އެއް މެޗުން ވަނީ އެއްވަރުވެފަ އެވެ. އެތުލެޓިކޯ އަތުން ބަލިވި ސޮސިއެޑާޑް އޮތީ ލީގު ތާވަލްގެ ހަ ވަނައިގަ އެވެ. އެއީ ނުވަ މެޗުން 15 ޕޮއިންޓު ހޯދައިގެންނެވެ.