ޤުރުއާނާއި ރަސޫލާގެ ސުންނަތުގައި ހިފައިފިނަމަ ދުވަހަކު ވެސް މަގު ނޯޅޭނެ: ޚުތުބާ
6 އޮކްޓޯބަރު 2023 | ހުކުރު 08:25މި މައްސަރަކީ ބަރަކާތުން ފުރިގެންވާ މައްސަރެއް
ހުކުރު ނަމާދު ކުރުމަށް އިސްލާމީ މަރުކަޒުގައި ޖަމާއަތް ހަދައިގެން
ކީރިތި ޤުރުއާނާއި، ކީރިތި ރަސޫލާ صَلَّى اللهُ عَلَيْهِ وَسَلَّمَ ގެ ސުންނަތުގައި ހިފައިފިނަމަ ދުވަހަކު ވެސް މަގުނޯޅޭނެ ކަމަށް ހުކުރު ޚުތުބާގައި ބުނެފިއެވެ.
''ކީރިތި ރަސޫލާ صَلَّى اللهُ عَلَيْهِ وَسَلَّمَ ދުނިޔޭގެ އަލިކަން ދެކެވަޑައިގަތް މައްސަރު'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މިމައްސަރަކީ ބަރަކާތުން ފުރިގެންވާ މައްސަރެއް ކަމަށާއި، މިމައްސަރަކީ އާލަމްތަކަށް ރަހްމަތެއްކަމުގައި ކީރިތި ﷲ ފޮނުއްވި މާތް ސާހިބާ ދުނިޔެއަށް ވަޑައިގަތް މައްސަރު ކަމަށެވެ.
ޚުތުބާގައި ވަނީ އެކަލޭގެފާނު ދުނިޔެއަށް ވަޑައިގެންނެވުމުގެ ކުރިން ދުނިޔެ އޮތް ދަށު ދަރަޖައާއި އެކަލޭގެފާނު ދުނިޔެއަށް އުފަންވެވަޑައިގަތުމާއި އަދި ދީނަށް ގޮވާލެއްވުމުގައި މަސައްކަތްތައް ކުރެއްވި ގޮތަށް އަލިއަޅުވާލާފައެވެ.
ޚުތުބާގައި ބުނީ އެދުވަސްވަރު ފޮތުގެ އަހުލުވެރީންގެ ގޮތުގައި ތިބީ ޔަހޫދީންނާއި، ނަސާރާއިން ކަމަށާއި، އެދެބައި މީހުން ވެސް ދިޔައީ އެއްބަޔަކު އަނެއްބަޔަކު ކުށްވެރިކުރަމުން ކަމަށެވެ.
ޚުތުބާގައި ބުނީ މިފަދަ ހާލަތެއްގައި ދުނިޔެވަނިކޮށް ރަސޫލާ މުހައްމަދުގެފާނު ދުނިޔެއަށް ވަޑައިގަތީ ޔަތީމު ހާލުކޮޅުގައި ކަމަށާއި، އުފަންވެ ވަޑައިގަތް ދުވަހުން ފެށިގެން އެކަލޭގެފާނަށް ތަރުބިއްޔަތު ލިބިވަޑައިގަތީ ސީދާ އިލާހީ އިނާޔަތްތެރި ކަމުގެ ދަށުގައި ކަމަށެވެ.
ޚުތުބާގައި ބުނީ ރިވެތި އަޚުލާގާއި މަކާރިމުގެ މާތް ސިފަތައް އެކަލޭގެފާނަށް ލިބިވަޑައިގެންފައިވަނީ އޭގެ މަތިވެރި މިސާލެއްގެ ގޮތުގައި ކަމަށާއި، އުމުރުފުޅުން ސާޅީސް އަހަރުފުޅު ފުރިހަމަ ވުމަށްފަހު އިންސާނިއްޔަތަށް މަގު ދައްކަވައި ދުނިޔެ އިސްލާހު ކުރެއްވުމުގެ ބުރަ މަސްއޫލިއްޔަތު އެކަލޭގެފާނު ކޮނޑުފުޅުގައި އެޅުނު ކަމަށެވެ.
