ދައުލަތަށް ނަގާ ތުއްތު ކުދިންގެ ގިނަ މައިންނަކީ މަސްތުވާތަކެތީގެ ޝިކާރައަކަށް ވެފައިވާ މައިން: ޑރ.ފައިސަލް
އަހަރު ނުފުރޭ 7 ކުދިންނާ އެކު 169 ކުދިން ދައުލަތުގެ ބެލުމުގެ ދަށުގައި އެބަތިބި
އައިޖީއެމްއެޗްގެ ކުޑަކުދިންގެ ޚާއްސަ ޑރ. އަހުމަދު ފައިސަލް
ދައުލަތަށް ނަގާ ތުއްތު ކުދިންގެ ގިނަ މައިންނަކީ މަސްތުވާތަކެތީގެ ޝިކާރައަކަށް ވެފައިވާ މައިން ކަމަށް އައިޖީއެމްއެޗްގެ ކުޑަކުދިންގެ ޚާއްސަ ޑރ. އަހުމަދު ފައިސަލް ވިދާޅުވެއްޖެއެވެ.
ޑރ.ފައިސަލް މިހެން ވިދާޅުވީ އަހަރު ނުފުރޭ 7 ކުދިންނާ އެކު 169 ކުދިން ދައުލަތުގެ ބެލުމުގެ ދަށުގައި އެބަތިބި ކަމަށް ރިޕޯޓުކުރުމާއި ގުޅިގެންނެވެ. ޖެންޑާ މިނިސްޓްރީން އާއްމުކޮށްފައިވާ އެންމެފަހުގެ ތަފާސްހިސާބުތަކަށް ބަލާއިރު، އޮގަސްޓް މަހު ދައުލަތަށް އަލަށް 4 ކުއްޖަކު ނަގާފައިވެއެވެ.
ދައުލަތުގެ ބެލުމުގެ ދަށުގައި ގިނަ އަދަދެއްގެ ކުޑަ ކުދިން ތިބުމާއި ގުޅިގެން ޑރ.ފައިސަލް ވިދާޅުވީ އަހަރު ނުފުރޭކުދިންގެ ތެރޭގައި ގިނަވާނީ މަސްތުވާތަކެތީގެ ޝިކާރައަކަށްވި މައިންގެ ދަރިން ކަމަށާއި، މަސްތުވާތަކެތީގެ ކާރިސާ ހައްލުކޮށްގެންނޫނީ މިކަމަށް ހައްލެއް ނާންނާނެ ކަމަށެވެ.
ރާއްޖޭގައި މަސްތުވާތަކެތީގެ މައްސަލަ ވަރަށް ބޮޑެވެ. މި މައްސަލަ ހައްލު ކުރުމަށް ސަރުކާރުން އެކި ލެވަލްގައި މިފާއިތުވި 4 އަހަރުގެ ތެރޭގައި މަސައްކަތް ކޮށްފައިވެއެވެ. ނޭޝަނަލް ޑްރަގް އެޖެންސީ (އެންޑީއޭ)އިން މަސްތުވާތަކެތީގެ ޝިކާރައަކަށްވެފައިވާ މީހުންނަށް ފަރުވާ ދިނުމަށް އެކިއެކި ޕްރޮގްރާމްތައް މާލޭގެ އިތުރުން އަތޮޅުތެރޭގައި ކުރިއަށް ގެންދެއެވެ. އެންޑީއޭގެ އަމާޒަކީ މަސްތުގެ ޝިކަރާއަށްވެފައިވާ މީހުންނަށް ފަރުވާދިނުމަށްފަހު، އެމީހުން އަނބުރާ މުޖުތަމައަށް ނެރުމެވެ. ކޮމިއުނިޓީ ފަރުވާގެ ޕްރޮގްރާމް އަދި މެތަޑޯން ޕްރޮގްރާމް ކުރިއަށް ގެންދެއެވެ.