ކީރިތި ރަސޫލާ صَلَّى اللهُ عَلَيْهِ وَسَلَّمَ އެކަލޭގެފާނުގެ ރިސާލަތުގެ ކުރީކޮޅުގައި އެކަލޭގެފާނަށް ތަބައަވީ މަދު މީސްކޮލައިގެން އަޅުކަން ކުރައްވައި އުޅުއްވީ ސިއްރިއްޔާތުގައި ކަމަށާއި، ފާޅުގައި ދީނަށް ގޮވައިލެއްވުމުގެ އަމުރުފުޅު އައުމާއި ގުޅިގެން ފާޅުގައި ދީނަށް ގޮވައިލައްވަން ފެއްޓެވި ކަމަށެވެ. އެއަށްފަހު މުޝްރިކުންގެ ދުއްތުރާތަކާއި އަނިޔާތައް ދިޔައީ އިތުރުވަމުން ކަމަށާއި، އޭގެކުރިން އެބައިމީހުންގެ ކައިރީގައި އެންމެ ލޮބުވެތި ޝަހުސެއްކަމުގައިވީ މާތް ރަސޫލާ އަކީ އެބައިމީހުންގެ ދުޝްމަނެއް ކަމުގައި ބަލަން ފެށި ކަމަށެވެ. އަދި އެކަލޭގެފާނުގެ ފުރާނަފުޅަށް ނުރައްކައުވާ ދަރަޖަށް އެބައިމީހުންގެ އަނިޔާވެރިކަން ދިޔަ ކަމަށާއި، މިހިސާބަށް ކަންތައްތައް ދިއުމުން މައްކާ ދޫކުރައްވައި މަދީނާއަށް ހިޖުރަކުރެއްވިކަން ޚުތުބާގައި ފާހަގަކޮށްފައިވެއެވެ. އެތާނގައި އިސްލާމީ ދައުލަތެއް ބިންގާ އެޅުއްވި ކަމަށާއި، އިތުރު އެކަލޭގެފާނަށް ތަބައަވީ މުސްލިމުންގެ އަދަދު އެއްދުވަހުން އަނެއް ދުވަހަށް ދިޔައީ އިތުރުވަމުން ކަމަށެވެ.
ތޭވީސް އަހަރު ކެނޑިނޭޅި ކުރެއްވި މަސްކަތްޕުޅަށް ފަހު ސުވަރުގެ ވަޑައިގަތީ މާތްރަސޫލާގެ ކޮނޑުފުޅު އެޅުއްވުނު ވަރުގަދަ މަސްއޫލިއްޔަތު ފުރިހަމަ ގޮތުގައި އުފުއްލަވާފައިކަމަށެވެ. އަދި ދުނިޔެ އެހެން ދުނިޔެއަކަށް ބަދަލުކުރައްވާފައިވާ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ އިސްލާމީ ރިސާލަތާއެކު ދުނިޔެ ދެކެން ފެށީ މުޅި އައު ދައުރެއް ކަމަށާއި، ޖަހާލަތުގެ އަނދިރިކަން ފެތުރިފައި އޮތް ދުނިޔެ އިލްމުގެ ނޫރުން އަލިވެ އުޖާލާވި ކަމަށެވެ. އަނިޔާއާއި ބޭއިންސާފުގެ ބަދަލުގައި އަދުލު އިންސާފު އާއްމުވި ކަމަށާއި، ދެކޮޅުވެރިކަމާއި ނޭއްގާނީކަމުގެ ބަދަލުގައި އެކުވެރިކަމާއި ސުލްހަ މަސަލަސްކަން ގާއިމްވި ކަމަށެވެ. އަދި ތައުހީދުގެ ބިންގަލުގެ މަތީގައި އީމާންކަމުގެ އިމާރާތްތައް އާރާސްތުކުރެވިފައިވާ ކަމަށް ޚުތުބާގައި ބުނެފައިވެއެވެ.
މީގެ އިތުރުން ކީރިތި ރަސޫލާ صَلَّى اللهُ عَلَيْهِ وَسَلَّمَ ދުނިޔެ ދޫކުރައްވައި ވަޑައިގަތީ އަހަރެމެން އޭގައި ހިފަހައްޓައިފިނަމަ އަހަރެމެން ދުވަހަކުވެސް މަގުނޯޅޭނެ ދެ އެއްޗެއް އަހަރެމެންގެ ތެރެއަށް ދޫކުރައްވާފައެވެ. އެއީ ކީރިތި ޤުރުއާނާއި އިތުރު އެކަލޭގެފާނުގެ މާތްވެގެންވާ ސުންނަތް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ އުއްމަތުގެ ބާއްޖަވެރިކަމަށްޓަކައި އުއްމަތުގެ ހެވާއި ލާބައަށްޓަކައި ކީރިތި ރަސޫލާ صَلَّى اللهُ عَلَيْهِ وَسَلَّمَ ކުރެއްވި މިންނަތް މަސައްކަތްޕުޅަކީ ދުލަކުން ގަލަމަކުން ބަޔާންކުރެވޭ ވަރަށްވުރެ ގިނަގުނަ ކަންތައްތަކެއް ކަމަށެވެ. އަދާކުރަންޖެހޭ ޝުކުރަކީ އެހާ މަތިވެރި ޝުކުރެއް ކަމަށާއި، އެކަލޭގެފާނު ގެނެސްދެއްވި ހިދާޔަތާއި ޝަރީއަތަށް ފުރިހަމައަށް ބޯލަނބައި އެކަލޭގެފާނަށް ތަބާވާންޖެހޭ ކަމަށް ޚުތުބާގައި ބުނެފައިވެއެވެ.
